2 Samuel 12:13 - Yn Vible Casherick 1775 1819

¹³ As dooyrt David rish Nathan, Ta mee er n’yannoo peccah noi’n Chiarn. As dooyrt Nathan rish David, Ta’n Chiarn myrgeddin er choyrt ersooyl dty pheccah; cha vow baase.

2 Samuel 12:13 ပူးပေါင်းရင်းမြစ်များ

Genesis 39:9

Cha vel unnane ny syrjey ’sy thie shoh na mish: chamoo t’eh er reayll nhee erbee voym’s, agh uss, er-yn-oyr dy nee oo yn ven echey: kys eisht oddym’s cur rish yn aggair vooar shoh, as peccah ’yannoo noi Jee?

2 Samuel 24:10

As woaill cree David eh lurg da v’er n’ghoaill earroo’n pobble: as dooyrt David rish y Chiarn, Ta mee kyndagh jeh peccah trome liorish shen ta mee er n’yannoo: as nish, ta mee guee ort, O Hiarn, gow ersooyl loght dty harvaant; son s’mooar ta my pheccah.

2 Samuel 24:17

As loayr David rish y Chiarn, tra honnick eh yn ainle va stroie y pobble, as dooyrt eh, Cur-my-ner, mish t’er n’yannoo peccah, as s’mooar ta my loght: agh ny kirree shoh, cre t’adsyn er n’yannoo? Lhig da dty laue, ta mee guee ort, ve m’oï’s as noi thie m’ayrey.

1 Reeaghyn 13:4

As haink eh gy-kione, tra cheayll ree Jeroboam raa yn dooinney dy Yee, v’eh er n’ockley magh noi’n altar ayns Beth-el, dy heeyn eh magh e laue veih’n altar, gra, Gow-jee greme er. As va e laue, heeyn eh magh n’oï, shirkit seose, myr shen nagh voddagh eh tayrn eh stiagh huggey reesht.

1 Reeaghyn 21:20

As dooyrt Ahab rish Elijah, Vel oo er my gheddyn magh, O my noid? As dreggyr eh, Ta mee er gheddyn magh oo; er-yn-oyr dy vel oo er chreck oo-hene dy obbraghey olk ayns shilley’n Chiarn.

1 Reeaghyn 22:8

As dooyrt ree Israel rish Jehoshaphat, Ta ayn foast un dooinney, (Micaiah mac Imlah,) liorishyn foddee mayd briaght jeh’n Chiarn; agh ta dwoaie aym er; son cha vel eh dy bragh phadeyrys mie my-mychione’s, agh olk. As dooyrt Jehoshaphat, Ny lhig da’n ree shen y ghra.

2 Reeaghyn 1:9

Eisht hug y ree huggey captan lieh-cheead lesh e heshaght. As hie ad seose huggey; (as cur-my-ner v’eh ny hoie er mullagh cronk;) as loayr eh rish, Uss ghooinney dy Yee, ta’n ree er ghra, Tar neose.

1 Recortyssyn 21:8

As dooyrt David rish Jee, S’mooar ta my loght, son shen ta mee er n’yannoo: agh nish guee-ym ort, gow ersooyl peccah dty harvaant, son ta mee er n’yannoo dy feer neu-hushtagh.

2 Recortyssyn 16:10

Eisht va Asa jymmoosagh rish y phadeyr, as hug eh eh ayns pryssoon; son v’eh jiarg-chorree rish, son ny dooyrt eh. As ren Asa tranlaase er shiartanse jeh’n pobble ec y traa cheddin.

2 Recortyssyn 25:16

As haink eh gy-kione myr v’eh taggloo rish, dy dooyrt y ree rish, Nee uss fer jeh fir-choyrlee yn ree? bee dty host, nonney ver-ym gy-baase oo. Eisht cha jagh y phadeyr ny-sodjey lesh, agh dooyrt eh, Ta fys aym dy vel Jee er chiarail dy stroie oo, er-yn-oyr dy vel oo er n’yannoo shoh, as nagh vel oo er n’eaishtagh rish my choyrle’s.

Lioar Yob 33:27

T’eh jeeaghyn er deiney; as my jir fer erbee, Ta mee er n’yannoo peccah, as er chassey cairys, as cre-woad share mee?

Psalmyn 103:12

Jeeagh cre cha lhean as ta’n shiar veih’n sheear: choud cheddin t’eh er hoiaghey nyn beccaghyn voïn.

Psalmyn 51:16

Son cha vel oo shirrey oural, nonney yinnin dhyt eh: cha vel taitnys ayd ayns chebballyn-losht.

Psalmyn 51:4

Dt’oï’s dty-lomarcan ta mee er n’yannoo peccah, as er chur rish yn olk shoh ayns dty hilley: dy voddagh oo v’er dty heyrey ayns dty raa, as ynrick tra t’ou briwnys.

