Mise 7:18 - U TIENU MAAMA TILI 2013

¹⁸ Ŋme n naani leni fini U Tienu, Fini yua n duundi ki ñandi ti tuonbiadi, Ki puuni sugili a niba yiema po. Ŋaa kubi a pabienli yogunu kuli a niba yaaba n sieni po, Kelima mi ninñingbadima mani a po.

Gourmanchéma Bible

¹⁸ Ŋme n naani leni fini U Tienu, Fini yua n puuni a niba yaaba n sieni sugili bi tuonbiadi po? Ŋaa kubi a pabienli yogunu kuli, Kelima mi niñingbadima mani apo.

Mise 7:18 ပူးပေါင်းရင်းမြစ်များ

Mi cilima 4:7

I moamoani a yaa tieni yaala n ŋani, a nunga baa yaa ŋani. Ama a yaa tieni yaala n bia, ti tuonbiadi dua a buliñoabu kani, ki sugini ki diedi a. Ama fini, ŋan moandi ki paadi ti.»

1 Bi Badiba 8:23

«Li Miali Diedo, Isidayeli Tienu, tientoa kuli ki ye ki naani leni a, tanpoli po leni ki tinga nni kuli. Fini n kubi ŋan den kuani yaa ŋantaado leni a naacenba, ki go gba bi po mi ninñima bani yaaba n cuoni a nintuali leni bi pala kuli.

2 Bi Badiba Jama 30:9

Yi yaa guani o Diedo kani, yaaba n gedini yi bila leni yi kpeliba ti yonbidi yeni, baa gbadi bi po mi ninñima, ki ŋaa ba ban guani mi naa diema nni. O Diedo yi Tienu tiendi mi ŋanma, ki go gba mi ninñima, ki kan buli yi o nunga, yi yaa guani o kani.»

2 Bi Badiba Jama 6:21

N mia ŋa ŋan cengi a naacemo leni a niba Isidayeli yaaba miabu, bi yaa jaani a yaa kaanu n tie ne. Ŋan cengi ti, fini yua n ye hali tanpoli, ŋan cengi ti, ki go pa ti sugili.

Nehemi 9:17

Bi den yie baa tuo ma, Ki sundi ŋan den tieni bi po yaa ŋanma. Bi den juagi bi tuli. Bi yiema nni, bi den gandi o yudaano, Ki baa guani ban den ye ti yonbidi nni naanpo. Ama fini, a tie yaa Tienu n puuni sugili, Ki juogidi ki gba mi ninñima, Ke a pali ki be tontoni, ki pia li ŋanbili mo. Lani yaa po, ŋaa den ŋaa ba,

Pisomi 103:13

Nani bibaa n gba o bila po Mi ninñima maama, O Diedo moko gba yaaba n fangi o po Mi ninñima yene.

Pisomi 130:4

Ama sugili ye fini yaa kane. Lani n teni ke li pundi ban fangi a.

Pisomi 35:10

N baa yedi leni n pali kuli: O Diedo, ŋme n baa fidi nani fini yeni, Ki faabi o ninñinnilo yua n paani o nuu nni? Ŋme n baa fidi ki faabi o ninñinnilo Leni o luodo yua n kpabidi ba nuu nni?

Pisomi 65:3

Nani ŋan cengi i jaandi yeni po, Bi nisaaliba kuli baa cua a kani.

Pisomi 65:4

N tuonbiadi paadi nni, Ama a baa pa ti ti tuonbiadi sugili.

Pisomi 71:19

U Tienu, a teginma kpedi hali boncianla, Kelima a tieni yaa bonla n yabi. U Tienu, ŋme n naani leni a?

Pisomi 86:15

Ama fini, o Diedo, a tie Yaa Tienu n gba mi ninñima, Ki go pia ti bulicindi. A pali ki be tontoni, ki pia li ŋanbili, Ki go tie ti dugidi daano.

Pisomi 86:5

Fini o Diedo, a ŋani ki puuni sugili, Ki pia li ŋanbili yaaba n jaandi a kuli po.

