27 O toontii o wi'i: «E haani jiɗaa Joomiraawo Alla maaɗa e ɓerne maa fu, e yonki maa fu, e semme maa fu, e miilo maa fu. Kade bo, jiɗaa banniraawo maa, hande no jiɗirɗaa hoore maa.»
O wi'i kade: Daa no alkawal ŋal kaɓɓanmi e himɓe Isira'iila laatoytoo ɓaawo nii: Mi wattan sariyaaji am der hakkillo maɓɓe, mi winnan ɗi der ɓerɗe maɓɓe, mi laatoto Alla maɓɓe, ɓe laatoo himɓe am.
Gooŋa nun, to on tokkii sariya *Laamaare Alla gonuka e Binni Ceniini bi'uka: «Yiɗu banniraawo maa no jiɗirɗaa hoore maa.» To on tokkii ɗum, on gaɗii ko goonɗi.