1 Samuel 4:10 - Yn Vible Casherick 1775 1819

¹⁰ As huitt ny Philistinee orroo; as va Israel er nyn mwoalley, as chossyn dy chooilley ghooinney gys e chummal hene; as va cragh feer vooar ny-vud oc, son huitt jeih thousaneyn as feed jeh coshee Israel.

1 Samuel 4:10 ပူးပေါင်းရင်းမြစ်များ

2 Samuel 18:17

As ghow ad Absalom, as hilg ad eh ayns ooig dowin ’sy cheyll, as hrog ad cayrn mooar dy chlaghyn harrish: as chossyn ooilley Israel dagh unnane gys e chabbane.

2 Samuel 18:7

Raad va pobble Israel er ny yiarey sheese roish deiney Ghavid, as slaughter mooar er y laa shen jeh feed thousane dooinney.

2 Samuel 19:8

Eisht dirree’n ree, as hoie eh ’sy yiat. As dinsh ad da ooilley’n pobble, gra, Cur-my-ner, ta’n ree ny hoie ’sy yiat. As haink ooilley’n pobble kiongoyrt rish y ree; son va Israel er gosney ersooyl dy chooilley ghooinney gys e chummal.

2 Samuel 20:1

As haghyr dooinney dy ve ayns shen, dooinney dy Velial, as yn ennym echey Sheba, mac da Bichri, ny Venjamite; as heid eh trumpet, as dooyrt eh, Cha vel ayrn erbee ainyn ayns David, chamoo ta eiraght ain ayns mac Jesse: dy chooilley ghooinney gys e hie hene, O Israel.

1 Reeaghyn 12:16

Myr shen tra honnick ooilley Israel nagh dug yn ree clashtyn daue, dreggyr yn pobble yn ree, gra, Cre’n ayrn t’ain ayns David? chamoo ta eiraght ain ayns mac Jesse: ersooyl-jee gys nyn gabbaneyn, O Israel: jeeagh nish da dty hie hene, Ghavid. Myr shoh jimmee Israel roue gys nyn gabbaneyn.

1 Reeaghyn 22:36

As hie magh eam trooid y magher-caggee mysh lhie ny greiney, gra, Dy chooilley ghooinney gys e ard-valley hene, as dy chooilley ghooinney gys e heer hene.

2 Reeaghyn 14:12

As hooar Judah yn chooid smessey veih Israel; as ren dy chooilley ghooinney chea gys e chabbane.

2 Recortyssyn 13:17

As ren Abijah as e phobble ad y stroie lesh cragh vooar: myr shen dy huitt sheese marroo jeh Israel jeih thousaneyn as da-eed, reih deiney.

2 Recortyssyn 25:22

As hooar Judah yn chooid smessey veih Israel, as roie ad er-chea, dagh dooinney gys e chummal.

Psalmyn 78:9

As gyn ve myr nyn shenn-ayraghyn, sheeloghe vee-chredjuagh as mee-viallagh: sheeloghe nagh ren nyn gree y hoiaghey dy cairagh, as y spyrryd oc cha ren lhiantyn dy shickyr gys Jee;

Jeremiah 7:12

Agh gow-jee nish gys yn ynnyd v’aym’s ayns Shiloh, raad ren mee my ennym y hoiaghey seose ec y toshiaght, as jeeagh-jee cre ren mee rish son mee-chraueeaght my phobble Israel.

Leviticus 26:17

As nee’m soiaghey m’eddin nyn ’oï, as bee shiu er nyn stroie roish nyn noidyn: as nee ad reill harrishdiu, as nee shiu roie er-chea, tra nagh bee fer erbee er nyn eiyrt’s.

Deuteronomy 28:15

Agh hig eh gy-kione, mannagh n’eaisht oo rish coraa’n Chiarn dty Yee, dy reayll dy tastagh ooilley e oardaghyn, as e lattyssyn ta mish dy harey dhyt jiu; dy jig ooilley ny mollaghtyn shoh ort, as berree ad ort.

Deuteronomy 28:25

Ver y Chiarn ort dy ve er dty imman roish dty noidyn: hed oo magh un raad nyn ’oï, as chea ersooyl rhymboo shiaght raaidyn, as bee shiu skeaylt fud ooilley reeriaghtyn y thallooin.

1 Samuel 3:11

As dooyrt y Chiarn rish Samuel, Cur-my-ner, neem’s red y chooilleeney ayns Israel, yn red cheddin ver nyn dappey vouesyn nee clashtyn eh.

1 Samuel 4:2

As hug ny Philistinee ad-hene ayns order-caggee noi Israel: as tra haink ad dy cheilley, va’n varriaght ec ny Philistinee er Israel; as varr ad jeh’n armee ’sy vagher mysh kiare thousane dooinney.