Pisomi 89:6

O Diedo, tanpoli n yaa pagi a Bancianma leni a moamoani, Bi nigagidiŋanba siiga!

Pisomi 89:8

U Tienu, a pia i jeje hali boncianla, A malekinba taancianli nni, Ki go pia i jejeciami yaaba n gaani Ki lindi a kuli po.

Mi Ñama 15:11

Li Miali Diedo, i tieni kuli siiga, Ŋme n baa fidi ki niagi leni a? Ŋme ye ki naani leni fini yua yaa gagidiŋanma n ki pia lie? Li pundi ban jie ŋa, ki go pagi fini yua n tiendi mi bancianma.

Mi Ñama 34:9

O den yedi: «O Diedo, li yaa tie ke a pali mani n po moamoani, n mia ŋa, fini o Diedo, ŋan yaa ye ti siiga ki yegi leni ti, kelima ti tie i tupaali danba. Ama ŋan tieni ti po sugili ti tagili leni ti tuonbiadi po, ki taa ti tin yaa tie a piama.»

Esayi 1:18

O Diedo yedi: «Cua mani tin taani ki juogi. Yi tuonbiadi yaa moani ba nani mi soama, Se tin guani ki pendi nani a tatana yeni. Ba yi tuonbiadi yeni yaa moani colicoli, Se tin guani ki pendi paipai.

Esayi 33:24

Mi diema nni oba kuli ki tua: «Mii pa.» Yaa nibuoli n ye Jerusalemi baa sugili bi tagili po.

Esayi 38:17

N paboanli kpandi ki tua yemanma. Fini n kubi n miali ke min da pundi ku buogu nni. A luni n tuonbiadi kuli a puoli po.

Esayi 40:18

Yi bua ki boagini U Tienu leni ŋme yo? Yi baa nandi o leni be?

Esayi 40:25

U Tienu yedi: «Yi boagindi nni leni ŋme, Ke n baa yaa naani leni o?» Yua n Gagidi ki ŋani n yedi yeni.

Esayi 43:25

Li li tie mine! Mini n duuni ki ñani yi tagili. N kan go tiadi yi tuonbiadi po, Kelima min bua yi maama po.

Esayi 44:22

N bolini yi tagili nani ku tawaligu yeni, Ki bolini yi tuonbiadi mo Nani ku gbangbadigu yeni. Guani ki cua n kani, Kelima n den daa ki faabi yi.

Esayi 55:7

O nibiado n ŋaa o tagibiadu, Fanma miali mo n ŋaa o yantiabiadili, Ki lebidi ki guani o Diedo kani. Wani yua n baa gbadi o po mi ninñima Leni ti Tienu yua n puuni sugili Leni ti bulicindi kaa cedi yeni kani.

Esayi 57:10

Yi coagini yi yula leni li cenli, Ki naa baa yedi: «Ti baa lebidi!» Yi baa ki pia u paalu yo ki cuoni.

Esayi 57:16

N kan yaa koani leni ba yogunu kuli ka. N kan yaa fiindi n pali bi po yogunu kuli ka, Kelima n yaa tiendi yeni, Min tagi yaala ke li pia miali kuli baa bodi.

Esayi 62:5

Nani o jawaalo n taa li puowandiali maama, A bijaba baa taa ŋa yene. Nani o jafaano n mangidi o togibaa pali maama, A baa mangi a Tienu pali yene.

Esayi 64:9

A dogi yii n gagidi ki ŋani yeni kuli Tua fanpienma. Siyon tua fanpienma. Jerusalemi mo tua paboanli kaanu.

Esayi 65:19

N baa teni Jerusalemi n tua n pamancianli, O niba mo n tua n pamanli. Bi kan go gbadi bubula leni kuudi u dogu yeni niinni.

Jeremi 3:12

Gedi ki ban kpaani nujienu po, ki yedi: Isidayeli o yenyiedo, o Diedo yedi mi naa maama: ‹N kan go yaa pia a po nunbiadiga, Kelima n yama dingi. O Diedo n yedi yeni. N pali mo kan go waagi ki be a po yogunu kuli.

