1 Samuel 27:12 - Yn Vible Casherick 1775 1819

¹² As chred Achish David, as smooinee eh rish hene, T’eh er chur er e phobble Israel dy choyrt slane dwoaie da; shen-y-fa bee eh my harvaant choud as vees eh bio.

1 Samuel 27:12 ပူးပေါင်းရင်းမြစ်များ

Genesis 34:30

As dooyrt Jacob rish Simeon as Levi; Ta shiu er hayrn seaghyn orrym, as er m’y yannoo dwoaiagh mastey cummaltee ny cheerey, mastey ny Canaaniteyn, as ny Perizziteyn: as myr nagh vel shin agh beggan sleih ayns earroo, nee ad chaglym ad-hene cooidjagh m’oï, as m’y ghunverys, as beem’s er my stroie, mish as my hie.

2 Samuel 10:6

As tra dennee cloan Ammon dy row ad dy mooar er vrasnaghey David, hug ad fys as daill ad Syrianee Veth-rehob, as Syrianee Zoba, feed thousane deiney coshee, as veih ree Maacah thousane dooinney, as veih Ish-tob daa housane jeig.

Exodus 5:21

As dooyrt ad roo, Dy jeeagh y Chiarn erriu, as dy jean eh briwnys; son dy vel shiu er chur orrin dy ve feohdoil ayns sooillyn Pharaoh, as ayns sooillyn e harvaantyn, as er choyrt chliwe ayns ny laueyn oc dy stroie shin.

1 Samuel 13:4

As cheayll ooilley Israel dy row Saul er woalley garrison ny Philistinee, as dy row ny Philistinee myrgeddin soit er goaill cooilleeney er Israel. As va’n pobble sumnit dy cheilley lurg Saul gys Gilgal.

1 Samuel 27:11

As cha ren David dooinney ny ben y hauail bio dy yannoo skeeal jeh ayns Gath, gra, Er-aggle dy jinnagh ad shin y vrah, gra, Shoh myr ren David, as shoh myr vees y cliaghtey echey choud as vees eh cummal ayns cheer ny Philistinee.

1 Samuel 28:1

As haink eh gy-kione er ny laghyn shen, dy ren ny Philistinee chaglym ny armeeyn oc cooidjagh dy chaggey rish Israel. As dooyrt Achish rish David, Lhig da fys’ve ayd son shickyrys dy jed oo magh mârym gys y chaggey, oo-hene as dty gheiney.