Daniel 6:26 - Yn Vible Casherick 1775 1819

²⁶ Ta mish jannoo slattys ayns dy chooilley rheam jeh my reeriaght, dy bee deiney er-creau, as ayns aggle, roish Jee Ghaniel: son eshyn y Jee bio, as firrinagh son dy bragh, as e reeriaght, shen nagh bee er ny stroie, as e reiltys dy bragh farraghtyn.

Daniel 6:26 ပူးပေါင်းရင်းမြစ်များ

Ezra 1:3

Quoi ta ny mast’ eu jeh ooilley e phobble? e Yee dy row mârish, as lhig da goll seose gys Jerusalem t’ayns Judah, as troggal thie yn Chiarn, Jee Israel, (eshyn y Jee) ta ayns Jerusalem.

Ezra 7:21

As ta mish, eer mee hene Artaxerxes y ree, cur magh sarey da ooilley ny resowryn ta cheu elley jeh’n awin, cre-erbee hirrys Ezra yn saggyrt, scrudeyr ayns leigh Yee flaunys, erriu, dy bee eh jeant ass laue;

Psalmyn 119:120

Ta my eill er-creau son aggle jeed’s: as ta mee fo atchim dty vriwnyssyn.

Psalmyn 146:10

Bee yn Chiarn dty Yee, O Sion, ny Ree er son dy bragh: as trooid magh dy chooilley heeloghe.

Psalmyn 2:11

Shirveish-jee yn Chiarn lesh aggle: as gow-jee boggey ayn lesh arrym.

Psalmyn 29:10

Ver y Chiarn niart da e phobble: ver y Chiarn da e phobble yn bannaght dy hee.

Psalmyn 42:2

Ta m’annym paagh son Jee, eer son y Jee bio: cuin hig-ym dy hassoo kionfenish Yee?

Isaiah 66:2

Son dy chooilley nhee jeu shoh ooilley ta my laue hene er chummey, as liorym’s ta ooilley ny reddyn shoh tannaghtyn, ta’n Chiarn dy ghra: agh gys y dooinney shoh neem’s jeeaghyn, dy jarroo dasyn ta boght as dy chree arryssagh, as arrymagh da my ghoo.

Isaiah 9:7

Er mooadys e reill as e hee cha bee jerrey, er stoyl-reeoil Ghavid, as er e reeriaght, dy oardrail eh, as dy niartaghey eh lesh briwnys as cairys, veih’n traa shoh magh eer son dy bragh. Graih jeean Chiarn ny flaunyssee nee shoh y chooilleeney.

Jeremiah 10:10

Agh ta’n Chiarn yn Jee firrinagh, eshyn y Jee bio, as y Ree dy bragh farraghtyn: ec y chorree echeysyn bee’n seihll er-creau, as cha vod ny ashoonyn e yymmoose y ymmyrkey.

Daniel 2:44

As rish lhing ny reeaghyn shoh, nee Jee ny flaunys soiaghey seose reeriaght, nagh bee dy bragh er ny stroie: as cha bee yn reeriaght faagit da pobble elley, agh brishee eh ayns peeshyn, as ver eh mow ooilley ny reeriaghtyn shoh, as nee eh shassoo son dy bragh.

Daniel 3:29

Shen-y-fa ta mish jannoo slattys, Dy chooilley phobble, ashoon, as glare, loayrys nhee erbee noi Jee Shadrach, Meshach as Abed-nego, dy bee ad er ny yiarey ayns peeshyn, as ny thieyn oc jeant ny horran, er-yn-oyr nagh vel Jee erbee elley oddys livrey er yn aght shoh.

Daniel 4:3

S’mooar ta e chowraghyn! as s’niartal ta e yindyssyn! ta’n reeriaght echeysyn reeriaght dy bragh farraghtyn, as e reiltys veih sheeloghe gys sheeloghe.

Daniel 4:34

As ec kione ny laghyn shen, hrog mish Nebuchadnezzar my hooillyn gys niau, as haink my hushtey hym reesht, as vannee mee yn er smoo syrjey, as hug mee moylley as ooashley dasyn ta dy bragh beayn, e reiltys ta reiltys dy bragh farraghtyn, as e reeriaght ta veih sheeloghe gys sheeloghe.

Daniel 6:20

As tra haink eh gys yn ooig, deïe eh lesh coraa treih-hrimshagh er Daniel, as loayr y ree, as dooyrt eh rish Daniel, O Ghaniel, shirveishagh y Jee bio, vel dty Yee, t’ou dy hirveish dy kinjagh, abyl uss y livrey veih ny lionyn?

