1 Samuel 5:4 - Yn Vible Casherick 1775 1819

⁴ As tra dirree ad yn moghrey er-giyn, cur-my-ner, va Dagon er duittym er e eddin gys y thalloo kiongoyrt rish arg y Chiarn; as va kione Dagon as e ghaa laue brisht jeh er sole y dorrys; cha row agh bun Dagon er-mayrn.

1 Samuel 5:4 ပူးပေါင်းရင်းမြစ်များ

Isaiah 27:9

Liorish shoh eisht vees mee-chairys Yacob er ny heyrey, as shoh yn slane cowrey, dy vel e pheccaghyn er ny leih da; tra t’eh jannoo ooilley claghyn yn altar myr claghyn kelk t’er ny vroo dy myn, cha bee ny keylljyn ny ny jallooyn faagit nyn shassoo.

Isaiah 40:20

Eshyn ta cha boght, nagh vel fort oural echey, t’eh reih billey nagh jean loau: t’eh jeeaghyn magh son obbree aghtal, dy yannoo jalloo grainnit nagh vod ve scughit.

Jeremiah 10:11

Myr shoh jir shiu roosyn, Ny jeeghyn nagh ren ny niaughyn ny’n thalloo y chroo, nee ad shen eer cherraghtyn veih’n thalloo, as veih fo ny niaughyn shoh.

Jeremiah 10:14

Ta dy chooilley ghooinney jeu bolvaneagh ayns tushtey; ta keeayl dy chooilley lheieder lheïe ersooyl lesh y jalloo grainnit: son ta’n jalloo lheït echey ny oalsaght, as cha vel ennal ayndoo.

Jeremiah 10:15

T’ad fardail, as obbyr y volteyrys: ayns earish nyn gerraghey nee ad cherraghtyn.

Jeremiah 50:2

Insh-jee magh mastey ny ashoonyn, as lhig daue clashtyn, as soie-jee seose yn mergey; cur-jee eam, as ny jean-jee keiltyn: abbyr-jee, Ta Babylon goit, ta Bel currit naardey, ta Merodach brisht ayns peeshyn; ta ny jeeghyn eck bun-ry-skyn, ny jallooyn eck nyn beeshyn mynney.

Daniel 11:8

As ver eh lesh myrgeddin ny jeeghyn-jalloo oc gys Egypt, marish ny princeyn oc, as marish ny siyn ooasle oc dy argid, as dy airh, as nee eh tannaghtyn ny shlee dy vleeantyn na ree yn twoaie.

Micah 1:7

As bee ooilley ny jallooyn grainnit eck bwoailt ayns peeshyn, as bee ooilley yn cosney eck losht ’syn aile, as ooilley ny jallooyn eck nee’m y stroie: son ren ee ad y chosney lesh faill streebagh, as gys faill streebagh nee ad reesht chyndaa.

1 Samuel 6:5

Shen-y-fa nee shiu cummey ’yannoo goll-rish ny pileyn, as caslys jeh ny loaghee ta cur mow yn thalloo; as ver shiu gloyr da Jee Israel: foddee dy jean eh scughey e laue veue, as veih ny jeeghyn eu, as veih’n cheer eu.