25 Dreggyr eh, as dooyrt eh, Cur-my-ner, ta mee fakin kiare deiney feayshlit, shooyl ayns mean yn aile, as cha vel assee erbee orroo, as ta cummey yn chiarroo er casley rish mac Yee.
Quoi t’er n’gholl seose gys niau, ny er jeet neose? quoi t’er haglym yn gheay ayns e ghurn? quoi t’er chiangley ny ushtaghyn lesh cagliagh? quoi t’er hickyraghey ooilley ardjyn y thallooin? cre’n ennym t’er, as cre’n ennym t’er e vac, my ta fys ayd?
Tra hed oo trooid ny ushtaghyn, bee’m mayrt; as trooid ny awinyn cha jean ad thooilley ort: tra t’ou shooyl trooid yn aile cha bee oo losht; chamoo nee yn lossey brishey magh ort.
Agh mannagh jean, lhig fys y ve ayd’s, O ree, nagh jean mayd ny jeeghyn ayd’s y hirveish, ny ooashley y choyrt da’n jalloo airh shen, t’ou uss er hoiaghey seose.
Eisht va ree Nebuchadnezzar as e happey veih, as dirree eh ayns siyr, as loayr eh, as dooyrt eh rish e ir-choyrlee, Nagh cheau shin three deiney kianlt ayns mean yn aile? Dansoor ad, as dooyrt ad rish y ree, S’feer shen, O ree.
Eisht loayr Nebuchadnezzar, as dooyrt eh, Bannit dy row Jee Shadrach, Meshach as Abed-nego, ta er choyrt e ainle, as er livrey e harvaantyn, hug nyn marrant er, as er chaghlaa goo yn ree, as er livrey seose nyn girp, nagh jinnagh ad shirveish, ny ooashlaghey jee erbee, er-lhimmey jeh’n Jee oc hene.
Eisht ghow yn ree boggey erskyn-towse jeh, as doardee eh daue dy hroggal Daniel ass yn ooig: eisht va Daniel troggit ass yn ooig, as cha row monney erbee dy assee er ny gheddyn er, er-yn-oyr dy ren eh credjal ayns e Yee.
As dreggyr yn ainle as dooyrt eh r’ee, Hig yn Spyrryd Noo neose ort, as bee pooar yn Er-syrjey er ny skeayley harryd: shen-y-fa bee yn sluight chasherick shen ver oo son y theihll, enmyssit Mac Yee.