Daniel 4:32 - Yn Vible Casherick 1775 1819

³² As eiyree ad magh oo veih deiney, as bee dty chummal marish maase y vagheragh: nee oo gee faiyr myr ny dew, as hig shiaght traaghyn ort, derrey vees toiggal ayd, dy vel y Jee smoo syrjey reill ayns reeriaght deiney, as coyrt eh da quoi-erbee saillish hene.

Daniel 4:32 ပူးပေါင်းရင်းမြစ်များ

2 Recortyssyn 33:13

As ghow eh padjer huggey, as hooar eh e aghin, as deaisht eh rish e accan, as hug eh lesh eh reesht gys Jerusalem gys e reeriaght hene. Eisht hoig Manasseh dy nee’n Chiarn va yn Jee.

Lioar Yob 42:2

Ta fys aym dy vod oo dy chooilley nhee y yannoo, as nagh vod smooinaghtyn erbee ve gyn-yss dhyt.

Lioar Yob 9:12

Cur-my-ner, t’eh goaill ersooyl, quoi oddys eh y lhiettal? quoi jir rish, Cre t’ou dy yannoo?

Psalmyn 115:3

Er son y Jee ainyn, t’eh ayns niau: t’eh er n’yannoo myr s’gooidsave lesh.

Psalmyn 135:6

Cre-erbee s’gooidsave lesh y Chiarn, shen ren eh ayns niau, as er y thalloo: ayns yn aarkey, as ayns ooilley ny diunidyn mooarey.

Exodus 8:10

As dooyrt eshyn, Mairagh. As dooyrt eh, Dy row eh myr t’ou gra: dy vod fys ’ve ayd’s, nagh vel unnane erbee goll-rish y Chiarn y Jee ain.

Exodus 9:14

Son ver-yms ec y traa shoh ooilley my ghourinyn er dty chree, as er dty harvaantyn, as er dty phobble, dy vod oo toiggal nagh vel my lheid’s ayns ooilley yn seihll.

Exodus 9:29

As dooyrt Moses rish, Cha leah’s veem’s er gholl magh ass yn ard-valley, nee’m my laueyn y hroggal seose gys y Chiarn: as nee’n taarnagh scuirr, chamoo vees sniaghtey-garroo arragh ayn; dy vod fys ve ayd dy nee lesh y Chiarn y thalloo.

Isaiah 37:20

Nish er-y-fa shen, O Hiarn nyn Yee, saue shin veih’n laue echey, dy vod ooilley reeriaghtyn ny hooirey toiggal dy nee uss y Chiarn, eer uss dty-lomarcan.

Isaiah 40:15

Cur-my-ner, ta ny ashoonyn myr bine ’sy chruick, as t’ad coontit myr brinneen ayns ny meihaghyn: cur-my-ner, t’eh troggal ny ellanyn myr red feer fardalagh.

Isaiah 40:17

Ta dy chooilley ashoon myr red gyn veg kiongoyrt rish, t’ad coontit liorish ny sloo na veg as fardail.

Isaiah 45:3

As ver-ym dhyt’s tashtaghyn y dorraghys, as berchys keillit ny ynnydyn follit, dy vod fys ’ve ayd’s, dy nee mish y Chiarn, ta geamagh ort’s liorish dty ennym, Jee Israel.

Jeremiah 27:5

Mish ta er chroo yn thalloo, yn dooinney as y baagh ta er yn ooir, liorish my phooar ooilley-niartal, as my roih sheeynt magh, as ta mee er choyrt eh da quoi-erbee saillym.

Daniel 2:21

As t’eh caghlaa ny traaghyn as ny imbaghyn, t’eh scughey reeaghyn as soiaghey seose reeaghyn, t’eh coyrt creenaght dauesyn ta creeney, as tushtey dauesyn ta toiggal tushtey.

Daniel 4:31

Choud as va’n goo foast ayns beeal y ree, haink coraa veih niau, gra, Ort’s, O ree Nebuchadnezzar, te sarit, Ta’n reeriaght er n’immeeaght voïd’s.

Daniel 5:21

As v’eh eebrit magh veih cloan gheiney; as haink e chree dy ve myr cree baagh, as va e chummal mârish ny assylyn oaldey: ren eh gyndyr er faiyr myr ny dew, as va e chorp fluigh lesh druight yn aer; derrey hooar eh toiggal, dy vel y Jee smoo syrjey reill ayns reeriaght deiney, as dy vel eh soiaghey harrish quoi-erbee saillish hene.

Joshua 4:24

Dy vod dy chooilley phobble er feaï-ny-cruinney cronnaghey laue y Chiarn, dy vel eh niartal; dy vod shiuish aggle y ghoaill roish y Chiarn y Jee eu ooilley laghyn nyn mea.