Daniel 5:7 - Yn Vible Casherick 1775 1819

⁷ Dyllee yn ree dy ard, ad dy chur lhieu stiagh ny rollageydee, ny Caldeanee, as ny fir-ysseree: as loayr y ree, as dooyrt eh rish deiney-creeney Vabylon, Quoi-erbee lhaihys yn screeu shoh, as ver dooys bun er, bee eh er ny choamrey lesh scarleod, as boandey airhey mysh e wannal, as bee eh yn trass reiltagh ’sy reeriaght.

Daniel 5:7 ပူးပေါင်းရင်းမြစ်များ

Genesis 41:8

As haink eh gy-kione ’sy voghrey, dy row e aigney seaghnit, as hug eh fys, as deïe eh er ooilley fir-obbee Egypt, as ooilley ny deiney creeney v’ayn; as dinsh Pharaoh e ghreamal daue; agh cha row unnane oddagh toiggal y choyrt da Pharaoh jeu.

Esther 3:1

Lurg ny reddyn shoh, ren ree Ahasuerus soiaghey seose Haman mac Hammedatha yn Agagite, as hrog eh gys ard-oik eh, as hoie eh eh erskyn ooilley ny princeyn va mârish.

Exodus 7:11

Eisht hug Pharaoh myrgeddin fys er ny deiney creeney as ny fir-obbee: nish ren fir-obbee Egypt neesht, er yn aght cheddin, lesh nyn obbeeys:

Raaghyn Creeney 1:9

Son bee ad aalid dy ghrayse da dty chione, as myr boandey airhey mysh dty wannal.

Arrane Solomon 1:10

Ta dty cheeillyn bwaagh soit magh lesh roaghyn dy yewellyn, dty wannal lesh boandaghyn airhey.

Isaiah 47:13

T’ou tooillit ayns ymmodee dty haaseyn. Lhig da nish ny fir-ysseree, ny rollageydee, as ny fallogyssee meeagh, shassoo seose as sauail oo veih shen ta kiarit dy heet ort.

Jeremiah 50:35

Ta’n cliwe er ny Caldeanee, ta’n Chiarn dy ghra, as er cummaltee Vabylon, as er ny princeyn, as er ny deiney creeney eck.

Ezekiel 16:11

Hoie mee magh oo myrgeddin dy stoamey, as hug mee braceletyn er dty laueyn, as boandey airhey mysh dty wannal.

Daniel 1:20

As ayns dy chooilley chooish dy chreenaght as toiggal, va’n ree briaght jeu, hooar eh ad jeih keayrtyn share na ooilley ny deiney-creeney as rollageydee v’ayns ooilley e reeriaght.

Daniel 1:4

Cloan, nagh row assee erbee orroo, agh aalin as arryltagh gys creenaght, as aggindagh gys tushtey, as dy ghoaill ynsaghey, ny lheid’s va feeu dy hassoo ayns plaase y ree, as daue dy choyrt ynsaghey as glare ny Caldeanee.

Daniel 2:2

Eisht doardee yn ree dy eamagh er ny deiney-creeney, as ny rollageydee, as ny fir-ysseree, as ny Caldeanee, dy hoilshaghey da’n ree e ghreamallyn: myr shen haink ad, as hass ad fenish y ree.

Daniel 2:27

Dansoor Daniel fenish y ree, as dooyrt eh, Yn folliaght ta’n ree er yeearree, cha vod ny deiney-creeney, ny rollageydee, ny fallogyssee, ny ny fir-ysseree soilshaghey da’n ree:

Daniel 2:48

Eisht ren y ree ny ghooinney ooasle jeh Daniel, as hug eh da ymmodee giootyn mooarey, as hug eh da yn reill harrish slane rheam Vabylon, as yn ard-chiannoortys harrish ooilley deiney-creeney Vabylon.

Daniel 2:6

Agh my nee shiu yn dreamal y hoilshaghey dou, as cre t’er ny hoiggal liorish, yiow shiu voym giootyn, as leagh, as ooashley vooar: er-y-fa shen jeeagh-jee dou yn dreamal, as cre t’er ny hoiggal liorish.

Daniel 4:14

Dyllee eh dy ard, as shoh myr dooyrt eh, Lhieg y billey, as giare jeh e vanganyn, crie sheese e ghuillagyn, as skah e vess; lhig da’n maase cosney ersooyl veih fo yn scadoo echey, as ny eeanlee veih e vanglaneyn.

Daniel 5:11

Ta dooinney ayns dty reeriaght, ta spyrryd ny flaunyssee noo ayn, as rish lhing dty ayrey, va soilshey, as tushtey, as creenaght casley rish creenaght ny flaunyssee ry-gheddyn aynsyn; eh ren ree Nebuchadnezzar dty ayr ny vainshtyr harrish ny deiney-creeney, ny rollageydee, ny Caldeanee, as ny fir-ysseree.

Daniel 5:15

As nish ta ny deiney-creeney, ny rollageydee er ve sumnit kiongoyrt rhym, dy lhaih yn screeu shoh, as soilshaghey cre t’er ny hoiggal liorish: agh cha daink eh lhieu shoh dy hoilshaghey bun y chooish.

Daniel 5:16

As ta mee er chlashtyn my-dty-chione, dy vel oo son cur bun er ashlishyn, as reaghey cooishyn doillee; nish my oddys oo lhaih yn screeu, as soilshaghey dou cre t’er ny hoiggal liorish, bee oo er dty choamrey lesh scarleod, as boandey airhey mysh dty wannal, as bee oo yn trass reiltagh ’sy reeriaght.

Daniel 5:29

Eisht doardee Belshazzar, dy beagh Daniel er ny choamrey lesh scarleod, as dy chur boandey airhey mysh e wannal, as dy ockley magh order my-e-chione, Dy beagh eh yn trass reiltagh ayns y reeriaght.

Earrooyn 22:17

Son nee’m oo y hroggal gys ooashley feer ard, as cre-erbee hirrys oo orrym, nee’m er dty hon: ’Tar, er-y-fa shen, ta mee guee ort, cur mollaght er y pobble shoh er my hon.

Earrooyn 22:7

As hie shanstyr Voab, as shanstyr Vidian rhymboo lesh y leagh dy obbeeys ayns nyn laue; as haink ad gys Balaam, as livrey ad chaghteraght Valak.

Earrooyn 24:11

Shen-y-fa nish, cosne royd gys dt’ynnyd hene: va mee kiarit dy hroggal oo gys ard-ooashley: agh cur-my-ner, ta’n Chiarn er dty reayll veih ooashley.

1 Samuel 17:25

As dooyrt deiney Israel, Vel shiu er vakin y dooinney shoh t’er jeet seose? son shickyrys dy chur y-lane fo Israel t’eh er jeet: yn dooinney er-y-fa shen varrys eh, nee’n ree eh y chooilleeney lesh mooarane berchys, as ver eh da e inneen, as nee eh thie e ayrey seyr ayns Israel.