Filìpây 2:3 - Ŋwàʼlè ə̀ Fèzhə̀ Mkâyn Mə̂ Fèm

³ Kə ghàyn ə nə ghɛghe kwaʼtə̀ kə sèngɨŋ saynse. Kə ghàyn nə nəyn èghɛ se tyə̀yn eghaŋsê ewìynze, pîza ghàyn nji ngɨŋ saynse əchi ə ndəm nə ghɨ mɔ̀ʼɔ nyiə kɔʼnə̂ tsɛ̂ ghàyn.

Filìpây 2:3 ပူးပေါင်းရင်းမြစ်များ

Tom èchùŋ kè kə Lûk tè nyaʼ 18:14

M pîə sê ghàyn nə wùə nə vɛ tè fɨ ə piə è kwɨlə̂ tânə̀ ə və ndɛ kè mə Zhə̀fè ə kəʼsê pisə vəynse, pîza ə tàʼa kəʼsê ə sepi sə wùə ə̀ Falàsî sɛ. Nâʼàpî ndè vɛ ə è kɔʼsə ngɨŋ ə vəyn ekwùtwəyn, Zhə̀fè nə̀ tsosə̂ vəyn ə chi, ə naʼapi ndè vɛ ə è nji ngɨŋ ə vəyn ə chi, ə Zhə̀fè nə̂ kɔʼsə vəyn ekwùtwəyn.”

Ŋwàʼlè ə̀ Pɔ̂l sê ghɨə Lûmghè 12:10

Ə nâʼàpî ndè ə kɔ̂ŋə̀ ànyì ə̀ vəyn è təm ə vəynghe əkɨ̂m. Ə nâʼàpî ndè ə fo èkɔʼsê se ànyì tsɨ̂ə tsɛ̂ kə è fo sê ngɨŋə̂ vəyn.

Ŋwàʼlè ə̀ Pɔ̂l sê ghɨə Lûmghè 13:13

Ghàyn e kyi tsɨnè èchùŋ kə ghɨ ghɛ ə ghe nyi epayn. Kə ghàyn ə nduə ə telùʼ te zhisə̂ nə ewìyn tɛ ə ghɨghe mɨə lɨ̀m fumə, m̀ ko ghənə, kə ghàyn ə chûmtə zəynghe è ndômnèghè. Kə ghàyn ə nə ghɛ ə nyələghe, kə ghàyn ə zɔ, kə ghàyn ə kyi àghə̀ʼ.

Ŋwàʼlè ə̀ Pɔ̂l sê ghɨə Lûmghè 2:8

Pîza ghɨə mɔ̀ʼɔ kwaʼtə̀ kə se ngɨŋ sə ghənə̂sè, tə se pomə̂ nə ghɛ zɛ ə Zhə̀fè pìə nyì səmɔʼ, ghənə e nə̂ ə̀ghɛ ghɛ ə Zhə̀fè pìə nə ghe tsɔ̂fə̀ va. Zhə̀fè tə tyə̂nə̀ ènyɔ̂ʼsè etɔŋ ə vəyn sê kyì əghɨ̀ nə ghɨ̂yn, ə È pɔynse ghənə.

1 Kɔlìŋ 15:9

Kûmə̀ nə m nyi wùə vɛ è tətə kwûŋsə̀ əfètəyn ə̀ghɨtomə, kûmə̀ nə mə tə tsə̀fsè ndɛ ə̀ Fèzhə̀.

1 Kɔlìŋ 3:3

Ghàyn pa ndamə kə kə̂ ghɨ mbiə. Ghə̀ʼkè nyîə nyi ə ghàyn əfètəyn, ghàyn e zɔ̂ə sèngɨŋ saynse, zɨnə mə e tyə̂nə̀ nə ghàyn nyi əghɨ ə mbighe, ndamə kə kə mbi kyiŋə.

