Briwnyn 7:11 - Yn Vible Casherick 1775 1819

¹¹ As nee oo clashtyn cre t’ad dy ghra; as eisht vees dty laueyn er dyn niartaghey dy gholl sheese noi’n sheshaght-caggee shoh. Eisht hie eh sheese marish Phurah e harvaant gys y cheu-mooie jeh gard y cheshaght-chaggee.

Briwnyn 7:11 ပူးပေါင်းရင်းမြစ်များ

Genesis 24:14

As lhig da ve myr shen, yn ven aeg shen jir-ym r’ee, Lhig sheese dty haagh, ta mee guee ort, dy voddym giu; as dy jir ish, Iu, as ver-yms ushtey da dty chamelyn myrgeddin: lhig ish ve yn ven, t’ou er phointeil da dty harvaant Isaac; as liorish shen bee fys aym, dy vel oo er hoilshaghey kenjallys da my vainshtyr.

Ezra 6:22

As dreill ad feailley yn arran-millish shiaght laa lesh boggey, son va’n Chiarn er choyrt daue gennallys liorish chyndaa cree ree Assyria huc, dy niartaghey nyn laueyn ayns obbyr thie Yee, Jee Israel.

Nehemiah 6:9

Son v’ad ooilley smooinaghtyn dy chur shin fo aggle, gra, Bee ny laueyn oc er nyn lhaggaghey ’syn obbyr, nagh jed ad er nyn doshiaght. Nish, er-y-fa shen, O Yee, niartee my laueyn.

Exodus 13:18

Agh ren Jee yn pobble y leeideil mygeayrt, liorish raad faasagh yn Aarkey Jiarg. As hie cloan Israel magh ass cheer Egypt ayns order-caggee.

Ephesianee 3:16

Dy jinnagh eh coyrt diuish, cordail rish berchys e ghloyr, dy ve er nyn niartaghey lesh pooar liorish e Spyrryd ayns y dooinney er cheu-sthie;

Ephesianee 6:10

Er-jerrey, my vraaraghyn, bee-jee niartal ayns y Chiarn, as ayns pooar e hroshid.

Philippianee 4:13

Foddym dy chooilley nhee y yannoo trooid Creest ta dy my niartaghey.

Briwnyn 7:10

Agh my ta aggle ort dy gholl sheese, immee hene sheese gys y cheshaght-chaggee marish Phurah dty harvaant:

1 Samuel 14:12

As dreggyr deiney’n gharrison Jonathan as e armyder, as dooyrt ad, Tar-jee seose hooin, as jeeagh mayd red ennagh diu. As dooyrt Jonathan rish e armyder, Tar seose my yeï; son ta’n Chiarn er livrey ad gys laue Israel.

1 Samuel 23:16

As hie Jonathan mac Saul gys David ’sy cheyll, as ren eh e laue y niartaghey ayns Jee.

1 Samuel 26:6

Eisht dreggyr David as dooyrt eh rish Ahimelech yn Hittite, as Abishai mac Zeruiah braar Yoab, gra, Quoi hed sheese mârym’s gys camp Saul? As dooyrt Abishai, Hem’s sheese mayrt.