Briwnyn 18:7 - Yn Vible Casherick 1775 1819

⁷ Eisht hie ny queig deiney roue, as haink ad gys Laish, as hug ad tastey da ny cummaltee v’ayn, nagh row ad ayns aggle erbee roish noidyn, agh baghey ayns shee as sauchys, myr ny Zidonianee; as nagh row fer-oik ’sy cheer, dy choyrt ad gys nearey, son nhee erbee; as dy row ad foddey veih ny Zidonianee, as nagh row dellal oc rish dooinney erbee.

Briwnyn 18:7 ပူးပေါင်းရင်းမြစ်များ

1 Reeaghyn 1:6

As cha row e ayr er ve jymmoosagh rish ec traa erbee, ayns gra, Cre’n-fa t’ou er n’yannoo myr shoh? as v’eh myrgeddin ny ghooinney feer stoamey; as rug e voir eh lurg Absalom.

1 Reeaghyn 16:31

As haink eh gy-kione, myr nagh beagh eh agh red fardalagh dasyn dy hooyl ayns peccaghyn Yeroboam mac Nebat, dy ghow eh son ben Jezebel inneen Ethbaal ree ny Zidonianee, as hie eh as hirveish eh Baal, as hug eh ooashley da.

1 Recortyssyn 4:40

As hooar ad pastyr menoyr as mie, as va’n cheer lhean, as sauchey, as sheeoil: son va cloan Ham er vaghey ayns shen ry-foddey dy hraa.

Jeremiah 49:31

Trog-jee erriu, seose-jee gys yn ashoon berchagh, ta cummal fegooish imnea, ta’n Chiarn dy ghra, nagh vel oc giattyn ny boltyn, ta cummal orroo hene.

Romanee 13:3

Son cha vel fir-reill oyr aggle da obbraghyn mie, agh da drogh obbraghyn. Nailt eisht ve gyn aggle jeh’n phooar? jean shen ta mie, as yiow moylley er y hon:

Joshua 19:47

As va cagliagh cloan Dan ro choon er nyn son: shen-y-fa hie cloan Dan seose dy chaggey noi Leshem, as ghow ad eh, as woaill ad eh lesh foyr y chliwe, as ghow ad possession jeh, as chum ad ayn, as Leshem denmys ad Dan, lurg ennym Dan nyn shenn-ayr.

1 Peddyr 2:14

Ny gys kiannoortyn, myr dauesyn t’er nyn goyrt ayns pooar fo, son kerraghey drogh-yantee, as son y moylley ocsyn ta jannoo dy mie.

Ashlish 18:7

Corrym rish y stayd mooaralagh t’ee er ghoaill urree, as er vaghey ayns rouanys, yn corrymid cheddin dy cherraghey as dy heaghyn cur-jee urree: son t’ee gra ayns e cree, Ta mee my hoie my ven-reïn, as cha nee ben-treoghe mee, as cha jig trimshey erbee my raad.

Briwnyn 18:29

As denmys ad yn ard-valley Dan, lurg ennym Dan nyn ayr, va mac Israel: agh va ennym yn ard-valley roish shen Laish.

Briwnyn 18:6

As dooyrt y saggyrt roo, Immee-jee ayns shee: bee’n Chiarn nyn leeideilagh ’sy raad ta shiu goll.

Briwnyn 18:8

As hyndaa ad gys nyn mraaraghyn ec Zorah as Eshtaol; as dooyrt ny braaraghyn oc roo, Cre t’eu dy ghra?

1 Samuel 3:13

Son ta mee er n’insh da dy goym kerraghey er e hie, gys earishyn foddey, son y peccah nagh vel gyn-yss da; er-yn-oyr dy ren e vec ad-hene mollaghtagh, as nagh ren eh smaghtaghey ad.