Briwnyn 10:6 - Yn Vible Casherick 1775 1819

⁶ As ren cloan Israel reesht olk ayns shilley’n Chiarn, as hirveish ad Baalim as Ashtaroth, as jeeghyn Syria, as jeeghyn Zidon, as jeeghyn Voab, as jeeghyn cloan Ammon, as jeeghyn ny Philistinee, as hreig ad y Chiarn, as cha hirveish ad eh.

Briwnyn 10:6 ပူးပေါင်းရင်းမြစ်များ

1 Reeaghyn 11:33

Er-yn-oyr dy vel ad er m’y hreigeil, as er chur ooashley da Ashtoreth, jee ny Zidonianee, Chemosh jee ny Moabiteyn, as Milcom jee cloan Ammon; as nagh vel ad er n’immeeaght ayns my raaidyn’s, dy yannoo shen ny ta cairagh ayns my hilley, as dy reayll my lattyssyn as my vriwnyssyn, myr ren David e ayr.

1 Reeaghyn 11:5

Son hie Solomon geiyrt er Ashtoreth jalloo ny Zidonianee, as geiyrt er Milcom jalloo dwoaiagh ny Ammoniteyn.

1 Reeaghyn 11:7

Eisht hrog Solomon ynnyd ard son Chemosh, jalloo dwoaiagh Voab, ayns y chronk ta kiongoyrt rish Jerusalem; as son Molech, jalloo dwoaiagh cloan Ammon.

1 Reeaghyn 16:31

As haink eh gy-kione, myr nagh beagh eh agh red fardalagh dasyn dy hooyl ayns peccaghyn Yeroboam mac Nebat, dy ghow eh son ben Jezebel inneen Ethbaal ree ny Zidonianee, as hie eh as hirveish eh Baal, as hug eh ooashley da.

2 Reeaghyn 17:16

As hreig ad ooilley annaghyn y Chiarn y Jee oc, as ren ad daue hene jallooyn grainnit, eer daa lheiy, as hoie ad keyll, as hug ad ooashley da ooilley rollageyn yn aer, as hirveish ad Baal.

2 Reeaghyn 23:13

As ny ard-ynnydyn va roïe ayns Jerusalem, va er laue yesh slieau ny oliveyn, va Solomon ree Israel er hroggal son Ashtoreth jalloo ny Zidonianee, as son Chemosh jalloo ny Moabiteyn, as son Milcom jalloo cloan Ammon, ren y ree an-chasherick.

2 Recortyssyn 28:23

Son heb eh oural gys jeeghyn Damascus, e noidyn: as dooyrt eh, Er-yn-oyr, dy vel jeeghyn Syria er chooney lesh ny reeaghyn ocsyn, shen-y-fa neem’s ouralley daue, dy vod ad cooney lhiam’s: agh hug ad shoh yn drogh-yerrey er hene, as er ooilley Israel.

Psalmyn 106:36

Ayns wheesh as dy dug ad ooashley da ny jallooyn oc, shoh ren chyndaa gys y toyrt-mow oc hene: dy jarroo, heb ad ny mec as ny inneenyn oc gys jouyil;

Isaiah 23:4

Gow nearey, O Zidon; son ta’n aarkey er loayrt, eer niart yn aarkey, gra, Cha vel mee er-troailt, ny gymmyrkey cloan, chamoo ta mee boandyrys deiney aegey, ny troggal seose moidynyn.

Jeremiah 2:13

Son ta my phobble er n’yannoo daa olk; t’ad er hreigeil mish, farrane ny ushtaghyn bio, as er chleiy daue hene cisternyn, cisternyn brisht, nagh gum veg yn ushtey.

Jeremiah 2:20

Son ’sy chenn earish ren mish dty whing y vrishey, as scoltey dty gheulaghyn; as dooyrt oo, Cha jean-ym olk y yannoo arragh; ec y traa cheddin er dy chooilley chronk ard, as fo dy chooilley villey glass, v’ou rouail mygeayrt, geiyrt er maarderys.

Jeremiah 32:23

As haink ad stiagh ayn, as ve oc ayns nyn gummal; agh cha dug ad biallys da dty choraa, chamoo jimmee ad ayns dty leigh; cha vel ad er n’yannoo veg jeh ooilley ny t’ou er harey daue dy yannoo; shen-y-fa t’ou er choyrt orroo ooilley’n kerraghey trome shoh.

