1 Samuel 6:3 - Yn Vible Casherick 1775 1819

³ As dooyrt ad, My ver shiu ersooyl arg Yee Israel, ny lhig da goll follym; agh Bee-jee shickyr dy hebbal da oural-loght: eisht bee shiu er nyn lheihys, as nee shiu toiggal cre’n-oyr nagh vel e laue er ny scughey veue.

1 Samuel 6:3 ပူးပေါင်းရင်းမြစ်များ

Lioar Yob 10:2

Jir-ym rish Jee, Ny jean m’y gheyrey; insh dou cre’n-fa t’ou streeu rhym.

Exodus 23:15

Nee oo freayll feailley’n arran gyn soorit: nee oo gee arran gyn soorit shiaght laa, myr ren mee dty harey, er y traa pointit, ’sy vee Abib: son er haink oo magh ass Egypt; cha jig unnane my enish lesh laue follym.

Exodus 34:20

Agh y chied sharragh vees ec assyl nee oo feaysley lesh eayn: as mannagh veayshil oo eh, nee oo brishey e wannal: ooilley’n chied-ruggit jeh dty vec nee oo feaysley: as cha jig unnane erbee kiongoyrt rhym’s lhome-lauee.

Exodus 8:15

Agh tra honnick Pharaoh, dy row couyr, ren eh e chree y chreoghey, as cha dug eh clashtyn daue; myr va’n Chiarn er ghra.

Leviticus 5:6

As ver eh lesh yn oural-loght echey gys y Chiarn, son e pheccah t’eh er n’yannoo, bwoirrinagh veih’n chioltane, eayn ny mannan jeh ny goair son oural-peccah; as nee’n saggyrt lhiasaghey ’yannoo son e pheccah.

Leviticus 6:6

As ver eh lesh yn oural-loght echey gys y Chiarn, rea gyn lheamys ass y chioltane, marish yn ooley, son oural-loght gys y taggyrt.

Deuteronomy 16:16

Three keayrtyn ’sy vleïn hig ooilley ny fyrrynee ayd kionfenish y Chiarn dty Yee, ’syn ynnyd nee eh reih: er feailley yn arran-millish, er feailley ny shiaghtinyn, as er feailley ny cabbaneyn: as cha jig ad lhome-lauee fenish y Chiarn.

1 Samuel 5:11

Myr shen hug ad fys, as haggil ad ooilley chiarnyn ny Philistinee, as dooyrt ad, Cur-jee ersooyl arg Yee Israel, as lhig da goll reesht gys e ynnyd hene, nagh jean eh shin hene, as y pobble ain y stroie: son va cragh baaish trooid ooilley’n ard-valley; va laue Yee feer trome orroo.

1 Samuel 5:7

As tra honnick deiney Ashdod dy nee shoh myr ve, dooyrt ad, Cha bee arg Yee Israel ny sodjey mârin, son ta’n laue echey trome orrin, as er Dagon y jee ain.

1 Samuel 5:9

As ve myr shen, lurg daue ve er choyrt lhieu eh mygeayrt, dy row laue’n Chiarn noi’n ard-valley lesh paitt trome: as woaill eh deiney’n ard-valley, chammah beg as mooar, as va bleaynyn oc ayns nyn gurpyn.

1 Samuel 6:8

As gow-jee arg y Chiarn, as cur-jee eh er y chart: as cur-jee ny jewellyn airhey, ta shiu dy hebbal da son oural-loght, ayns box rish lhiattee’n arg; as cur-jee eh ersooyl, dy vod eh goll voïn.

1 Samuel 6:9

As gow-jee tastey, my te goll seose rish raad ny ardjyn echey hene lesh Beth-shemesh, she eshyn eisht t’er choyrt yn kerraghey trome shoh orrin: agh mannagh gow eh yn raad shen, eisht bee fys ain nagh nee’n laue echeysyn ren shin y woalley; cha row eh agh lhag-haghyrt haink orrin.