Psalmyn 51:6

Agh cur-my-ner, t’ou shirrey firrinys ayns ny ayrnyn er cheu-sthie: as ver oo orrym toiggal creenaght dy follit.

Exodus 9:27

As hug Pharaoh fys er Moses as Aaron, as dooyrt eh roo, Ta mee er n’yannoo peccah yn cheayrt shoh: ta’n Chiarn cairagh, agh ta mish as my phobble mee-chrauee.

Raaghyn Creeney 25:12

Myr cliegeen airhey, as jewel soit ayns airh ghlen, myr shen ta coyrleyder creeney gys y chleaysh beasagh.

Raaghyn Creeney 28:13

Eh ta coodaghey e pheccaghyn cha jean eh bishaghey: agh quoi-erbee ghoys roo, as treigys ad, yiow eh myghin.

Isaiah 38:17

Cur-my-ner, ayns ynnyd shee, va mee ayns diunid sproght; agh t’ou uss, O Hiarn, jeh dty ghraih er hayrn my annym veih’n ooig dy loauid: son t’ou er hilgey ooilley my pheccaghyn er cheu dty chooylloo.

Isaiah 43:24

Cha nee my chour’s t’ou er chionnaghey cuirtlagh villish lesh dty argid, chamoo dy nee mish t’ou er lhieeney lesh meeaylys dty ourallyn; agh t’ou er my hirveish lesh dty pheccaghyn, as er my laadey lesh dty ghrogh-yannoo.

Isaiah 44:22

Ta mee er gholley dty ghrogh-yannoo myr bodjal dorraghey, as dty pheccaghyn myr kay: chyndaa hym’s; son mish t’er dty livrey.

Dobberan 3:32

Agh ga dy vel eh seaghney, foast nee eh chymmey ’ghoaill cordail rish earroo e vyghinyn.

Leviticus 20:10

As y dooinney ta foiljagh jeh brishey poosey rish ben ghooinney elley, eer eshyn ta brishey poosey rish ben e naboo, bee’n maarderagh as y streebagh dy shickyr er nyn goyrt gy-baase.

Leviticus 24:17

As bee eshyn ta goaill ersooyl bioys dooinney erbee, dy shickyr er ny choyrt gy-baase.

Zechariah 3:4

As dreggyr eh, as loayr eh roosyn va nyn shassoo ny enish, gra, Gow-jee jeh yn eaddagh broghe-frytlagh. As rish hene, dooyrt eh, Cur-my-ner, ta mee er ghoaill ersooyl dty pheccaghyn, as nee’m oo y choodaghey lesh caghlaa coamrey.

Noo Mian 14:10

As hug eh fys yn kione dy ve giarit jeh Ean ayns y phryssoon.

Noo Luke 15:21

As dooyrt y mac rish, Ayr, ta mee er n’yannoo peccah noi niau, as ayns dty hilley’s, as cha vel mee ny-sodjey feeu dy ve enmyssit dty vac.

Noo Luke 18:13

As hass y publican foddey veih, as cha by-lhoys da wheesh as e hooillyn y hroggal seose gys niau, agh woaill eh er e chleeau, gra, Dy row Jee myghinagh dooys ta my ghooinney peccoil.

Jannoo 2:37

Nish tra cheayll ad shoh, v’ad guint ayns nyn gree, as dooyrt ad rish Peddyr, as rish ny ostyllyn elley, Gheiney as vraaraghyn, cre bailliu shin dy yannoo?

Hebrewnee 9:26

(Son eisht beign da v’er hurranse dy mennick er-dy hoshiaght y theihll) agh nish un cheayrt son ooilley ayns ny eashyn s’jerree, t’eh er hoilshaghey eh-hene dy chur ersooyl peccah liorish jannoo eh-hene ny oural.

1 Ean 1:7

Agh my ta shin gimmeeaght ’sy toilshey, myr t’eshyn ’sy toilshey, ta shin freayll sheshaght yn derrey yeh rish y jeh elley, as ta fuill Yeesey Creest e Vac glenney shin veih dy chooilley pheccah.

Ashlish 1:5

As veih Yeesey Creest, yn feanish firrinagh, as y chied-er-ny-ruggey veih ny merriu, as prince reeaghyn y thallooin: Huggeysyn va graihagh orrin, as ren shinyn y niee veih nyn beccaghyn ayns yn uill echey hene.

1 Samuel 15:20

As dooyrt Saul rish Samuel, Ta mee dy jarroo er choyrt biallys da coraa yn Chiarn, as er n’gholl er y chaghteraght hug y Chiarn mee, as ta mee er choyrt lhiam Agag ree Amalek, as dy bollagh er stroie ny Amalekiteyn.

1 Samuel 15:30

Eisht dooyrt eh, Ta mee er n’yannoo peccah: ny-yeih, cur onnor dou nish, ta mee guee ort, fenish shanstyr my phobble, as kiongoyrt rish Israel, as chyndaa reesht mârym, dy voddym ooashley ’choyrt da’n Chiarn dty Yee.