1 Samuel 6:5 - Yn Vible Casherick 1775 1819

⁵ Shen-y-fa nee shiu cummey ’yannoo goll-rish ny pileyn, as caslys jeh ny loaghee ta cur mow yn thalloo; as ver shiu gloyr da Jee Israel: foddee dy jean eh scughey e laue veue, as veih ny jeeghyn eu, as veih’n cheer eu.

1 Samuel 6:5 ပူးပေါင်းရင်းမြစ်များ

1 Recortyssyn 16:28

Cur-jee da’n Chiarn, shiuish chynneeyn y pobble, cur-jee da’n Chiarn gloyr as niart:

1 Recortyssyn 16:29

Cur-jee da’n Chiarn y ghloyr cooie da e ennym, cur-jee lhieu ourallyn, as tar-jee kiongoyrt rish: cur-jee ooashley da’n Chiarn ayns aalid e chasherickys.

Psalmyn 18:44

Pobble nagh nhione dooys: nee m’y hirveish.

Psalmyn 32:4

Son ta dty laue trome orrym laa as oie: as ta soo my chorp myr chyrmagh-loshtee yn tourey.

Psalmyn 39:10

Va mee my host, as cha doshil mee my veeal: son dty yannoo’s ve.

Psalmyn 66:3

Son nee ooilley yn seihll ooashley ’chur dhyt: goaill arrane jeed, as moylley dt’Ennym.

Exodus 12:12

Son hem’s trooid cheer Egypt yn oie noght; as nee’m bwoalley ooilley’n chied er ny ruggey ayns cheer Egypt, chammah dooinney as baagh: as noi ooilley jeeghyn Egypt neem’s briwnys y chooilleeney: mish y Chiarn.

Exodus 8:17

As ren ad shen; son heeyn Aaron magh e laue lesh e lorg, as woaill eh joan ny hooirey, as haink eh dy ve meeylyn, er dooinney as baagh: haink ooilley joan y thallooin dy ve meeylyn trooid magh ooilley cheer Egypt.

Exodus 8:24

As ren y Chiarn myr shen, as haink swarm atchimagh dy veishteigyn stiagh ayns thie Pharaoh, as ayns thieyn e harvaantyn, as ayns ooilley cheer Egypt: va’n slane cheer breinn, kyndagh rish ny swarmyn dy veishteigyn.

Exodus 8:5

As dooyrt y Chiarn rish Moses, Abbyr rish Aaron, Sheeyn magh dty laue lesh dty lorg harrish ny strooanyn, harrish ny hawinyn, as harrish ny loghanyn, as cur er ny froggyn dy heet seose er thalloo Egypt.

Isaiah 19:1

Errey Egypt. Cur-my-ner, ta’n Chiarn markiagh er bodjal bieau, as hig eh gys Egypt; as bee jallooyn Egypt tilgit bun-ry-skyn ec yn enish echey, as cree Egypt nee lheïe ersooyl cheu-sthie jeh.

Isaiah 42:12

Lhig daue gloyr y choyrt da’n Chiarn, as soilshaghey e voylley ayns ny ellanyn.

Jeremiah 13:16

Cur-jee gloyr da’n Chiarn nyn Yee, roish my der eh dorraghys, as roish my nee ny cassyn eu snapperal er ny sleityn dorraghey, as choud’s ta shiu jeeaghyn son soilshey, dy jyndaa eh shen gys scadoo yn vaaish, as dy bee eh er ny chaghlaa gys dorraghys dullyr.

Jeremiah 3:13

Ynrycan gow-rish dty vee-chraueeaght, dy vel oo er n’yannoo peccah noi’n Chiarn dty Yee, as er rheynn dty aigney-mie gys joarreeyn fo dy chooilley villey glass, as cha vel shiu er chur biallys da my choraa’s, ta’n Chiarn dy ghra.

Joel 2:25

As ver-ym diu reesht ny bleeantyn ren ny locustyn stroie, yn veishteig-vergagh, yn vraddag, as yn veishteig-loauee, my heshaght-chaggee vooar hug mee ny mast’ eu.

Jonah 3:9

Quoi ec ta fys my nee Jee chyndaa as meiyghey, as e yymmoose hrome y lhiettal, nagh jean mayd cherraghtyn?

Malachi 2:2

Mannagh jean shiu clashtyn, mannagh gow shiu gys nyn gree eh, dy ghloyraghey my ennym’s, ver-ym eer mollaght erriu, as ver-ym mollaght er ny bannaghtyn eu; lioar, ta mee hannah er chur mollaght orroo, er-yn-oyr nagh vel shiu goaill eh gys nyn gree.

Earrooyn 33:4

(Son va ny Egyptianee goanluckey ooilley ny mec shinney oc, va’n Chiarn er stroie ny mast’ oc: er ny jeeghyn oc myrgeddin va’n Chiarn er chooilleeney e vriwnyssyn.)

Noo Ean 9:24

Eisht deïe ad reesht er y dooinney v’er ny ve doal, as dooyrt ad rish, Cur y moylley da Jee: ta fys ain dy nee drogh ghooinney eh shoh.

Joshua 7:19

As dooyrt Joshua rish Achan, My vac, cur, ta mee guee ort, gloyr da’n Chiarn Jee Israel, as gow-rish dty loght huggeysyn; as insh dooys nish cre t’ou er n’yannoo, ny keill voym eh.

Ashlish 11:13

As ’syn oor cheddin va craa mooar thallooin ayn, as huitt yn jeihoo ayrn jeh’n ard-valley, as ayns y craa-thallooin v’er nyn stroie shiaght thousane dooinney: as v’adsyn va er-mayrn atchimagh, as hug ad gloyr da Jee t’ayns niau.

Ashlish 14:7

Gra lesh ard-choraa, Gow-jee aggle roish Jee, as cur-jee gloyr da; son ta oor y vriwnys echey er jeet: as cur-jee ooashley dasyn chroo niau as thalloo, as yn aarkey, as ny farraneyn ushtey.

Ashlish 16:9

As va deiney losht lesh y chiass mooar, as loayr ad dy mollaghtagh noi ennym Yee, echey ta pooar harrish ny briwnyssyn trome shoh: as cha ghow ad arrys, dy chur gloyr da.

1 Samuel 5:11

Myr shen hug ad fys, as haggil ad ooilley chiarnyn ny Philistinee, as dooyrt ad, Cur-jee ersooyl arg Yee Israel, as lhig da goll reesht gys e ynnyd hene, nagh jean eh shin hene, as y pobble ain y stroie: son va cragh baaish trooid ooilley’n ard-valley; va laue Yee feer trome orroo.

1 Samuel 5:9

As ve myr shen, lurg daue ve er choyrt lhieu eh mygeayrt, dy row laue’n Chiarn noi’n ard-valley lesh paitt trome: as woaill eh deiney’n ard-valley, chammah beg as mooar, as va bleaynyn oc ayns nyn gurpyn.

1 Samuel 6:8

As gow-jee arg y Chiarn, as cur-jee eh er y chart: as cur-jee ny jewellyn airhey, ta shiu dy hebbal da son oural-loght, ayns box rish lhiattee’n arg; as cur-jee eh ersooyl, dy vod eh goll voïn.