Daniel 7:14

As va er ny choyrt da reiltys, as gloyr, as reeriaght, dy jinnagh dy chooilley phobble, ashoonyn, as glaraghyn eshyn y hirveish: ta e reiltys reiltys dy bragh farraghtyn, nagh jean cherraghtyn, as e reeriaght shen nagh bee er ny stroie.

Daniel 7:27

As bee yn reeriaght as y reiltys, as mooadys y reeriaght fo ooilley niau, er ny choyrt da pobble noo yn er smoo syrjey, ta e reeriaght reeriaght dy bragh farraghtyn, as nee dy chooilley reiltys shirveish, as cur biallys da.

Hosea 1:10

Ny-yeih bee earroo cloan Israel myr genniagh ny marrey, nagh vod ve er ny howse, ny er ny choontey; as hig eh gy-kione, ’syn ynnyd ayn ve er ny ghra roo, Cha nee shiuish yn pobble aym’s, dy nee ayns shen bee eh graït roo, Shiuish mec y Jee bio.

Malachi 3:6

Son mish yn Chiarn; cha vel mee caghlaa: shen-y-fa cha vel shiuish mec Yacob er nyn stroie.

Noo Mian 6:13

As ny leeid shin ayns miolagh, agh livrey shin veih olk: Son lhiat’s y reeriaght, as y phooar, as y ghloyr, son dy bragh, Amen.

Noo Luke 1:33

As nee eh reill harrish thie Yacob gys earishyn foddey beayn, as er e reeriaght cha bee jerrey erbee.

Noo Luke 12:5

Agh ver-yms raaue diu quoi roish ghoys shiu aggle: Gow-jee aggle roishyn, echey ta pooar, erreish da v’er varroo dy hilgey ayns niurin; dy jarroo ta mee dy ghra riu, Gow-jee aggle roishyn.

Jannoo 17:25

Chamoo t’eh er ny ooashlaghey lesh laueyn deiney, myr dy beagh eh feme nhee erbee, fakin dy vel eh coyrt da ooilley bioys, as ennal, as dy chooilley nhee;

Romanee 9:26

As hig eh gy-kione, raad ve er ny ghra roo, Cha nee shiuish my phobble; ayns shen bee ad er nyn enmys cloan y Jee bio.

Deuteronomy 5:26

Son quoi’n dooinney ’sy theihll t’er chlashtyn coraa’n Jee bio, loayrt ass mean yn aile, (myr ta shinyn) as eh ve bio?

1 Thessalonianee 1:9

Son t’ad-hene soilshaghey mychione ain, kys ghow shiu rooin tra haink shin hoshiaght ny mast’ eu, as kys hyndaa shiu gys Jee veih jallooyn, dy hirveish y Jee bio as firrinagh,

Hebrewnee 12:29

Son ta’n Jee ainyn myr aile ta coyrt mow.

Jamys 1:17

Ta dy chooilley ghioot mie, as dy chooilley ghioot firrinagh veih’n yrjey, as cheet neose veih Ayr y toilshey, mârish nagh vel caghlaa erbee, ny scadoo dy hyndaa.

Ashlish 11:15

As heid y chiaghtoo ainle, as va coraaghyn mooarey ayns niau, gra, Ta reeriaghtyn y theihll er jeet dy ve reeriaghtyn nyn Jiarn, as y Creest echey, as nee eh reill son dy bragh as dy bragh.

Ashlish 4:10

Ta ny kiare shanstyryn as feed tuittym sheese kiongoyrt rishyn va ny hoie er y stoyl-reeoil, as coyrt ooashley dasyn ta bio son dy bragh as dy bragh, as t’ad ceau sheese ny attaghyn oc kiongoyrt rish y stoyl-reeoil, gra,

Ashlish 5:14

As dooyrt ny kiare cretooryn, Amen. As huitt ny kiare shanstyryn as feed sheese as hug ad ooashley dasyn ta bio son dy bragh as dy bragh.

1 Samuel 17:26

As loayr David rish ny deiney hass liorish, gra, Cre vees jeant son y dooinney varrys yn Philistine shoh, as scughys yn scammylt shoh veih Israel? son quoi’n Philistine chymmyltagh shoh, dy goghe eh er dy choyrt y-lane fo armeeyn y Jee bio.

1 Samuel 17:36

Varr dty harvaant chammah yn lion, as y vuc-awin; as bee’n Philistine chymmyltagh shoh myr unnane jeusyn, fakin dy vel eh er choyrt y-lane fo armeeyn y Jee bio.