Romu 9:30 - Ka Lamana'a Monoꞌi Lu Mu Tifiꞌehina Ka Yabe

³⁰ Ya'mu lali hena kaga lilune? Ya'ma nokehelune. Fegutoga bona'magi Hu'mamofihi bulo bebe sose foya melilata nehana, enali Hu'mamofitoga keheli ule'ale hilata nehago ai enele'mo bati hu'ehina.

Romu 9:30 ပူးပေါင်းရင်းမြစ်များ

Romu 10:10

Lali Hu'mamofitoga keheli ule'ale hunogo komopatigu lele'mo bati hilibe. To lali labagatiguti Yesu kibina boti nohibe luto nolunogomo ai lele'menogo minoba minoba hilune.

Romu 10:20

To Aisaiyau amuya moloto Hu'mamofihi lu'ehina ka'amu ma luto koyo'ehina: Nani kumu sa sa mehi'ahana bona'magi nehanalo bu nehetugo enali be nege'ahana. Nanitoga kehe mei'ahanamagi enubulo huto hugo keheli'ahana yabe.

Romu 10:6

Aku'i kai Hu'mamofitoga keheli ule'ale huto komopaka emi'ahatalo kele'mo bati hilina'mu ma fayahi mono bukugu goto lu'ehina: Kai kiyi'afu kokulumagu tiloto lalitoga ka lamana'a hapa'a lito alibe luto melubo. To ana huto kiyi'afu keligu limiloto lalitoga ka lamana'a hapa'a lito alibe luto ya melubo, lite keye'ahana. To ya'ma fayahi hapa'a ma ni'ibe. Kai Yesu Kilisito kokulumagutifi, fili'ehinagatifi oto lehe'malina ya'ma sa sa mehubo.

Romu 3:5

Nani bomagi enekesa yigilata nehana suhi luto kaga nolube. Lali foipa faipa hapatiuba Hu'mamofihi bebe sana hapa'alo huto hilina lali henabe luto liluta ni'ibe? Hu'mau lali'i osahi noliminogo bati mehina suhi nohibe luto liluta ni'ifiye? Lali foipa faipa hapatiuba Hu'mamofihi bebe sana hapa'alo huto hilina lali henabe luto liluta ni'ibe? Hu'mamofihi hapa'auba lali foipanatilo nona'amofihi mina'a limilina ai ya bati huto menifihe?

Romu 4:11

Alihi Abalahau gufa'alo laga hu ete'ahago mino'ehina. Anana hena ni'ibe? Abalahau Hu'mamofihi keheli ule'ale hu'ehigo Hu'mau lamana bo nohane lu'ehina. To ya'ma alipo gufa'a laga huto molo'ehinamofihi keya'a suhi huto hu'ehina. Ya huto Abalahau kohe toto asaga bona'i enugufa'ani laga mehuse'namagi Hu'mamofitoga keheli ule'ale hite mine'ahanamagihi afo'anifu nohibe. Ana bona'magi Hu'mamofihi bulo bebe sose'i nehabe.

Romu 4:13

Koyapa kanagu Hu'mau Abalahahi kaga lu emi'ehina: Asaga hepa'i hiti me'mo hiti yagapanakamagihi epilube luto kaga molo'ehina. Abalahau mone keya ka mege'i molo'ehinamu'i Hu'mau ya'ma kaga molo emi'ehinafiye? O'e. Abalahau agoya hu emi'ehinogo lamana bo nohibe luto ya'ma Hu'mau kaga lu molo eto'ehina.

Romu 4:22

To Abalahau Hu'mamofihi keheli ule'ale hu'ehinamu koyapa'i fayahi ge'ahana: Hu'mau bu goloto lamana bo nohibe luto lu'ehina.

Romu 4:9

Ya'ma enegelo nebinamagihi Tebitiu lu'ehinana enugufalo laga hi'ahanamagi kumu anasi lu'ehifiye? O'e, Yege yege enugufa laga mehi'ahana bona'magi hiti kumu luto lu'ehina yabe. Nani mono kaguti lu'ohuna: Abalahau Hu'mamofitoga agoya hu emi'ehigo ananamu'i lamana bo nohibe luto Hu'mau ya lu'ehina.

Romu 5:1

Lali Hu'mamofihi keheli ule'ale hutogo ai lele'mo bebe so'ehibe. Yana'mu Sipi Boti Yesu Kilisitou lalitoga hu'ehinanamu'i Hu'mau yatai lele'mo fulu nohibe.

Romu 9:14

Ya huto ni'igo lali Hu'mamofihi hapa'a bati mehu'ehina yabe lilupi? O'e, ya menolune.

Romu 9:31

Yuta bona'i koyapa'i Hu'mau enele'mo ho ti'ehina'amagi enali keya ka kehelite mege'i melete Hu'mamofihi bulo bebe sana bona'i nohune lite enubuto bilinamofihi kapo'a sa sa nehite bu mege'ahana. Ya yagi Hu'mau enele'mo bati mehu'ehina yabe.

