Deuteronomy 17:8 - Yn Vible Casherick 1775 1819

⁸ My hig cooish-leigh royd doillee dy ve er ny vriwnys, eddyr fuill as fuill, eddyr shuit as shuit, eddyr builley as builley, as nagh vod ve er ny reaghey liorish ny briwnyn, raad t’ou cummal: nee oo eisht troggal ort, as goll seose gys yn ynnyd nee’n Chiarn dty Yee y reih;

Deuteronomy 17:8 ပူးပေါင်းရင်းမြစ်များ

2 Samuel 15:2

As dirree Absalom dy moghey, as hass eh ayns giat ny cooyrtey: as shoh myr ve, tra haink dooinney erbee va shuit-leigh echey gys y ree son briwnys, eisht dy deïe Absalom er, as dooyrt eh, Cre’n ard-valley t’ou uss jeh? As dooyrt eh, Ta dty harvaant fer jeh lheid y tribe shen ayns Israel.

1 Recortyssyn 26:29

Jeh ny Izhariteyn, va Chenaniah, as e vec, son offishearyn as briwnyn ayns cooishyn elley harrish Israel.

Exodus 18:15

As dooyrt Moses rish e ayr-’sy-leigh, Son dy vel y pobble cheet hym’s, dy vriaght veih Jee.

Exodus 18:26

As ren ad y pobble y vriwnys ec dy chooilley earish; ny cooishyn creoi hug ad fenish Voses, agh dy chooilley chooish sloo ren ad hene y reaghey.

Exodus 21:20

As my nee dooinney bwoalley e harvaant, ny e inney-veyl lesh lorg, as eh dy gheddyn baase fo e laue, bee eh son shickyrys er ny stroie.

Exodus 21:22

My nee deiney streeu, as gortaghey ben torragh, myr shen dy jig ee roish e traa, as dyn assee sodjey; bee eh dy shickyr er ny cherraghey, rere myr ver dooinney’n ven er, as bee eh oolit lurg oardagh ny briwnyn.

Exodus 21:28

As my nee dow puttey dooinney ny ben, as eh oyr baaish daue, bee’n dow son shickyrys er ny chlaghey, as cha bee’n eill echey eeit; agh bee’n er s’liesh y dow er ny heyrey.

Exodus 22:2

My vees maarliagh goit brishey stiagh ayns thie, as eh dy gheddyn builley baaish, cha bee fuill deayrtit er e hon.

Exodus 22:8

Mannagh jig briaght er y vaarliagh, eisht bee dooinney’n thie er ny choyrt lesh fenish ny briwnyn, dy vriaght vel eh er choyrt e laue ayns cooid e naboo.

Ezekiel 44:24

As ayns cooishyn leigh nee ad soie ayns briwnys, as ver ad briwnys cordail rish my lattyssyn: as nee ad freayll ny leighyn, as ny slattyssyn aym’s, ayns ooilley ny quaiylyn aym’s, as nee ad my ghooneeyn y chasherickey.

Haggai 2:11

Shoh myr ta Chiarn ny flaunyssee dy ghra, Jean briaght nish jeh ny saggyrtyn mychione y leigh, gra,

Malachi 2:7

Son lhisagh meillyn ny saggyrtyn freayll tushtey, as lhisagh ad shirrey yn leigh ec e veeal, son eshyn chaghter Chiarn ny flaunyssee.

Earrooyn 35:11

Eisht nee shiu soiaghey magh ard-valjyn diu, dy ve ard-valjyn sauchey er nyn son; dy vod eshyn, ta marroo persoon erbee trooid taghyrt, roie er-chea gys shen.

Earrooyn 35:16

As my t’eh er woalley eh lesh greïe yiarn, (dy ve oyr baaish da) t’eh ny ghunver: bee’n dunver son shickyrys er ny choyrt dy baase.

Deuteronomy 1:17

Cha jean shiu soiaghey jeh persoonyn ayns briwnys, agh ver shiu clashtyn da’n voght chammah’s da’n verchagh; cha bee shiu ayns aggle roish eddin dooinney, son lesh Jee ta’n briwnys: as y chooish ta ro ghoillee diu, cur-jee roym’s eh, as neem’s clashtyn eh.

Deuteronomy 12:11

Shen y raad vees ynnyd nee yn Chiarn nyn Yee y reih, dy choyrt e ennym ayn, gys shen ver shiu lhieu ooilley ny ta mee dy harey diu, ny ourallyn-losht eu, ny chebballyn, ny jagheenyn, as oural-troggit-seose nyn laue, as y reih jeh dy chooilley vreearrey-arryltagh, ta shiu dy yannoo gys y Chiarn.

Deuteronomy 12:14

Agh ayns yn ynnyd, nee’n Chiarn dty Yee y reih ayns unnane jeh dty hribeyn, ayns shen nee oo chebbal dty ourallyn-losht, as ayns shen nee oo ooilley ny ta mee dy dty harey.

Deuteronomy 12:5

Agh gys yn ynnyd, nee’n Chiarn nyn Yee y reih ass ooilley ny tribeyn eu, dy chur e ennym ayn, eer ayns e ynnyd-vaghee hene nee shiu shirrey, as gys shen nee shiu cheet:

Deuteronomy 19:17

Eisht nee’n daa ghooinney, ta’n streeu eddyr ad, shassoo kionfenish y Chiarn, kiongoyrt rish ny saggyrtyn, as ny briwnyn vees ayns ny laghyn shen.

Deuteronomy 19:4

As shoh cooish y varrooder, nee roie er-chea huc, dy hauail e vioys: Quoi-erbee ta marroo e naboo doaltattym, er nagh row dwoaie echey roïe:

Deuteronomy 21:5

As hig ny saggyrtyn mec Levi er-gerrey (son adsyn ta’n Chiarn dty Yee er reih dy hirveish da, as dy vannaghey ayns ennym y Chiarn) as liorish y vriwnys ocsyn vees dy chooilley streeu, as dy chooilley vuilley er ny reaghey.

Deuteronomy 25:1

My vees streeu eddyr deiney, as dy der ad lhieu yn chooish fenish ny briwnyn, eisht nee ad seyrey’n dooinney cairagh, as deyrey’n vee-chairagh.