Jeremi 3:5

Naani o pali baa waagi ki be? Naani o cili kan jiidi abada? A yen maadi yene ki tiendi yaala n bia. A den pia li paalu mo.

Jeremi 31:20

Efrayimi tie n bibuadiga, Wani n tie n bigbabili. N kan fidi ki kan tiadi o po, Kelima n bua o. Mi ninñima pia nni o po. N li bua o moamoane. Mini o Diedo n yedi yeni.

Jeremi 31:34

Oba kan go bangi oyua. Oba kan go yedi o kpiilo: ‹Bandi mani o Diedo!› Bikuli baa yaa bani nni, ki cili yua n wa bi siiga, ki ban taani o nikpelo. Mini o Diedo n yedi yeni. N baa tieni sugili bi tagili po. N kan go tiadi bi tuonbiadi po.»

Jeremi 32:41

N pali baa yaa mani bi po, min tieni ba mi ŋanma. N baa kaani ba bonŋanla mi diema nni.»

Jeremi 33:8

N baa ŋuudi ki ŋanbi ba leni ban den tieni yaa tuonbiadi kuli, ki tudi n po. N baa tieni bi po sugili leni ban den tudi n po, ki tieni yaa tuonbiadi leni ban den fii n po leni yaa yiema.

Jeremi 38:8

Ebedi-Meleki den ñani badidiegu ki maadi leni o bado ki yedi:

Jeremi 50:20

Laa dana nni, o Diedo yedi: «Bi baa lingi Isidayeli tagili, Ama bi kan go le yi. Juda tuonbiadi mo, bi kan le ti, Kelima min sieni yaaba, N baa tieni bi po sugili.

Jeremi 9:24

O Diedo n yedi ke a dana kpendi, Ki yedi ke o baa fii ki sedi Yaaba n ki lebidi bi pala yeni po.

Esekieli 18:23

Mini o Diedo U Tienu yedi: ‹Naani n bua o nibiado kuuma yo? Min sugini yaala tie wan lebidi o tagu ki yaa ye ki fo.›

Esekieli 33:11

Yedi ba daa, ke o Diedo U Tienu yua n fo poli ki yedi line: ‹Mii bua o nibiado kuuma ka, ama min bua yaala tie ke wan lebidi o tagu ki yaa ye yo.› Lebidi mani yi pala ki ŋaa i tagibiadi. Be yaa po ke yinba Isidayeli yaaba yi baa kpe?

Esekieli 33:16

Bi kan go tiadi wan den tieni yaa tuonbiadi yeni siiga, tuonbiadiba kuli po. O baa yaa ye kelima o ŋua yaa bujiali n tiegi leni mi teginma.

Danieli 9:9

Ama fini ti Diedo ti Tienu, a gba ti po mi ninñima, ki tiendi ti po sugili, ba ke ti yie a bali maama.

Ose Tili 14:2

Isidayeli yaaba, lebidi mani ki guani O Diedo yi Tienu kani, Kelima yi tuonbiadi n teni ke yi tuudi ki baa.

Ose Tili 14:5

O Diedo yedi: «N baa faabi ba leni bi yiema, Ki go yaa bua ba leni n pali kuli, Kelima min den pia bi po yaa pabienli gbeni.

Amosi 1:11

O Diedo yedi mi naa maama: «Edomi yaaba tieni tuongundataa, Li pundi ba bonanaa, Ya n teni ke n kan lebidi min jagi yaala. Bi den ŋoadi ki deli bi kpiiba leni ki jugisiega, Kaa gbadi bi po ninñimiba kuli. Bi pala yaa fii, ŋaa pia ke a jiidi, Baa pia sugili.

Amosi 7:8

O Diedo den buali nni: «A nua be?» N den guani ki yedi o: «Baabibiigiko.» Lani, o Diedo den yedi: «N biigidi n niba Isidayeli yaaba leni laa baabu yo. N kan go tieni bi po sugili.