Galesia 2:16

yama luto kehelilata nohune. Moseu keya ka lu'ehina ya ema keheliya iloto foya'a lelito buto minenogoti foipanati su halina'a meni'ibe. Yesu Kilisito kumu yabe luto keheli ule'ale huto foipanati meminenogo komopatigu le'mo bati hu'ehinogo minalune'mu hune. Ya luto keheliloto keya ka lu'ehina ka'amofihi foya'a lito buto minenogo foipanati meminenogo minalune luto Yesu Kilisito kumu keheli emi'ohune. Keya ka lu'ehina kamofihi mege'i melelata nehanaya Hu'mau enele'mo lamana hilina'a ya'ma meni'ibe.

Galesia 3:24

To keya ka yauba kaba hu letoto lele'mo bebe sose kapo lolo hulago nohutogo Kilisitotoga lele'mo malago ya'ma alihi Yesutoga agoya hu emito Hu'mamofitoga lele'mo lamana higo minaluta'mu yabe.

Galesia 3:8

Fegutoga bona'i enali Hu'mamofihi agoya hu emilenogo yamofihi foipana'ani li he'mi epalalibe. Koyapa'i mono bukugu Hu'mau ai'a Abalahahi ka lamana'a lu emi'ehina ya'ma lite kehelite mono kagu fayahi ma lite keye'ahanamo ni'ibe: Kai agoya hu nimi'ahatalo lusa gi keto'ohuna ya'ma melugu bona'i asagatoga li su halube'mu hibe.

Galesia 5:5

To lali ya'ma Hu'mamofihi Sikalafu'mofihi keheli ule'ale hu'ohuta'mu yabe luto foipanati meminenogo Hu'mau lele'mo bati hu'ehina bona'i minalune luto yamofihi agoya hu etoto minolata nohune.

Efeso 2:12

Ana kanagu lenali Kilisito hiti hepite memine'ahana ni'ibe. To Yuta bona'i enali fulilo meminese lenali fa'mene ino bano mine'ahana. To Hu'mau ai'a bonatoga lu molo epolo'ehina kaga alihi le'mo huto hilina ka yabe luto lu molo epolo'ehina kaga lenalitoga lu memalago lenali fegutoga bona'i fa'mene mine'ahana yabe. Lenali Hu'mamofihi mekehelise nehite ai lele'mo bati hilibe lite mekehelise minete ma melugu fa'mene sibina hite mine'ahana ni'ibe.

Filipai 3:9

To nani yatai aitoga mino hepiloto Moseu lu laga hu'ehina kamofihi mege'i molo'ohunalo Hu'mamofihi bulo bati huto minaluna meni'ibe. O'e, Kilisitou nele'mo bati hilibe luto ai kumu keheli amuya molo'ohunalo Hu'mamofihi bulo bati huto nominobe. Hu'mau anana'mu foipana'ni li he'mi netoloto nele'mo bati hu'ehinagihe.

1 Timoti 6:11

Timotio, Hu'mamofihi foyalo pana'ase. Kai ana'ina laga mehina'a kemegesa hu emibo. Ya nohuto ya'ma mino lamana huto bati huto minoto lito huse'namofihi mono ka'a hiti minolatana, keheli ule'ale hulatana, komopaka epilata nasana, kalana'i mele ketalana nasana huto nohinogo amanapa huto minose'na enele'mo baba ise'na ya'ma molo emito minalube luto amuya malalatagihe.

Hibulu 11:7

To Noa ai keheli ule'ale huse'na'a hiti bo mino'ehina Hu'mau alihi lipoti molo emilago ekesa kehelito kohe toto ka'a ekesa lito lu emigo Noau ya'ma kagalo keheli amuya moloto yagapana'a hiti enubuto bito minalabe luto ya'ma luloto nagamilugu boti sipi'a lolo hu'ehina. Ya huloto Noau Hu'mamofitoga agoya hu emito keheli ule'ale hilata yana'mu Hu'mau lamana bo nohane luto lu molo'ehina yauba ya'ma melugu bona'i foipana li'ahana'amagihi enifisa i'ehina suhi huto mino'ehibe.

1 Pita 4:3

Afetoga ema kanagu Hu'mamofihi mekeheli'ahana bona'magi enali laga'a kehelite ana'ina lilata nehana suhi hite lenali mine'ahana yabe. Ya'mu mine'ahana yauba kosele'i melepoho'ehina. Lenali mokolo hise nasana hiti ana'mu lenegekesa yigi yigi hite minete ekesa nagami'i nelete negi ne'ahana yabe. Ya nehite nagami'i nose'namofihi lenegelo nebite ya'mu li nupa hite minete silaga'namu lenegelo nebite laga mehina suhi hite lenegelo bi'ahana yabe. Lugefa bu gete lipite ibe ligi abe ligi hite mine'ahanamo ni'ibe, yamofihi he'milune ya nasana li'ahana lite nehago kana'a yatama lite mine'ahanamo ni'ibe. Aku'i molo emite ya suhi mehilo.