Briwnyn 10:16 - Yn Vible Casherick 1775 1819

¹⁶ As hug ad ersooyl ny jeeghyn joarree veih nyn mast’, as hirveish ad yn Chiarn; as va e chree er ny veiyghaghey son seaghyn Israel.

Briwnyn 10:16 ပူးပေါင်းရင်းမြစ်များ

Genesis 6:6

As ghow yn Chiarn arrys dy row eh er chroo dooinney er y thalloo, as v’eh seaghnit ayns e chree.

2 Reeaghyn 13:23

As va’n Chiarn graysoil daue, as chymmoil orroo, er coontey e chonaant rish Abraham, Isaac, as Jacob, as cha jinnagh eh ad y stroie, chamoo ad y scarrey foast veih e enish.

2 Recortyssyn 15:8

As tra cheayll Asa ny goan shoh, as phadeyrys Obed y phadeyr, ghow eh cree, as hug eh ersooyl ny jallooyn eajee ass ooilley cheer Yudah as Venjamin, as veih ny ard-valjyn v’eh er ghoaill veih cronk Ephraim, as ren eh altar y Chiarn y choamrey ass-y-noa, va roish porch y Chiarn.

2 Recortyssyn 33:15

As ghow eh ersooyl ny jeeghyn joarree, as y jalloo ass thie’n Chiarn, as ooilley ny altaryn v’eh er hroggal ayns cronk thie’n Chiarn, as ayns Jerusalem, as hilg eh ad magh ass yn ard-valley.

2 Recortyssyn 7:14

My nee my phobble ta enmyssit orrym, ad-hene y injillaghey, as padjer y yannoo, as shirrey my eddin, as chyndaa veih nyn ghrogh raaidyn: eisht ver-ym clashtyn veih niau, as neem’s yn peccah oc y leih, as slaanee-ym yn cheer.

Psalmyn 73:21

Cha ommijagh shen va mee, as cha mee-hushtagh: dy jarroo myr baagh kiongoyrt rhyt.

Isaiah 63:9

Ayns yn seaghyn oc va eshyn seaghnit, as ren ainle yn enish echeysyn adsyn y hauail: ayns e ghraih as ayns e erreeish ren eh ad y livrey: as hrog eh ad, as ren eh ad y ymmyrkey ooilley laghyn y chenn earish.

Jeremiah 31:20

Vel Ephraim my vac deyr? vel eh my lhiannoo ennoil? son neayr’s loayr mee n’oï, ta mee dy jeean cooinaghtyn er dy kinjagh; shen-y-fa ta my chree seaghnit er e hon: son shickyrys bee myghin aym er, ta’n Chiarn dy ghra.

Hosea 11:8

Kys oddym scarrey rhyt, O Ephraim? kys oddym sauail oo, O Israel? kys nee’m oo myr Admah, as soiaghey jeed myr Zeboim? ta my chree er ny hyndaa cheu-sthie jee’m, ta my vyghinyn er ny ghreesaghey dy cheilley.

Hosea 14:8

Nee Ephraim gra, Cre t’aym dy yannoo arragh rish jallooyn? cheayll mee eh, as ghow mee tastey jeh: ta mee myr billey-juys glass, voym’s ta dty vess ry-gheddyn.

Micah 7:18

Quoi ta ny Yee casley rhyt’s, ta leih mee-chairys, as maih’ghey yn shaghrynys ocsyn ta er-mayrn ayns e eiraght? cha vel eh freayll e chorree son dy bragh, er-yn-oyr dy vel eh goaill taitnys ayns myghin.

Noo Luke 15:20

As hrog eh er, as haink eh gys e ayr. Agh tra v’eh foast foddey veih, honnick e ayr eh, as va chymmey echey er, as roie eh, as ghow eh eh ayns e roihaghyn, as phaag eh eh.

Noo Luke 19:41

As tra v’eh er jeet er-gerrey, yeeagh eh er yn ard-valley, as cheayn eh harrish.

Noo Ean 11:34

As dooyrt eh, C’raad ta shiu er choyrt eh? Dooyrt adsyn rish, Hiarn, tar as hee oo.

Ephesianee 4:32

As bee-jee dooie yn derrey yeh da’n jeh elley, meiygh-chreeagh, leih da y cheilley dy jarroo myr ta Jee son graih Chreest er leih diuish.

Deuteronomy 32:36

Son nee’n Chiarn briwnys e phobble, as bee chymmey echey er e harvaantyn; tra hee eh dy vel y phooar oc er n’immeeaght, as nagh vel veg y chooney faagit nyn gour.

Hebrewnee 3:10

Shen-y-fa va mee corree rish y cheeloghe shoh, as dooyrt mee. T’ad dy kinjagh goll er-shaghryn ayns nyn gree; as cha vel enney er ve oc er my raaidyn.

Hebrewnee 4:15

Son cha vel ain ard-saggyrt nagh vel ennaghtyn chymmoil echey jeh nyn annooinidyn; agh v’eh er dy chooilley aght er ny phrowal lesh seaghyn myr ta shin hene, foast fegooish peccah.

Joshua 24:23

Nish er-y-fa shen, (as eshyn,) cur-jee ersooyl ny jeeghyn joarree ta ny mast ’eu, as lhig da ny creeaghyn eu lhiantyn gys y Chiarn Jee Israel.

Briwnyn 2:18

As tra va’n Chiarn er hroggal seose briwnyn daue, eisht va’n Chiarn marish y vriw shen, as ren eh ad y livrey ass laue nyn noidyn ooilley laghyn y vriw: (son ghow’n Chiarn chymmey jeh ny osnaghyn oc, kyndagh roosyn va seaghney as jannoo tranlaase orroo.)

1 Samuel 12:10

As deïe ad gys y Chiarn, as dooyrt ad, Ta shin er n’yannoo peccah, er-yn-oyr dy vel shin er hreigeil y Chiarn, as er hirveish Baalim as Ashtaroth: agh nish livrey shin veih laueyn nyn noidyn, as nee mayd uss y hirveish.

1 Samuel 7:3

As loayr Samuel rish ooilley thie Israel, gra, My ta shiu chyndaa gys y Chiarn lesh ooilley nyn gree, eisht cur-jee ersooyl ny jeeghyn joarree as Ashtaroth veih ny mast’ eu, as soie-jee nyn greeaghyn dy hirveish y Chiarn ny-lomarcan: as nee eh shiu y livrey ass laue ny Philistinee.

1 Samuel 7:4

Eisht hug cloan Israel ersooyl voue Baalim as Ashtaroth, as ren ad y Chiarn ny-lomarcan y hirveish.