2 Samuel 24:22 - Yn Vible Casherick 1775 1819

²² As dooyrt Araunah rish David, Lhig da my hiarn y ree goaill as chebbal lurg e aigney-mie hene: cur-my-ner, ta dew ayns shoh son oural-losht, as jeshaghtyn-bwoallee, as greinyn elley ny dew son fuygh.

2 Samuel 24:22 ပူးပေါင်းရင်းမြစ်များ

Genesis 23:11

Cha nee myr shen, my Hiarn; eaisht rhym: yn magher ta mee coyrt dhyt, as yn ooig t’ayn, ta mee coyrt dhyt; fenish mec my phobble, ta mee dy choyrt dhyt eh: jean dty varroo y oanluckey.

1 Reeaghyn 19:21

As hie eh roish back voish, as ghow eh cubbyl jeh ny dew, as varr eh ad, as ren eh yn eill oc y aarlaghey lesh ny greinyn shesheree as hirveish eh er y pobble, as ren ad gee; eisht dirree eh. As deiyr eh er Elijah, as v’eh e hirveishagh.

1 Recortyssyn 21:22

Eisht dooyrt David rish Ornan, Cur dou grunt y laare-vooie shoh, dy voddym altar y hroggal er, gys y Chiarn: ver oo dou eh ec y slane price, dy vod y chramp v’er ny lhiettal veih’n pobble.

Briwnyn 6:26

As trog altar gys y Chiarn dty Yee er mullagh yn chreg shoh, lurg my oardagh, as gow yn nah ghow, as cheb oural-losht lesh fuygh ny biljyn nee oo y yiarey sheese.

1 Samuel 6:14

As haink y chart stiagh ayns magher Yoshua yn Beth-shemite, as hass eh ayns shen, raad va clagh vooar: as vrish ad fuygh yn chart, as heb ad ny booaghyn son oural-losht gys y Chiarn: