2 Samuel 24:16 - Yn Vible Casherick 1775 1819

¹⁶ As tra va’n ainle er heeyney magh e laue er Jerusalem dy stroie eh, ghow’n Chiarn chymmey jeh nyn stayd treih, as dooyrt eh rish yn ainle va stroie’n pobble, S’lioar eh; lhig sheese nish dty laue. As va ainle y Chiarn liorish laare-vooie Araunah yn Jebusite.

2 Samuel 24:16 ပူးပေါင်းရင်းမြစ်များ

Genesis 10:16

As y Jebusite, as yn Amorite, as yn Girgasite,

Genesis 6:6

As ghow yn Chiarn arrys dy row eh er chroo dooinney er y thalloo, as v’eh seaghnit ayns e chree.

2 Samuel 24:18

As haink Gad er y laa shen gys David, as dooyrt eh rish, Immee seose, trog altar da’n Chiarn ayns laare-vooie Araunah yn Jebusite.

2 Samuel 5:8

As dooyrt David er y laa shen, Quoi-erbee chosnys stiagh er ny gutteryn-ushtey, as woaillys ny Jebusiteyn, as ny baccee, as ny doail, ta dwoaie oc er annym Ghavid, bee eshyn ny ard-chaptan. Shen-y-fa te oc myr raa, Cre dooyrt ny doail as ny baccee rish [David]? Cha vow eh stiagh ’sy voayl shoh.

1 Reeaghyn 19:4

Agh hie eh-hene jurnah laa gys yn aasagh, as haink eh, as hoie eh sheese fo billey-juniper: as ren eh aghin er e hon hene dy voghe eh baase; as dooyrt eh, S’lioar shoh; nish, O Hiarn, gow ersooyl my vioys; son cha vel mish ny share na my ayraghyn.

2 Reeaghyn 19:35

As haink eh gy-kione ayns yn oie cheddin, dy jagh ainle y Chiarn magh, as woaill eh ayns camp ny Assyrianee nuy-feed as queig thousaneyn: as tra dirree ad ’sy voghrey, cur-my-ner, v’ad shoh ooilley nyn girp marroo.

1 Recortyssyn 1:14

Yn Jebusite myrgeddin, as yn Amorite, as y Girgashite,

2 Recortyssyn 3:1

Eisht ren Solomon toshiaght dy hroggal thie’n Chiarn ayns Jerusalem er cronk Moriah, raad va’n Chiarn er hoilshaghey eh-hene da David e ayr, ’sy voayl kiarit liorish David ayns laare-arroo Ornan yn Jebusite.

2 Recortyssyn 32:21

As hug y Chiarn magh ainle ren stroie ooilley ny deiney niartal caggee, as ny leeideilee as ny captanyn, ayns camp ree Assyria: myr shen hyndaa eh reesht lesh nearey eddin gys e heer hene. As tra v’eh er jeet stiagh ayns thie e Yee, ren adsyn haink magh ass e veeghyn, y varroo eh ayns shen lesh y chliwe.

Psalmyn 135:14

Son gowee yn Chiarn cooilleeney son e phobble: as bee eh graysoil da e harvaantyn.

Psalmyn 35:6

Bee’n raad oc dorraghey as shliawin: as nee ainle y Chiarn ad y imman.

Psalmyn 78:38

Agh v’eh cha myghinagh shen dy leih eh daue nyn voiljyn: as cha ren eh ad y stroie.

Psalmyn 90:13

Chyndaa uss reesht, O Hiarn, ec y jerrey: as bee graysoil da dty harvaantyn.

Exodus 12:13

As bee’n uill diuish son cowrey er ny thieyn raad ta shiu: as tra hee-yms yn uill, hem shaghey, as cha bee’n chramp erriuish dy stroie shiu, tra nee’m bwoalley cheer Egypt.

Exodus 12:23

Son hed y Chiarn trooid dy woalley ny Egyptianee; as tra hee eh yn uill er yn ard-dorrys, as er y daa essyn, nee’n Chiarn goll shaghey yn dorrys shen, as cha jean eh surranse yn stroider dy heet stiagh ayns ny thieyn euish, dy nyn mwoalley.

Exodus 32:14

As va’n Chiarn er ny veiyghey veih’n olk, v’eh kiarit dy yannoo rish e phobble.

Exodus 9:28

Guee-jee gys y Chiarn, (son s’lioar eh,) nagh bee arragh dy haarneeyn agglagh, as sniaghtey-garroo ayn; as neem’s y raad y lhiggey diu, as cha n’uirree shiu ny sodjey.

Isaiah 27:8

Ayns towse, tra t’ou dy chur magh eh, nee oo pleadeil rish: t’eh lhiettal e gheay rastagh rish traa yn gheay-niar.

Isaiah 57:16

Son cha beem’s dy kinjagh streeu, chamoo vee’m dy kinjagh corree: son yinnagh yn spyrryd failleil kiongoyrt rhym, as ny anmeenyn ta mee er chroo.

Jeremiah 26:19

Dug Hezekiah ree Yudah as ooilley Judah eshyn gy-baase? nagh ren eh aggle y ghoaill roish y Chiarn, as guee gys y Chiarn, as ren y Chiarn yn vriwnys y hyndaa v’eh er n’ockley magh nyn ’oï? Myr shoh oddagh shinyn v’er dayrn briwnys trome er ny anmeenyn ain hene.

Jeremiah 42:10

My uirrys shiu ’sy cheer shoh, eisht nee’m shiu y hroggal, as cha nee y lhieggal; as nee’m shiu y hoiaghey, as cha nee y astyrt: son s’mooar lhiam yn olk ta mee hannah er choyrt erriu.

Amos 7:3

Er shoh va’n Chiarn myghinagh; Cha bee eh myr shen, dooyrt y Chiarn.

Amos 7:6

Er shoh va’n Chiarn reesht myghinagh. Chamoo hig shoh erriu, ta’n Chiarn Jee dy ghra.

Habakkuk 3:2

O Hiarn, ta mee er chlashtyn dty choraa, as va aggle orrym: O Hiarn, jean dty obbyr y aa-vioghey ayns mean ny bleeantyn, jean soilshaghey; ayns dty yymmoose smooinee er myghin.

Zechariah 9:7

As goym ersooyl yn uill echey ass e veeal, as e eajeeys veih eddyr e eeacklyn: agh eshyn t’er-mayrn, eer eshyn vees lesh y Jee ain, as bee eh myr kiannoort ayns Judah, as bee Ekron myr y Jebusite.

Noo Mark 14:41

As haink eh yn trass cheayrt, as dooyrt eh roo, Caddil-jee nish, as gow-jee nyn vea: s’lioar eh, ta’n oor er jeet; cur-my-ner ta Mac y dooinney er ny vrah gys laueyn peccee.

Jannoo 12:23

As chelleeragh woaill ainle y Chiarn eh, er-yn-oyr nagh dug eh yn gloyr da Jee: as v’eh eeit ec ny crooagyn, as shen myr hooar eh baase.

1 Corinthianee 10:10

Chamoo jean shiuish tallagh, myr ren paart jeusyn neesht tallagh, as v’ad er nyn stroie liorish y stroider.

2 Corinthianee 2:6

S’lioar da’n dooinney shen ta’n kerraghey shoh, hie er coyrt er kiongoyrt rish ymmodee.

Joshua 15:63

Agh er son ny Jebusiteyn, cummaltee Yerusalem, cha yarg cloan Israel ad y eiyrt magh: agh ta ny Jebusiteyn cummal marish cloan Yudah ec Jerusalem, gys y laa jiu.

Briwnyn 1:21

Agh cha row cloan Venjamin dy slane er n’eiyrt magh ny Jebusiteyn va cummal ayns Jerusalem; agh ta ny Jebusiteyn cummal mastey cloan Venjamin ayns Jerusalem gys y laa jiu.

Briwnyn 19:11

As tra v’ad liorish Jebus, va’n laa foddey baarit; as dooyrt yn charvaant rish e vainshtyr, Tar, ta mee guee ort, as lhig dooin chyndaa stiagh gys yn ard-valley shoh jeh ny Jebusiteyn, as goaill aaght ayn.

1 Samuel 15:11

Ta mee chaghlaa my aigney noi Saul dy vel mee er hoiaghey seose eh dy ve ny ree: son t’eh er choyrt cooyl rhym, as cha vel eh er chooilleeney my harey. As va shoh trimshey mooar da Samuel; as deïe eh gys y Chiarn fud-ny-hoie.