Amosi 8:2

O den buali nni: «Amosi, a nua be?» N den guani ki yedi o: «N nua baabuogu ke ku pia yaa bonluonkaala n beni.» O Diedo den guani ki yedi nni: «N niba, Isidayeli yaaba juodima pundi, N kan go tieni bi po sugili.»

Jonasi 4:2

ke o mia o Diedo, ki yedi: «O Diedo, hali min den ye n diema nni, min den li jie yaala ka ne. N den bani ke a tie yaa Tienu n juogidi, ki gba mi ninñima, ke a pali ki be tontoni, ki go tiendi mi ŋanma. A yen lebidi a yama ki cedi ŋan bi jagi ke a baa tieni o nilo yaala. Lani yaa po yo, ke n den tiini ki caa Tarsisi.

Mise 2:12

Jakob puoliŋuani, n go baa ti taani yikuli. N baa taani yinba Isidayeli yaaba, yaaba n sieni. N baa taani yikuli nekanba nani yanloyenli pe yeni, Bi nani yaa yangoli n taani yankpaakaanyendu yeni. Lanyogunu yi baa kpaani li pamanli kpaani.

Mise 4:7

N baa taa yaaba n poagili yeni, Ki teni ban tua yaaba n baa sieni, Ki teni ban den deli ki gedini yaaba foagima yeni, N tua yaa nibuolu n pia u paalu. Lanyogunu, mini o Diedo baa yaa die ba Siyon juali nni hali yaa yogunu n tuu yaa yogu kuli.

Mise 5:3

O yaa cua o baa yaa kpaa ba Leni o Diedo paalu, O baa gobidi leni wani, Li Miali Diedo U Tienu kpiagidi. O niba jigi baa yaa co, Kelima yaaba n ye hali ki tinga banlu kuli, Baa yaa kpiagidi wani bi bado.

Mise 7:14

U Tienu, taa a yankpaagbiamu ki yaa kpaa a niba, Bani yaa nigoli n tie a piama yeni. Bi ye bi bebe li fuasieli nni i tikuani siiga. Ŋan go yaa kpaa ba Basan leni Galaadi diema nni, Nani ŋan den kpa kpaa ba maama.

Sofoni 3:17

O Diedo yi Tienu ye yi siiga, Ki tie yaa jakoando n faabidi. O baa teni yin tua o pamanli bonla. O buama yi po teni ke o baa pa yi mi yepanma. O yiini ki kpaani leni li pamanli kelima yi po,

Mi Coadima 23:21

Waa laa tagiliba kuli, Jakob puoliŋuani kani, Waa laa biadimiba kuli, bani Isidayeli puoliŋuani siiga, O Diedo bi Tienu ye leni ba, Bi kpaani ki kpiagidi wani bi bado!

Luki 15:32

Li pundi tin je ki go mangi ti pala, kelima a waalo na den kpe ki go faadi, o den yaadi ke ti guani ki laa o.› »

Luki 24:47

Bi baa cili Jerusalemi na ki yadi ki gedi i nibuoli kuli po, ki ban yaa wangi ke bi niba n lebidi bi pala, ki baa sugili bi tuonbiadi po.

LOMA YAABA 11:4

U Tienu den guani o be? U Tienu den guani ki yedi o: «N kubi n yuli po niba tudalele (7 000), yaaba n daa gbaani ki pugi Baali.»

Mi Tiadima 33:26

Yesuruni Tienu, oba kuli ki naani leni o, O yen jagi ti tawadi po, ki kpendi ki baa todi yi.

Jaki 2:13

U Tienu yaa jia ti buudi yaa yogunu, o kan gbadi mi ninñima yua n kaa den gbadi o lieba po mi ninñima. Mi ninñingbadima paani ti buudi.

Bi Bujiaba 10:16

Lani, bi den ñani i buli bi siiga ki guani ki ŋoadi Li Miali Diedo. Ban den ye leni yaa fala den cuo o Diedo mi ninñima.