Briwnyn 17:4 - Yn Vible Casherick 1775 1819

⁴ Agh cha goghe eh yn argid veih e voir, as ghow e voir daa cheead shekel jeh’n argid, as hug ee ad da’n obbree, ren jalloo grainnit jeh, as jalloo lheït: as v’ad ayns thie Micah.

Briwnyn 17:4 ပူးပေါင်းရင်းမြစ်များ

Isaiah 30:22

Nee shiu myrgeddin coontey myr neu-ghlen coodagh dty yallooyn grainnit dy argid, as coamrey dty yallooyn lheït dy airh: nee oo ad y cheau ersooyl myr aanrit neu-ghlen; jir oo rish, Fow ass my enish.

Isaiah 44:13

Ta’n seyir sheeyney magh e rule, t’eh markal magh eh lesh line, t’eh kiartaghey eh lesh planeyn, as goaill towshan lesh y chombaase, as jannoo eh ayns cummey dooinney, cordail rish stoamid dooinney; dy hoiaghey seose eh ayns e hie.

Habakkuk 2:18

Cre’n foays t’ayns y jalloo grainnit, dy vel yn obbree er ghrainney eh; yn jalloo roit, as y fer-ynsee dy vreagyn, dy vel yn obbree treishteil ayns ny jallooyn balloo, obbyr e laueyn hene?

Deuteronomy 27:15

Cursit ta’n dooinney, ta jannoo jalloo erbee grainnit ny roit, ny red feohdoil da’n Chiarn, jeant liorish laueyn yn obbree, dy choyrt eh ayns ynnyd follit: as nee ooilley’n pobble gansoor, as gra, Amen.

Briwnyn 17:3

As tra v’eh er livrey yn un cheead jeig shekel dy argid da e voir, dooyrt e voir, Va mee er chasherickey yn slane argid shen gys y Chiarn, veih my laue, gour my vac, dy yannoo jalloo grainnit, as jalloo lheït: nish er-y-fa shen, ta mee dy choyrt dhyt eh reesht.

Briwnyn 17:5

As va ec Micah cabbal ayns e hie, as ren eh ephod, as teraphim, as ren eh fer jeh e vec y chasherickey, dy ve ny haggyrt da.

Briwnyn 18:17

As hie ny queig deiney scrialtee yn cheer seose, as haink ad stiagh, as ghow ad yn jalloo grainnit, as yn ephod, as yn teraphim, as yn jalloo lheït: as hass y saggyrt ’sy yiat, marish ny shey cheead deiney-caggee armit.