1 Reeaghyn 9:3 - Yn Vible Casherick 1775 1819

³ As dooyrt y Chiarn rish, Ta mee er chlashtyn dty phadjer as dt’accan t’ou er n’yannoo kiongoyrt rhym: ta mee er chasherickey yn thie shoh t’ou er hroggal, dy choyrt my ennym ayn son dy bragh; as bee my hooillyn as my chree ayn dy kinjagh.

1 Reeaghyn 9:3 ပူးပေါင်းရင်းမြစ်များ

1 Reeaghyn 8:29

Dy vod dty hooillyn ve foshlit lesh y thie shoh oie as laa, eer lesh yn ynnyd my-e-chione t’ou er ghra, Bee’n ennym aym’s ayns shen; dy vod uss coyrt clashtyn da’n phadjer nee dty harvaant chebbal lesh yn ynnyd shoh.

2 Reeaghyn 20:5

Chyndaa reesht, as insh da Hezekiah, captan my phobble, Myr shoh ta’n Chiarn Jee Ghavid dty ayr gra, Ta mee er chlashtyn dty phadjer, ta mee er vakin dty yeïr: Cur-my-ner, neem’s uss y lheihys; as er y trass laa hed oo seose gys thie yn Chiarn.

2 Reeaghyn 21:7

As hoie eh seose jalloo grainnit y cheyll ayns y thie, my-e-chione va’n Chiarn er ghra rish David, as rish Solomon e vac, Ayns y thie shoh, as ayns Jerusalem, ta mee er reih ass ooilley tribeyn Israel, neem’s my ennym y hoiaghey son dy bragh:

2 Recortyssyn 33:7

As hoie eh seose jalloo grainnit (yn jalloo v’eh er n’yannoo) ayns thie Yee, my-e-chione va Jee er ghra rish David, as rish Solomon e vac, ’Sy thie shoh, as ayns Jerusalem, ta mee er reih roish ooilley tribeyn Israel, ver-ym’s m’ennym son dy bragh.

2 Recortyssyn 6:40

Nish, my Yee (ta mee guee ort) lhig da dty hooillyn ve foshlit, as cur clashtyn foayroil da’n phadjer t’er ny yannoo ’syn ynnyd shoh.

Ezra 6:12

As dy jean y Jee, ta’n ennym echey er ny ooashlaghey ayns shen, stroie dy chooilley ree as pobble, ver nyn laue dy chaghlaa, ny dy stroie yn thie shoh dy Yee, t’ec Jerusalem: ta mish Darius er n’yannoo decree, lhig da ve chelleeragh cooilleenit.

Psalmyn 10:17

Brish uss pooar yn vee-chrauee as goanlyssagh: gow ersooyl yn vee-chraueeaght echey, nagh bee veg jeh ry-gheddyn.

Psalmyn 116:1

Ta mee feer wooiagh: dy vel y Chiarn er chlashtyn coraa my phadjer;

Psalmyn 34:17

Ta’n sleih cairagh jannoo aghin, as ta’n Chiarn cur clashtyn daue: as dy livrey ad ass ooilley nyn seaghyn.

Psalmyn 65:3

Ta my ghrogh-yannoo geddyn y varriaght orrym: O bee uss myghinagh da nyn beccaghyn.

Exodus 20:11

Son ayns shey laa chroo yn Chiarn niau as thalloo, yn faarkey, as ooilley ny t’ayndoo, as scuirr eh er y chiaghtoo laa: shen-y-fa vannee yn Chiarn y chiaghtoo laa, as ren eh eh y chasherickey.

Exodus 29:44

As neem’s y cabbane-agglish, as yn altar y chasherickey: as neem’s myrgeddin chammah Aaron as e vec y chasherickey, dy yannoo shirveish dooys ayns oik y taggyrt.

Jeremiah 15:1

Eisht dooyrt y Chiarn rhym, Ga dy shassagh Moses as Samuel kiongoyrt rhym, ny-yeih cha vod my aigney y ve lesh y pobble shoh; ceau magh ad ass my hilley, as lhig daue goll.

Jeremiah 7:10

As jig shiu dy hassoo kiongoyrt rhym’s ’sy thie shoh, ta enmyssit orrym’s, as gra, Ta shin er scapail, ga dy vel shin er n’yannoo ooilley ny reddyn dwoaiagh shoh?

Daniel 9:23

Ec toshiaght dty aghinyn haink y sarey magh, as ta mish er jeet dy hoilshaghey dhyt, son t’ou ayns ard foayr: shen-y-fa toig yn chooish, as smooinee er yn ashlish.

Earrooyn 16:38

Censeryn ny peccee shoh noi ny anmeenyn oc hene, lhig daue ve jeant plaityn lhean dy choodaghey yn altar: son v’ad chebbit gys y Chiarn, shen-y-fa t’ad casherick: as bee ad son cowrey da cloan Israel.

Noo Mian 6:9

Shen-y-fa er yn aght shoh gow-jee padjer: Ayr ain t’ayns niau, Casherick dy row dty ennym.

Noo Ean 11:42

As va fys aym dy vel oo rieau dy my chlashtyn: agh er coontey yn phobble ta mygeayrt-y-moom dooyrt mee shoh, dy vod ad credjal dy vel oo er my choyrt.

Jannoo 10:31

As dooyrt eh, Cornelius, ta dty phadjer er ny chlashtyn, as dty yeirk freilt ayns cooinaghtyn fenish Jee.

Deuteronomy 11:12

Cheer, ta fo reih kiarail dty Yee; ta sooillyn yn Chiarn dty Yee harrish, veih toshiaght eer gys jerrey ny bleeaney.

Deuteronomy 12:11

Shen y raad vees ynnyd nee yn Chiarn nyn Yee y reih, dy choyrt e ennym ayn, gys shen ver shiu lhieu ooilley ny ta mee dy harey diu, ny ourallyn-losht eu, ny chebballyn, ny jagheenyn, as oural-troggit-seose nyn laue, as y reih jeh dy chooilley vreearrey-arryltagh, ta shiu dy yannoo gys y Chiarn.

Deuteronomy 12:21

My vees yn ynnyd ta’n Chiarn dty Yee er reih dy choyrt e ennym ayn, roud voïd; eisht nee oo marroo jeh dty helloo as dty hioltane, ta’n Chiarn er choyrt dhyt, myr ta mee er dty harey, as nee oo gee ec dty hie hene, cre-erbee ta dty aigney cur mian da.

Deuteronomy 12:5

Agh gys yn ynnyd, nee’n Chiarn nyn Yee y reih ass ooilley ny tribeyn eu, dy chur e ennym ayn, eer ayns e ynnyd-vaghee hene nee shiu shirrey, as gys shen nee shiu cheet:

Deuteronomy 16:11

As nee oo boggey ’ghoaill kiongoyrt rish y Chiarn dty Yee, uss, as dty vac, as dty inneen, as dty er-mooinjerey, ad dty inney-veyl, as y Levite t’er cheu-sthie jeh dty yiattyn, as y joarree, as y lhiannoo gyn ayr, as y ven-treoghe ta ny mast’ eu, ’syn ynnyd nee’n Chiarn dty Yee y reih dy choyrt e ennym ayn.

1 Ean 5:14

As shoh’n treishteil t’ain aynsyn, my hirrys shin nhee erbee cordail rish e aigney, t’eh geaishtagh rooin.