Yute 1:4 - Ka Lamana'a Monoꞌi Lu Mu Tifiꞌehina Ka Yabe

⁴ Hena'mube? Bona'i luga'a Hu'mamofihi keheli'ahana'a enali folagahatigu fenene hite ti'ahana. To enali moko foya lilata nehanalo Hu'mau ka melemekilina'mu yabe lite ai hetofa bo nohinagihe lite nelana enali ya lite Hu'mamofihi lehe'mose kaga'a li sibi hite to lali moneko kaba boti, Yesu Kilisitohi enemegesa hu emite ibe fitebe hi etelata nehabe. Enali ya'ma bite li he'mila ete li he'mila nehanamofihi hapa'anilo Hu'mau osahi epilina ka koyapa'i mono bukugu fayahi keye'ahanamo ni'ibe.

Yute 1:4 ပူးပေါင်းရင်းမြစ်များ

Matiu 13:25

Ya hu'ehina mone sininugu asaga boana'i enubu'i ke su he'ahago bo moneuba kifina legeya'a lito oto ana fateha'a bomofihi foya'a folagaha'agu tili huloto bu fa nohibe.

Yoni 17:3

Mino kosaba huse'namofihi hapa'a ma huto ni'ibe, Hu'mau lamana'a moneko'i kai hapaka to noho lifi'ahata panaka Yesu Kilisito nani hapa'ni keheli'ehinogo mino kosaba huse'naka yamofihi huto hu epilibe.

Aposolo 11:23

Banabasiu ana hepato buto henetiloto Hu'mamofihi boana'a bati hite nehago bu enogoloto gelo sipi biloto bati hite nehanagi ana suhi lite fulunaguti koguna ite asaga komopatini Sipi Bomofitoga emite mino mana hilo luto enogo'na bi'ehina yabe.

Aposolo 15:24

Bo luga'a lali folagahatiguti lenalitoga bite kaga fato fato'i lu lepigo lenali'i keta lepesi'ehina lali akeheli'ohune. To lali ya'ma kaga bite lu epilo luto enoho melifi'ohune.

Galesia 2:4

Aku'i ema afetoga bona'i luga'a enali minete fagalo bo ya'ma ete folagahatigu suguna'i nehetite mine'ahanamagi enali ya suhi huto gufa'a laga hu etalune lite li'ahabe. Lali Kilisitotoga buto molo emiloto minoto li mele'ahana kamofihi nagalugu memino'ohutamo ni'ibe. Enali yamofihi hapa'a bu galune lite nelite keya ka lu laga huto lu'ehinamofihi kele kele'i panana'a ana suhi hite kagagu lele'mo malalune lite kofohi kapo o'ehina.

Galesia 5:13

Nalalu'nigita, anamofihi nagalugu mone meminalabe luto elesa molo lepi'ehinamo ni'ibe. To nagalugu meminana'mu yabe lite lenugufamofihi bita hulata nohina nasanamofihi kele kele'i mehi etalo. Komopatini epilete ai he'menogo ai he'menogo hite minalabe.

Efeso 4:14

Lali ya huto lagaso yagapana'i tegina meminose amuya moloto nohinogoti limi'i melelata bo enali faga faga li liminogo faga faga kamofihi yasi'auba lele'mo miyalo malo hinogo miyalo i ke'malupi malo i ke'malupi lu liluta hu laligi. Enali'i bona'i luga'amagihi enimi'i melete enele'mo keheli sibina nehana yabe. To laliya lele'mo keheli sibina hi lalabe.

1 Timoti 5:8

Luga'amagi enali bona'ani kaba lamana'a hi epelete enemehi meepilana yamofihi ka lamana'amofihi kapoguti ali he'mite to mono ka ya'ma mekehelise bona'i melugu bona'i enalitogati mine tegi hite ana foipana'aniuba enebe ligi'ehilina'mu minalabe. Ya higo keto a'mofihi bona'amagi kaba hu etalana'mu yabe.

2 Timoti 2:12

Keke'i luse nasana lugupisalo notinogo yamofi kumu yabe luto kosele'i melehenogo fa'mene kofiluta ya'mu ai hiti hepito minoto ai kapolo kaba hilune'mu hune. Ai kumu lemegesa hu emilenogo ai ana suhi huto megesa hu limilina'mu yabe.

2 Timoti 3:6

Bona'i ya hana'amagihi enalitogati luga'a enali legeso hite sibi sibi humofa'na nehite ana'magihi nonugu tite fato fato kaga lu epite enegekesa lite enali'ani enemege'i malalabe lite enele'melata hilabe. Ana ana'i enali komopa'anigu lapa mebi'ahana foipana kofilata to enugufa'aniuba laga besise nasana fato fato'i ya'ma keta'a hiti lite minete nehana.

