1 Samuel 20:3 - Yn Vible Casherick 1775 1819

³ As loo David ny-sodjey, as dooyrt eh, Ta fys ec dty ayr son firrinys dy vel mee er gheddyn foayr ayns dty hilley; as t’eh gra, Cha nhegin fys v’ec Jonathan er shoh, er-aggle dy bee eh trimshey da: agh cha firrinagh as ta’n Chiarn bio, cha vel agh kesmad eddyr mish as y vaase.

1 Samuel 20:3 ပူးပေါင်းရင်းမြစ်များ

2 Samuel 15:21

As dreggyr Ittai yn ree, as dooyrt eh, Myr ta’n Chiarn bio, as myr ta my hiarn y ree bio, son shickyrys, raad erbee dy bee my hiarn y ree, lhig eh ve ayns baase ny bioys, dy feer, ayns shen myrgeddin vees dty harvaant.

2 Reeaghyn 2:2

As dooyrt Elijah rish Elisha, Fuirree ayns shoh, ta mee guee ort; son ta’n Chiarn er m’y choyrt er chaghteraght gys Beth-el. As dooyrt Elisha rish, Myr ta’n Chiarn bio, as myr ta dty annym bio, cha vaag-ym oo. Myr shen hie ad ny-neesht sheese gys Beth-el.

2 Reeaghyn 2:4

As dooyrt Elijah rish, Elisha, fuirree ayns shoh, ta mee guee ort; son ta’n Chiarn er my choyrt gys Jericho. As dooyrt eh, Myr ta’n Chiarn bio, as myr ta dt’annym bio, cha vaag-ym oo. Myr shen haink ad gys Jericho.

2 Reeaghyn 2:6

As dooyrt Elijah rish, Fuirree, ta mee guee ort, ayns shoh; son ta’n Chiarn er my choyrt gys Jordan. As dooyrt eh, Myr ta’n Chiarn bio, as myr ta dt’annym bio, cha vaag-ym oo. As hie ad ny-neesht er nyn doshiaght.

Psalmyn 116:3

Haink ribbaghyn y vaaish mygeayrt-y-moom: as ghow pianyn niurin greme orrym.

Jeremiah 38:16

Er shoh loo yn ree Zedekiah rish Jeremiah dy follit, gra, Myr ta’n Chiarn bio, hug yn annym shoh dooin, cha der-ym oo gy-baase, chamoo nee’m uss y livrey gys y laue ocsyn ta shirrey dty vioys.

Jeremiah 4:2

As shoh myr nee oo loo y ghoaill, Myr ta’n Chiarn bio, ayns firrinys, ayns briwnys, as ayns ynrickys; as nee ny ashoonyn ad hene y vannaghey aynsyn, as aynsyn nee ad boggyssagh.

Deuteronomy 28:66

As bee gaue dty vioys kinjagh kiongoyrt rhyt, as bee oo fo aggle oie as laa, as cha bee shickyrys erbee ayd jeh dty vioys.

Deuteronomy 6:13

Nee oo aggle y ghoaill roish y Chiarn dty Yee, as shirveish eh, as nee oo loo liorish e ennym.

Hebrewnee 6:16

Son ta deiney dy jarroo loo liorishyn s’ooasle ta: as ta loo, dy niartaghey lesh yn irriney, coyrt dy chooilley streeu gys kione.

1 Samuel 1:26

As dooyrt ee, Oh my hiarn; myr ta dty annym bio, my hiarn, she mish y ven hass liort’s ayns shoh, goaill padjer gys y Chiarn.

1 Samuel 17:55

As tra honnick Saul David goll magh noi yn Philistine, dooyrt eh rish Abner captan e heshaght-chaggee, Abner, quoi dy mac y dooinney aeg shoh? As dooyrt Abner, Myr ta dt’annym bio, O ree, cha nione dou.

1 Samuel 20:2

As dooyrt eh rish, Ny lhig eh Jee: cha bee uss er ny choyrt gy-baase: cur-my-ner, cha jean m’ayr nhee erbee y yannoo, lhig da ve mooar ny beg, nagh n’insh eh dooys: as cre’n-fa yinnagh m’ayr yn red shoh y cheiltyn voym? cha vel eh myr shen.

1 Samuel 20:4

Eisht dooyrt Jonathan rish David, Cre-erbee ta dt’annym dy yeearree, neem’s er dty hon.

1 Samuel 25:26

Nish er-y-fa shen, my hiarn, myr ta’n Chiarn bio, as myr ta dty annym bio, fakin dy vel y Chiarn er dty lhiettal veih cheet dy gheayrtey fuill, as veih cooilleeney ’ghoaill lesh dty laue hene, nish lhig da dty noidyn, as adsyn ta shirrey olk y yannoo da my hiarn, ve myr Nabal.

1 Samuel 27:1

As smooinee David ayns e chree, Neem’s foast keayrt ny keayrt ennagh tuittym liorish laue Saul: cha voddym ny share y yannoo na dy chosney cha leah’s oddym gys cheer ny Philistinee; as cha bee smooinaghtyn sodjey ec Saul orrym, dy hirrey er my hon ayns veg jeh ardjyn Israel: myr shoh nee’m scapail ass e laue.