2 Kolìŋ 12:20

M fânə̀ nə m pə̂, ə ghàyn ə va kə m kyiŋə nə ghàyn ə nyi, ə ghàyn pɔŋ fe mi, m mə va kə ghàyn kyiŋə nə mə nyi. M kaʼa ə m piə pə̂ ndò, ə m fe zɔ̂zè ə ghàyn əfètəyn, è ghə̀ʼà, è tɔŋ enyɔʼsəve, emuze, è wàmnè e pize, è kôghɔ̀ŋ, è ghaŋsə ewìynze, tâsə̀ ə̀ghɨ ə mɔ̀ʼɔghe.

Ngàleshyà 5:15

Pîza mə ghàyn kɛse sə senyàm sə mbvɨynse sə ndômnə̂ kwɨlə sengɨŋ saynse, nə̂ ə̀ghɛ əpiə, ghàyn nji shîŋə̀kè kûmə̀ nə ghàyn nə̀ mɨ̂sə̀ sèngɨŋ saynse.

Ngàleshyà 5:26

Kə ghâsènì ə ghaŋsə wiynve, kə ghâsènì ə nə̂ʼsə̀ ə̀təm ə əghɔ nyìə ə ghasènìghe pî sə̂ ghəʼə̀ ə̀ghɔ nyìə ghasènìghe.

Ɛfesùs 4:2

Ghàyn nə ngɨmnə̂ sengɨŋ saynse, pɔynə̂ fɨnə wəynsə̂ èwiyn, lɛ̂sə̀ sètsas saynse kûmə̀ èkɔ̂ŋ.

Ɛfesùs 5:21

Ghàyn e ngɨmnə̂ sèngɨŋ saynse kûmə̀ nə ghàyn fànə̀ Klâys.

Filìpây 2:14

Ghàyn e nə̂ nâʼàpî èghɛ èkè mə ghàyn shwinə̂ va, saʼnə̂ va.

Kòlosè 3:12

Ghàyn nyi əghɨ ə Fezhə̀ghè, È və tə kɔ̀ŋ ghàyn ə chɔʼɔ ghàyn sə Vəyn əghɨ̀. Ghàyn kyi sə̂ tyə̂nə̀ èsəyn ekoze, tɔ̂ʼnə̀ è ghɨghe, njiə sèngɨŋ saynse ə chi, pɔynə̂, fɨyn kyi ə̀təm.

Kòlosè 3:8

Pîza zôyn ghàyn kyi se zamàʼà əghɛ kə, etɔŋ enyɔʼsəve, è kɔ̂ŋzè se nə pofsê, è pâynzè, kə ghàyn ə soylə ghɨghe, pî nə wâmnè eliŋze fɨ ə ghàyn echo.

1 Timotì 6:4

è və ke nə è ghaŋsə̂ kə èwiyn, ke va nâʼà èghɛ, ghɨə mɔʼɔ kyi endam eliŋ zhîze sə̂ saʼnə̂ kûmə̀ m̀ghɛlə̀ mə èlwiynmè, zɨnə mə e pə̂ è ghə̀ʼkè, ngyə̀skè, soylè ewìynze, kwaʼtə̀ pi kûmə̀ ə̀ghɨ ə mɔ̀ʼɔghe,

1 Pità 3:8

Se kwùŋsè, ghàyn e tsɨ̂yntè kyi ke èkwâʼtè èmɔ̀ʼ, kosə̂ èsəyn, kɔ̂ŋɔ̀ sèngɨŋ saynse, kyi ə̀təm əchûŋə̀ fɨyn kyi va ghaŋsê ewìynze.

1 Pità 5:5

Kwuŋte, ghàyn tsose ngɨŋ saynse əchi sə zɨə se chəʼse. Ghàyn maʼ ngɨmnêzè kə sendzɨs sefɨaʼase sə̂ fɨ̂aʼà sê ngɨŋ saynse kûmə̀ ŋwàʼlè ə̀ Fèzhə̀ nyi mə è zə pì nə, “Zhə̀fè pânə̀ əghɨ ghɛ ə ghe ghaŋsə wiynve, pîza è fo àfùʼ sê ghɨ ghɛ ə ghe ngɨmnə ngɨŋsə ghənə̂sè.”