Ezekiel 27:16

Va Syria dty varchan son ymmodee cooid dty obbyr-lauee hene; ren ad dellal ayns dty vargaghyn lesh emeraldyn, gorrym-jiarg, as obbyr laatshagh, as aanrit keyl, as coral as agate.

Deuteronomy 13:6

My nee dty vraar mac dty vayrey, ny dty vac, ny dty inneen, ny ben dty oghrish, ny dty charrey, ta myr dty annym hene, miolaghey oo dy follit, gra, Lhig dooin goll, as shirveish jeeghyn joarree (nagh row enney edyr ayd hene, ny ec dty ayraghyn orroo)

Deuteronomy 13:8

Cha jed oo mârish, ny geaishtagh rish; chamoo vees chymmey ec dty hooill er, chamoo nee oo sparail eh, chamoo nee oo keiltyn eh:

Deuteronomy 31:16

As dooyrt y Chiarn rish Moses, Cur-my-ner, nee uss cadley marish dty ayraghyn, as nee’n pobble shoh girree magh, as geiyrt er maarderys [spyrrydoil] rish jeeghyn joarree y cheer, raad t’ad goll dy vaghey, as nee ad m’y hreigeil, as brishey my chonaant, ta mee er n’yannoo roo.

Deuteronomy 31:17

Eisht bee my chorree er ny vrasnaghey nyn ’oï ’sy laa shen, as neem’s ad y hreigeil, as my eddin y hyndaa voue, as bee ad er nyn stroie, as nee ymmodee uilk, as dourinyn tuittym orroo, ayns wheesh as dy jir ad ec y traa shen, Nagh vel ny huilk shoh er jeet orrin, er-yn-oyr nagh vel y Chiarn nyn Yee ny mast’ ain?

Deuteronomy 32:15

Agh daase Jeshurun roauyr, as ren eh brebbal: t’ou uss er n’aase roauyr, as t’ou er n’ghoaill thummyd, t’ou coodit lesh saill; eisht hreig eh Jee ren eh y chroo, as hoie eh beg jeh creg e haualtys.

Joshua 13:31

As va lieh Ghilead, as Ashtaroth, as Edrei, baljyn reeriaght Og ayns Bashan, er ny choyrt da cloan Vachir mac Vanasseh, ta shen, da’n derrey lieh jeh cloan Vachir rere nyn gynneeyn.

Briwnyn 10:5

As hooar Jair baase, as v’eh oanluckit ayns Camon.

Briwnyn 11:24

Nagh jean uss freayll possession jeh shen ny ta Chemosh dty yee dy choyrt dhyt? Er yn aght cheddin quoi-erbee nee’n Chiarn y Jee ain geiyrt magh roïnyn, ad shen nee mayd y ghoaill dooin hene.

Briwnyn 13:1

As ren cloan Israel reesht shen ny va olk ayns shilley’n Chiarn; as ren y Chiarn ad y livrey gys laue ny Philistinee da-eed bleïn.

Briwnyn 16:23

Eisht va chiarnyn ny Philistinee er nyn jaglym cooidjagh dy hebbal oural-ooasle gys Dagon yn jee oc, as dy ghoaill boggey: son dooyrt ad, Ta’n Jee ain er livrey Samson nyn noid gys nyn laue.

Briwnyn 3:7

As ren cloan Israel olk ayns shilley’n Chiarn, as yarrood ad yn Chiarn nyn Yee, as hirveish ad Baalim as Ashtaroth.

Briwnyn 4:1

As reesht ren cloan Israel olk ayns shilley’n Chiarn lurg baase Ehud.

Briwnyn 6:1

As ren cloan Israel olk reesht ayns shilley yn Chiarn; as livrey yn Chiarn ad gys laue Vidian shiaght bleeaney.

Briwnyn 8:33

As haink eh gy-kione, lurg baase Ghideon, dy ren cloan Israel chyndaa dy lhiattee, as hie ad er-shaghryn geiyrt er Baalim; as ghow ad Baal-berith dy ve yn jee oc.

1 Samuel 5:2

Tra ghow ny Philistinee arg Yee, hug ad lhieu eh stiagh ayns chiamble Dagon, as hoie ad eh liorish Dagon.