Taitasi 3:2 - Ka Lamana'a Monoꞌi Lu Mu Tifiꞌehina Ka Yabe

² To bonakamagi fato bona'i mone'mofihi kaga li sibina mehise to luba sabo mehise minalabe luto lu epibo. Enali legeso hite minete asaga bona'magitoga komopa'anigu keheli bati hite enele'mo babahi hilabe.

Taitasi 3:2 ပူးပေါင်းရင်းမြစ်များ

Matiu 11:29

Ya'ma yafa nani nigi'nagu nina lenali lite lenali lenigi'nagu malalo. Lenali nani hapa'ni lilo. Hena'mugope nani fulu fulu kaga bona'i lu noepuna bo nohube. To koyone huto legeso huto nominona bo nohube. To lenali komopatinimofihi nanitoga ete le'mo basu bilo.

Aposolo 23:5

Polu ka'anilo nona'a lu'ehina: Nalalu'nigita ai sipi mono bo nohibe luto nani mekeheli'ohube. Mono kauba ma luto lulata nohina: Kai bonakamagi kaba bo'animofihi kaga foipa'a melu etobo.

1 Koliti 6:10

to gumina taminalo bo to fe'nohi samahi tito lilube lilata nehana bo to bia nagamitoko humofa'na nehana bo, to enemegeka lilata nehana bo, to fakupa ka lite luba hilata nehana bo, ya nehana'amagihi Hu'mamofihi kapogu metilana'mu yabe.

1 Koliti 9:19

Nani asaga bona'magihi kele kele bo'ani menohube. Aku'i bona'i yege yege'i ya'ma Kilisitotoga enele'mo malalube luto fa'mene kele kele'ani lolo huto nohube.

2 Koliti 10:1

Poluita nani ya'ma Kilisitohi fuluna'a hiti lehe'mose nasana'a hiti kumu luto lenegekesa lito lu lepilugi kehelilo. Kehelite nani kumu ya'ma lite lilata nehabe. Lalitoga oto minoto ai'a amuya'a hiti bo menohinaya kaga'a nagami'a hiti lu lepilata hu'ehina. Ya huloto buto minoto golagaguti kaga lu lepilata nohibe. Lenali ya nelabe.

2 Koliti 12:20

Nani lenalitoga buto bu lenagaluna lenali kumu kehelinogo bati mehilifihe luto, to lenali nani kumu ana hite kehelinogo bati mehilifihe luto nokehelugo keta nonebesibe. To lenalitoga kenasabo bise'na to siko huse'na, to ibe fitobe nasana, to molomo titi hilata'na, to libe pigi bibe nasana, huli tali ka mege ka lulata, bona'i enugufa lelite tite, li sibi sibi hilata nasana yamofihi ni'inogo buto nehetito bu go lalube luto nokehelugo keta nonebesibe.

Galesia 5:22

To Sikalafu'mofihi legeya'a ma suhi huto hulata nohibe. Mehi lepito komopatini lepilata nohina, lenegelo bise'na hulata nehana, mino fulu huse'na, kosele'i melenohose bati huto minose'na, lenele'mo bati hulatana, komopatini lamana hite minolata, foyagu agoya emilata nohuto Hu'mamofihi kaga'a mone kegi'a mehe'milata,

Galesia 6:1

Nalalu'nigita, lenali folagahatinigu moneuba foipa foya li huto hulenogo lenali Sikalafu'i hiti nehanamagita leniginaga fi etenogo yamofihi fulu hite le'mo bati bati hilo. Ya nehitetini lenimi'i malalana'mu limite ke lalagi kaba hilo.

Galesia 6:10

Ya nohuto kana'ati ni'igo bona'i asaga'magihi lemehi epito hetofa hu epalalune. Ya nehinogoti mono kagu ligibo enali'ani lalalutigihi nasana ya'ma lelito tito enele'mo bati hilune.

Efeso 4:2

Ya nehite komopatini lelite limite fulunagu minete agoya hite minete mineme bite kosele'i melepehenogo komopatini epite ai he'mago ai he'mago hite minalo.

Efeso 4:31

Lenali enipakafa hose'na hiti to kenasabo bise'na hiti to enemegeka lite ya'ma asaga'i keheli he'milo. To luba lenegekesa mehino.

Filipai 4:5

Sipi Bouba imo oto logobisaga mele'isi alube'mu nohinagi bona'i asaga'i ya'ma fulu hite ya suhi ma suhi lu epalalo.

1 Tesalonika 2:7

Lali Kilisitohi aposolo'a nohutagi ya'ma ana'ina mone kumu linogo limilina bati hilina ya huto meni'ibe. To a'i moneuba yagapana'a laga hina'a hulata kaba nohina suhi huto lali ya'ma lenalitoga minoto lenele'mo bati hulata nohune.

