2 Reeaghyn 2:9 - Yn Vible Casherick 1775 1819

⁹ As haink eh gy-kione, tra v’ad er gholl harrish, dy dooyrt Elijah rish Elisha, Shir cre nee’m er dty hon, roish my bee’m goit ersooyl voïd. As dooyrt Elisha, Ta mee guee ort, lhig da ayrn dooble jeh dty spyrryd ve orrym.

2 Reeaghyn 2:9 ပူးပေါင်းရင်းမြစ်များ

1 Reeaghyn 19:16

As Jehu mac Nimshi nee uss y ooilaghey dy ve ree harrish Israel: as Elisha mac Shaphat, jeh Abel-meholah, nee oo y ooilaghey dy ve phadeyr ayns dty ynnyd.

1 Reeaghyn 3:9

Cur er-y-fa shen da dty harvaant cree tushtagh, dy vriwnys dty phobble, dy voddym cronnaghey eddyr mie as sie: son quoi ta abyl dy vriwnys ad shoh dty phobble ta cha earrooagh?

Psalmyn 72:1

Cur da’n ree dty vriwnyssyn, O Yee: as dty chairys da mac y ree.

Zechariah 12:8

Nee’n Chiarn ayns y laa shen fendeil cummaltee Yerusalem: as bee eshyn ta faase ny-vud oc ’sy laa shen goll-rish David; as bee thie Ghavid goll-rish Jee, as myr ainle y Chiarn goll rhymboo.

Zechariah 9:12

Chyndaa-jee gys yn chashtal lajer, shiuish phryssoonee dy hreishteil, eer er y laa shoh, ta mee dy hickyraghey, dy jean-ym cooilleeney dooble dhyt.

Earrooyn 11:17

As hig-yms neose as loayr-ym rhyt ayns shen; as nee’m goaill jeh’n spyrryd t’ort’s, as ver-ym eh orroo shen; as nee ad gymmyrkey errey yn pobble mayrt, nagh bee’n slane currym ort hene.

Earrooyn 11:25

As haink y Chiarn neose ayns bodjal, as loayr eh rish, as ghow eh jeh’n spyrryd va ersyn, as hug eh shen er y three-feed shanstyr as jeih: as haink eh gy-kione, tra ren y spyrryd tannaghtyn orroo, dy ren ad phadeyrys, as cha ren ad scuirr.

Noo Ean 16:7

Ny-yeih ta mish ginsh diu yn irriney; Te ymmyrchagh er nyn son mish dy gholl roym: son mannagh jem roym, cha jig Fer-ny-gherjagh hiu; agh my hem’s roym, ver-ym hiu eh.

Jannoo 1:8

Agh yiow shiu pooar veih’n Spyrryd Noo hig erriu: as bee shiu nyn veanishyn dooys chammah ayns Jerusalem, as ayns ooilley Judea, as ayns Samaria, as gys ny ardjyn sodjey magh jeh’n theihll.

Jannoo 8:17

Eisht hug ad nyn laueyn orroo, as hooar ad y Spyrryd Noo.

1 Corinthianee 12:31

Agh yeearree-jee dy jeean ny ard-ghiootyn: As foast ta mee jeeaghyn diu raad foddey s’ooasle.

Deuteronomy 21:17

Agh nee eh goaill rish y mac eck’s sloo bynney lesh, dy ve yn eirey, liorish coyrt da ayrn dooble jeh ooilley ny t’echey: son toshiaght e niart eh: ta cairys eiraght echey.

Deuteronomy 34:9

As va Joshua mac Nun lane jeh’n spyrryd dy chreenaght: son va Moses er lhie e laueyn er: as va cloan Israel ayns biallys da, as ren ad myr va’n Chiarn er harey da Moses.

1 Timothy 5:17

Lhig da ny shanstyryn ta reill dy mie, ve coontit feeu jeh ooashley dooble, erskyn ooilley adsyn ta laboragh ’sy ghoo as ynsagh.