1 Samuel 5:3 - Yn Vible Casherick 1775 1819

³ As tra dirree deiney Ashdod dy moghey laa-ny-vairagh, cur-my-ner, va Dagon er duittym er e eddin gys y thalloo kiongoyrt rish arg y Chiarn: as ghow ad Dagon, as hoie ad eh seose reesht ayns e ynnyd.

1 Samuel 5:3 ပူးပေါင်းရင်းမြစ်များ

1 Reeaghyn 18:26

As ghow ad yn dow va er ny chur daue, as daarlee ad eh, as deïe ad er ennym Vaal veih’n voghrey dy jarroo gys yn vun-laa, gra, O Vaal, clasht rooin! Agh cha row coraa, ny fer erbee ren gansoor. As ren ad lheimyragh mygeayrt yn altar v’ad er droggal.

Psalmyn 115:7

Ta laueyn oc as cha vel ad loaghtey, cassyn t’oc as cha vel ad shooyl: chamoo t’ad loayrt trooid nyn scoarnagh.

Psalmyn 97:7

Bee adsyn ooilley er nyn goyrt gys nearey ta cur ooashley da jallooyn grainnit, as ta goaill taitnys ayns Jeeghyn fardalagh: cur-jee ooashley dasyn, ooilley shiuish Yeeghyn.

Exodus 12:12

Son hem’s trooid cheer Egypt yn oie noght; as nee’m bwoalley ooilley’n chied er ny ruggey ayns cheer Egypt, chammah dooinney as baagh: as noi ooilley jeeghyn Egypt neem’s briwnys y chooilleeney: mish y Chiarn.

Isaiah 19:1

Errey Egypt. Cur-my-ner, ta’n Chiarn markiagh er bodjal bieau, as hig eh gys Egypt; as bee jallooyn Egypt tilgit bun-ry-skyn ec yn enish echey, as cree Egypt nee lheïe ersooyl cheu-sthie jeh.

Isaiah 40:20

Eshyn ta cha boght, nagh vel fort oural echey, t’eh reih billey nagh jean loau: t’eh jeeaghyn magh son obbree aghtal, dy yannoo jalloo grainnit nagh vod ve scughit.

Isaiah 41:7

Myr shen ren y seyir yn gaaue-airh y ghreinnaghey, as eshyn ta cummey lesh yn oayrd yn fer ta goaill garrey er yn ingan, gra, Te aarloo son taa: as ren eh shickyr jeh lesh treinaghyn, nagh beagh eh er ny scughey.

Isaiah 46:7

T’ad dy hroggal eh er y gheaylin, t’ad dy ymmyrkey lhieu eh, as soiaghey eh ayns e ynnyd, as te shassoo; veih e ynnyd cha jean eh gleashagh: dy jarroo, nee fer geamagh huggey, ny-yeih cha vod eh freggyrt, ny sauail eh ass e heaghyn.

Jeremiah 10:8

Agh t’ad ooilley-cooidjagh bolvaneagh as gyn tushtey; ta’n jalloo ny ynsagh dy ardalys.

Zephaniah 2:11

Bee yn Chiarn atchimagh daue: son ver eh naardey ooilley jeeghyn y thallooin; as nee deiney eshyn y ooashlaghey, dy chooilley unnane ’syn ynnyd hene, dy jarroo ooilley ellanyn ny ashoonee.

Noo Mark 3:11

As ny spyrrydyn neu-ghlen tra honnick ad eh, huitt ad sheese kiongoyrt rish, as dyllee ad, gra, She Mac Yee oo.

1 Samuel 6:1

As va arg y Chiarn ayns cheer ny Philistinee shiaght meeaghyn.

1 Samuel 6:5

Shen-y-fa nee shiu cummey ’yannoo goll-rish ny pileyn, as caslys jeh ny loaghee ta cur mow yn thalloo; as ver shiu gloyr da Jee Israel: foddee dy jean eh scughey e laue veue, as veih ny jeeghyn eu, as veih’n cheer eu.