1 Timoti 3:11

Ana suhi hite, enali liha'animagi hapa'ani bati huto ni'inogo fulu hite minalabe. Enali megeka melise minalabe. To ana ana'magi negi nagami neba neba hilana meni'ibe. To enali hapa'ani asaga'i hetofa hite minalabe. Mone gumina lise'na to faga lise'na ya hilana meni'ibe. Enali hapa'ani'mu kaba hilabe lite melete yanauba legeya'a lamana'a lolo hilibe.

1 Timoti 3:3

Amuya nagami'i silaga'i noloto negi nalina bo meminalibe. To negi nagami'i noloto lu baga luto luba li huto mehilibe. Ai legeso huto minoto le'mo baba ito to efaha foyalo komopa'a memalalibe.

Yemesi 3:17

Kokulumaluguti keheliya ise'na limilina yauba hapi fito komopati gulu gulu linogo minoto agoya bonako minototi fulunamofihi hapa'a lilata nohune. To fato bona'i bu enogoloto ginaga fise'na epiloto enele'mo lamana huto yamofihi legeya'a babu luto li huto hu leto'ehina ya huloto ligitagahi huto kenetufati loe lae hinogo faga faga luto meliluta'mu yabe.

Yemesi 4:11

Nalalu'nigita, lenalitini ka foipa'a melilo. Moneuba ai lalu'afi kumu ka foipa'a lu etalina ai ya'ma Hu'mau keya ka lu'ehina kagamofihi li sibina hulata nohuto ana kagamofihi loko nohibe. Kai Hu'mau keya ka lu'ehina li sibi hilata ya'ma kegekesa yigito ka lamana'a meni'ibe luto lilatamoya, ana keya kalo mege'i mololata menohane. Ana kagamofihi loko huto fa'mene nominane.

1 Pita 2:1

To ya huto ni'igo lenali foipanatini asaga'i li he'milo. To faga lilatana, kenetufatini loemo minolatana, to komopatinigu siko hilatana, huli ka ai lu emigo ai lu emigo hilatana yamofihi he'mi su halo.

1 Pita 3:10

Ya'mu mono bukugu kaga mone fayahi keye'ahanamo ma huto ni'ibe: Mone'i enali amuya moloto minolata nohuta ya'mu laga epesinogo yatama kanagu ma metoga minete legelo bito minoto lito hilune, lite linogo kenetufa'anilo kaba hite minete foipana melilabe. To lenabagaguti faga faga mone melilo.

1 Pita 3:8

To kaga lu su hoto lu lepilube. Lenali silaga'i lenalalutinigi hiti mino moneko hite komopatini ketipa inogo ai mehi eminogo ai mehi eminogo ya nehite lenalalutinigihi leniginaga finogo minete lenugufatinimofihi lime limite minalabe.

1 Pita 4:4

To yatai ya'ma Hu'mamofihi mekeheli'ahana bona'i enali foipanamofihi komopa'agu sibi hapa'a fato fato'i napa hite lilete nehago to lenali enalitoga mehepise fa'mene neminago enali bu gete topa hete lenali kumu libe pigi bibe hite minelata nehabe.

2 Pita 2:10

Bona'i enali'ani komopa'aniguti moko foya sipi higo kolo tanana hite kaba bomofihi ka'a kehelite mege'i melelata nehana bona'i enali'i Hu'mau enele'mo motito amuya naga'i epilina'mu yabe. Ya'ma faga nelana babafi bona'i enaliya enelesa meligo amuya melete minete kokulumagu neminana kene'magi enali kumu koli mehise nehite enigi'ani le'mo sibina sabana hilata nehana yabe.

Yute 1:10

Aku'i enali faga faga mono ka lilata bona'magi ya'ma mekeheli'ahana nasana'mu yamofihi ibe fitebe hite to megeka lite minelata nehabe. Yaga kala suhi hite enugufa'ani enumu nofilina nasana'mu fa'mene komopa'anitu kehelilete yalo ya'ma foipa hilete yanauba enele'mo sibi sibi hite ya hinogo enali fili su halabe.

Yute 1:8

Ya hu epolo'ehinamo ni'inaya aku'i faga mono'i lilata nehana bona'i enali ana hite bamu'i be ge tegi hite enugufatu topa helata'na lilata nehabe. Ya nehite Hu'mau gihiti bo libe pigi bibe hite kokulumalugu gulu guluna'ani hiti bona'i enali ya'ma mumusopa i epelelata nehabe.