Njɔyn 3:3 - Ŋwàʼlè ə̀ Fèzhə̀ Mkâyn Mə̂ Fèm

³ Njisə̀s ə pə̀ynsə̀ sê vəyn nə, “M pîə sê ghò səmɔʼ nə, wùə vayn kàʼa è nji elùʼ efɔ̂yn ə Fezhə̀vè ə̀ tsɛ̂ kə va mə ə kɛsê pîə vəyn.”

Njɔyn 3:3 ပူးပေါင်းရင်းမြစ်များ

Matyò 16:17

Njisə̀s ə pə̀ynsə̀ se vəyn nə, “Pɔsê nyì sê ghò ə Shimùyn va Njonà. Ə vachi wùə m̀sɔ̀ŋ kə è tsàyn zɨnə mə sê ghò, pîza ə nyi Pɨ̀a vɨm vɛ ə è nyi ekwùtwəyn kə è nə̀yn nə ò pi zamə.

Matyò 19:24

M tsâ kwəynsə̂ sê ghàyn nə, e pɔynə̂ sê nyàm ə̀ kwaŋ se tɔynə apùʼ ə saʼke tsɛ̂ kə wùə èghaʼâ nji elùʼ efɔ̂yn ə Fezhə̀vè.”

Matyò 21:31

Njisə̀s ə pfɨfə sê wùə èshyə̀ èngaŋtə nə, Ə̀ nyi nde ə ghɔyn ghɨ̂yn əfètəyn ə̀pɛ̀ ə è nə̀yn ghɛ zɛ pɨ̀a tè kyiŋə ə? Ghənə pə̀ynsə̀ nə, “Ə nə̀yn və shi.” Njisə̀s ə ke pì sê ghənə nə, “M pîə sê ghàyn səmɔʼ nə, ghɨ ghɛ ə ghe tənə tâksè è kwàlàvè tə njiə elùʼ efɔ̂yn ə Fezhə̀vè sə ghàyn sə shi.

Matyò 5:18

M tsâ sê ghàyn səmɔʼ, kə kwutwəyn è chike tə ndamə zaʼâ pî zàyn, wùə tə kəʼsə̂ va nâʼàpî fèghɛlə̀ fɛ ə fe tətə kwûŋsə̀ əfètə̂ Àlâŋ nə kɛ, ə̀ tsɛ̂ kə va mə ghɛ ə̀kɨ̂m ə kyayn.

Ŋwàʼlè ə̀ Mâk 10:14

Ə pə̀ kə Njisə̀s fe ghɛ zɛ ə ghənə nə̂, è və nyɔ̀ʼsə̀ ètɔŋ ə pìə sê ghənə nə, “Ghàyn za mɨ̂ətə̀m, ə ghənə pəyn sê mi. Kə ghàyn fɨyn tâmtè ghənə kûmə̀ nə fɔ̂yn ə Fezhə̀vè kyi əghɨ ghɛ ə ghe nyi kə ghənə.

Ŋwàʼlè ə̀ Mâk 9:47

Shi zɛze ə nə̀ nə ò nəyn pi, o pɔ̀ʼɔ̀ fɨsə̂. E tsɔ̂fə̀ nə ò nji efɔ̂yn ə Fezhə̀vè è shize emɔ̀ʼ tsɛ̂ kə ə maʼa ghô elùʼ ewùs è shighə pɛ̀,

Njɔyn 1:13

Ghənə tè pâʼà pə̀yn chi ghɔ Fezhə̀ endom vɛ ə wùə èwàmnə piə vayn ətəyn, kə ə̀ nyi ə̀ghɔ pɨ̀a wùə m̀sɔ̀ŋə; Zhə̀fè è ngɨŋə̂ Vəyn tè nyi pɨ̀a ə̀ ghənə̂.

Njɔyn 1:5

Payn ətəyn panə əfètə̂ àlɨm, mə lɨm ətəynke vayn kàʼa ke ndɨmse zəynze.

Njɔyn 1:51

È və pìə sê ghənə nə, “M pîə sê ghàyn ke nâʼà səmɔʼ nə, ghàyn tə fe kə kwùtwəyn chwî, ə tsì sə Fezhə̀sè ə tsɛ̂nə̀ kə nyî kɔʼɔ, tso, tso pə̂ ə Vâ wùə ətu.”

Njɔyn 12:40

“Zhə̀fè ə nə̀yn, ghənə ghe fôf ə fɨnə tɛsə̂ ə̀təm ə ghənə̂ghè kə shiə ghənə̂ ghə fe va, kwâʼtè tə ghənə̂tè e zɨə kê va, ə ghənə fɨyn va se pə̀yn se Mi, kə M tsuʼ ghənə.”

Njɔyn 3:4

Nìkòndemùs ə pfɨfə sê vəyn nə, “Ə nyi kàʼa kɛse pîə zàyn wùə èghaʼâ? È vayn kaʼa è fɨyn nji ə nyì endwɔ̀ kə ə piə vəyn nə ndu shîŋə̀ tepɛ̀!”