1 Pita 2:16

Lenali lu laga hu'ehina kauba nagaluguti gulu ho leto'ehinamo ni'ibe lite kehelite minalo. To lenali foipana lite fala kilabe luto gulu ho lepolo'ehina ni'ifiye? O'e, ya hu lepolo'ehina yauba foipanamofihi legeya'a lolo mehilibe. Lenali ule'ale hite minete Hu'mamofihi kele kele'i hi etete minalo.

1 Pita 2:8

To mono bukugu fayahi mone ma luto ni'ibe: Ana efatoti i kusulu bite limilana'mu yabe. To ana efapolo ho kete enahalina'mu yabe. Ana kaga keye'ahanamofihi hapa'a ya'ma ni'ibe. Bona'i enali Hu'mamofihi ka'a keheli he'milata nehana enali kusulu bite limilana'mu yabe luto lu'ehinamo ni'ibe. Ya hite bite, ya suhi hilata nehabe luto Hu'mau ya'ma lu molo'ehina yabe.

1 Pita 4:18

Yana'mu mono bukugu kaga mone fayahi keye'ahanamo ma luto ni'ibe: Bo lamana'a enali foipana lilata nehana kanagu enele'mo bati hite enubuto binogo minalana'a keta higo ni'inaya, ya hu'ehina mono ka keheli he'mite minete foipana lolo hilata nehana enali hena hilana ni'ibe?

2 Pita 2:10

Bona'i enali'ani komopa'aniguti moko foya sipi higo kolo tanana hite kaba bomofihi ka'a kehelite mege'i melelata nehana bona'i enali'i Hu'mau enele'mo motito amuya naga'i epilina'mu yabe. Ya'ma faga nelana babafi bona'i enaliya enelesa meligo amuya melete minete kokulumagu neminana kene'magi enali kumu koli mehise nehite enigi'ani le'mo sibina sabana hilata nehana yabe.

2 Pita 2:7

To ana hite hepa'i lite li sibina hilube'mu nohigo ya'ma kegeiyo bona'i to mokolo bona'i enubuya'ani mehigo lite nehago bati huto mino'ehina bo Lotihi foipa hapa'ani'mu komopa'agu keta higo ai kumu luto Hu'mau ginaga figo minana'a luto Lotihi buto bi'ehina.

2 Pita 3:7

To ai yatai ana huto Hu'mamofihi kaga'auba kokuluma hiti me'i hiti kaba nohuto'a to alihi ai molo'ehina kanagu logo lo su halibe luto kaba nohibe. Bo foipana'ani'mu kaga guna molo epalalina kana'a huto nohinogo enali nona'a guna melete ya hilana'mu me'i hiti kokuluma hiti geba hite neha'inabe.

1 Yoni 2:22

Fagalo bona'i ya'ma enali kumu kehelilune. Bo moneubafi moneuba Yesu ai'a gulu ho letalibe luto le'mo ho lifi'ehina bo Kilisito menohibe luto nelinogomo ai kumu ya'ma fagalo bo yabe luto kehelilune. To enali ya'ma miyagu afotifi hiti to ai pana'a Yesu Kilisitohi enemegesa hi etimilana bona kumu enali Kilisitohi fateha'a yabe.

Yute 1:15

Ya huloto asaga bonatoga hapa'ani lu huto nohuto kegeiyo bona'i Hu'mamofitoga meneminana'a enali kegeiyo'na'animofihi hapa'a nona'a foipana epilina'mu yabe. To kegeiyo bona'magihi Hu'mamofitoga meneminana'amagi enali Hu'mamofihi kaga li sibina sabana hite ka laga mehina'a lilana ananamofihi nona'a epilina'mu yabe.

Yute 1:18

Enali ma lite lu lepilata hi'ahanamo ni'ibe: Kana'a sipi tupa higo komopa'anigu foipanamofihi nasanalo ya'ma laga epesise'namo amuya melelata nehana bona'i huto hilete kalana'i mele lepelete mono katini lite mumusopa ilana'mu yabe.

Huto Hilina Ka 15:4

Sipi Bo, kai kumu ki'afu koli mehilina'mu yabe? Kigika sipinamo kumu ki'afu liyafa mehilina'mu yabe? Kai monekomaka pa solata nohane. Ya hu'ehina'mu noto noto bona'i kaitoga ete enalapusa fi kimilune'mu habe. Kai bati huto lelito oto moloto lito hu'ahata ya'ma yege yege bona'i asaga'magi bu galana'mu yabe.