Daniel 3:4 - Yn Vible Casherick 1775 1819

⁴ Eisht ren yn armyder fockley-magh eam dy ard, Diuish te er ny harey, O phobble, ashoonyn as glaraghyn,

Daniel 3:4 ပူးပေါင်းရင်းမြစ်များ

Esther 8:9

Eisht va scrudeyryn y ree er nyn eam ec y traa cheddin ’sy trass vee (ta shen yn vee Sivan) er y trass laa as feed jeh’n vee cheddin, as ve scruit (cordail rish ooilley ny va Mordecai er harey) gys ny Hewnyn, as gys ny kiannoortyn, as ny briwnyn, as fir-reill ny cheeraghyn, voish India gys Ethiopia, shey-feed as shiaght rheamyn, gys dagh rheam cordail rish y screeu oc hene, as gys dy chooilley phobble lurg nyn ghlare, as gys ny Hewnyn cordail rish y screeu, as y ghlare oc hene.

Isaiah 40:9

O Zion, ta coyrt lhiat naightyn mie, immee seose er y chronk ard; O Yerusalem, ta coyrt lhiat naightyn mie, trog seose dty choraa lesh niart; trog seose eh, ny bee aggle ort: abbyr rish ard-valjyn Yudah, Cur-jee my-ner yn Jee eu.

Isaiah 58:1

Yllee dy ard, ny lhig sheese dty ghoo; trog seose dty choraa myr trumpet, as soilshee da my phobble nyn ghrogh-yannoo, as da thie Yacob nyn beccaghyn.

Daniel 3:10

T’ou uss, O ree, er n’yannoo slattys, dy jean dy chooilley ghooinney chlinnys feiyr yn trumpet, feddan, claasagh, sackbut, psalteree, as dulcimer, as dy chooilley cheint dy chiaulleeaght, tuittym sheese, as ooashlaghey yn jalloo airh:

Daniel 3:3

Eisht va ny princeyn, ny kiannoortyn, as captanyn, ny briwnyn, ny fir-tashtee, ny fir-choyrlee, ny toshee-yioarree, as ooilley fir-reill ny rheamyn er nyn jaglym cooidjagh gys casherickey yn yalloo, va Nebuchadnezzar yn ree er hoiaghey seose: as hass ad kiongoyrt rish y jalloo va Nebuchadnezzar er hoiaghey seose.

Daniel 3:7

Shen-y-fa ec y traa cheddin, tra cheayll ooilley yn pobble feiyr yn trumpet, feddan, claasagh, sackbut, psalteree, as dy chooilley cheint dy chiaulleeaght; huitt ooilley yn pobble, ny ashoonyn, as ny glaraghyn sheese, as hug ad ooashley da’n jalloo airh, va Nebuchadnezzar yn ree er hoiaghey seose.

Daniel 4:1

Nebuchadnezzar y ree gys dy chooilley phobble, ashoon as glare er feaï-ny-cruinney, Shee dy row er ny vishaghey erriu.

Daniel 4:14

Dyllee eh dy ard, as shoh myr dooyrt eh, Lhieg y billey, as giare jeh e vanganyn, crie sheese e ghuillagyn, as skah e vess; lhig da’n maase cosney ersooyl veih fo yn scadoo echey, as ny eeanlee veih e vanglaneyn.

Daniel 6:25

Eisht scrieu Darius gys dy chooilley phobble, ashoonyn as glaraghyn, ta cummal feaï-ny-cruinney, Shee dy row er ny vishaghey erriu.

Hosea 5:11

Ta Ephraim broojit as brisht ayns briwnys: er-yn-oyr dy jimmee ad dy arryltagh lurg drogh choyrle.

Micah 6:16

Son ta slattyssyn Omri freilt, as ooilley cliaghtaghyn thie Ahab, as ta shiu gimmeeaght lurg ny coyrleyn ocsyn, dooys dy yannoo uss dty hraartys, as dty chummaltee son faghid; shen-y-fa nee shiu gymmyrkey oltooan my phobble.

Ashlish 5:9

As ghow ad arrane noa, gra, T’ou uss feeu dy ghoaill y lioar, as dy eaysley ny sealyn eck: son v’ou er ny choyrt dy baase, as t’ou er chionnaghey shin reesht gys Jee liorish dty uill, ass dy chooilley chynney, as glare, as pobble, as ashoon;