2 Kolìŋ 4:4

Ghənə pomə va pɔ̀m nə kwaʼtè tə ghənə̂tè nyi mə Zhə̀fè epi fə mbi fɨnə fe ə ndə̀m ə alɨm. Fe nyi mə fə ndə̀tè nə kə ghənə ə fe èpayn zɛ ə ze nyi ə ghənə ewìyn, mə nyi epayn zɛ ə ze ndô pə̂ ə Tom Èchùŋ zɛ ə è tsà kûmə̀ èpomsê ə Klâyszè, mə È lote nyi kə Fezhə̀.

2 Kolìŋ 5:17

Ə wùə nyi yî Klâys, è ve nyi wùə e fe, mə ndamə vəyn ze mɨ zə tsɛ̀, ze fe ze ze pə̂yn.

Ngàleshyà 6:15

Kɨ̀sə se nam ghaynghe, kɨ̀sə ə tàʼa se, zɨnə mə kyi va ghɛ zhîze se nə̀yn. Ghɛ etɛ nyi ke nə, Zhə̀fè nəyn, ə ò kɛse ə ô nyi wùə èfe.

Ɛfesùs 2:1

Ghàyn nyi nyî mə ghàyn tè nyi mə ghàyn ə kwute ə ghàyn ə sezuʼ kûmə̀ tètsas è ghɛ piə ghɛ ə ghàyn tè nə̂.

Taytùs 3:5

ə sɔ̀zâ ghâsènì, ə̀ va chi kûmə̀ èghɛ echûŋ zhize kə ghâsènì tè nəyn, pîza ə̀ tè nyì ke kûmə̀ èkosê esəyn ə Vəynze. È və tə shù tsɨsè pisə ghasènìse, ə nə̀ nə tɔynə̂ ə Sezuʼ se Ŋwaʼase, ə ghâsènì kyi ndam efeze kə ghɨ ghɛ ə piə pə̂yn ke ndô ghənə.

Njə̂m 3:17

Pîza, ghɛ əshi zɛ ə ze nyi kûmə̀ ètɔf eghaʼâ zɛ ə ze ndô pə̂ ekwùtwəyn nyi nə ze nyîə zo, kɔ̂ŋə̀ pɔ̂ynè, pɔynə̂, ndə̂mə̀ ngɨŋə̂ vəyn əchi, kyi ekosê esəyn zɛ ə ze muə twɔm echûŋvè, nə̂ ə̀ghɛ kè eghɨ sê ghɨghe, kaŋkaŋə̂ nə̂ va ghɛghe.

1 Pità 1:3

Ə ghâsènì ə tsɨ̂tə̀ Fèzhə̀, Pɨ̀a Pɛ̂pɛ ə̀ ghâsènì Njisə̀s Klâys! Fe ə kose səyn sê ghâsènì nâʼà sə ŋaŋ ə fo èndam e fe sê ghâsènì endom nə Fe ə tə zòmsè Njisə̀s Klâys ekwu, zɨnə mə nə̂ ghàs ə kyi ekwâʼtè elɨmtə zɛ ə ze vayn kàʼa ə ze pfɨse ghàs,

1 Njɔyn 2:29

Ə ghàyn ke nə vɛ ə Zhə̀fè kɨmne ndə̂m nyi chichi ə Zhə̀fè əshi, ə ghàyn ə ke kepî nə nâʼàpî ndè vɛ ə è nə̂ ghɛ zɛ ə ze nyi chichi, nyi kepî va Fèzhə̀.

1 Njɔyn 3:9

Nâʼàpî ndè vɛ ə è nyi Va Fèzhə̀ nə̀ va pi, kûmə̀ nə ghənə nyiə kyi ètsɨsə̂ Fezhə̀zè. Ghənə e va se nə̂ pi kûmə̀ nə ghənə nyi əghɔ Fezhə̀ghè.

1 Njɔyn 5:1

Naʼapi ndè vɛ ə è pomə nə Njisə̀s nyi vɛ ə Zhə̀fè chɔʼ ndə̂m nyi va Fèzhə̀. Ə̂ kɔ̀ŋɔ̀ pîndè Pɨ̀a, ə è və pɔŋɔ kɔ̂ŋɔ̀ kəpi vayn vɛ ə Pɨ̀a kyi.

1 Njɔyn 5:18

Ghâsènì ke ndô nə ghɔ Fezhə̀ vayn kàʼa ə nə̂ ndùə kə pi, kûmə̀ nə Va Fèzhə̀ tɔ̀ʼnə̀ ndò è ghənə, mə wùə èpi vayn kàʼa è nəyn ghɛ epi zhîze sê ghənə.

1 Njɔyn 5:4

kûmə̀ nə nâʼàpî va Fezhə̀ èkè nyi mə è və tɨm zhi mbi. Ə̀ nyi ekyî epomə̂ ə ghasènìze ə ze nə̂yn nə ghâsènì tɨm zhi mbi.

Etyə̂yn ə paynsêzè 3:14

“Nyàʼ ŋwàʼlè sê tsì ə̀ ndɛ ə̀ Fèzhə̀ ə Làndisyà nə: ‘Ə̀ zɨ̀nə nyi tom mə è ndò sê vɛ ə tɔŋtə nə, Àmə̀yn. È fɨ̀aʼà è təm ə vəynghe əkɨ̂m, fɨnə pìə səmɔʼ kûmə̀ Fèzhə̀. Zhə̀fè tè fɛte nâʼàpî ghè ə mbi tɔynə̂ ə vəyn.