Romu 8:3 - Ka Lamana'a Monoꞌi Lu Mu Tifiꞌehina Ka Yabe

³ Bona'magihi komopa'ani amuya memolo'ehinagi keya kauba lehe'mo'ehina bati mehu'ehibe. Hu'mau aigo lehe'mo'ehina. Yata'a ai bona'i foipa hapa'animu ka epekito enifisa i'ehina. Ya huto ai'a pana'a melugu ho lifigo bona'i enugufa amuya memolo'ehina suhi lolo huto minoto lali foipanatimofihi nona'a li pa salibe luto fili'ehina yabe.

Romu 8:3 ပူးပေါင်းရင်းမြစ်များ

Maki 15:27

To Yesuhi hiti guminalo bo loemo ana hite malipu yafalo etehe'ahabe. Mone hete lamaga'aga yafa fite to mone hete soga'aga yafa fite etehe'ahana yabe.

Yoni 1:14

Kagauba ai bo huto huloto lali folagahatigu mino'ehina. Lali ai fana meha'a abu go'ohune. Ai ya'ma moneko pana'mofihi fana meha'a afotifu ho lifigo o'ehina aitoga fuluna'a hiti ka lamana'a hiti bai toto mino'ehibe. Ai fana meha'aya pana'a yege'a aigo afo'afitogati li'ehina.

Yoni 9:24

To Yuta bona'magi ketona kanagu bu pisi lu'ehina bomofihi aku'i kehe ite ago lu emi'ahana: Ya'ma hetofa huto hu keto'ehina'mu Hu'mamofihi ai'ago foke ka lu emibo. Ya'mana Yesu foipana lilata bo nohina keheliya i'ohune.

Aposolo 13:39

Mosehi keya ka'auba lenele'mo lenubuto bito foipatini li he'mito bebe sana bona'i yabe luto lenigi mehalina'mu yabe. Ya hu'ehina ya'ma bomofitoga komopa'ani emite minalanamagi asaga foipana'ani li he'mi epoloto enele'mo enubuto biloto bebe sana bona'i yabe luto enigi molo'ehibe.

Romu 3:20

To bona'i moneuba keya kalo mege'i moloba moloba nohigo keya kauba ana bomo Hu'mamofihi bulo le'mo bati mehilina'mu yabe. Ya'ma keya kauba ana bomofihi foipana'a lepilube'mu nohigo kehelilibe.

Romu 6:6

Koyapa'i hapati Kilisito hiti malipu yafalo fili'ehina ya'ma lali akeheli'ohune. Hena'mugope foipanauba lugufagu foya nolinamofihi amuya'a su ho letalibe. Ya hulenogo lali foipanamofihi kele kele yagapana'a aku'i meminaluta'mu yabe.

Romu 7:18

To komopa'nigu to fegutoga nugufagu hiti hetofa hapa'a menominabe luto keheli fe nolube. To hetofana suhi hilunamofihi komopa'nigu ya ni'igo yana suhi hilube'mu nohube luto'ni amuya'ni bati mehu'ehigo hetofana mehulata nohube.

Romu 8:32

Ai koyapa'i pana'a nu ki pili koto meminose lali kumu asaga'i ho lifito bona'magihi enayanugu epi'ehigo fili leto'ehina, ya'ma limi'ehina bo, Hu'mau, ai loe sana sana mina'a meni'inamofihi fa'mene limilina'mu yabe.

Romu 9:3

To Hu'mau enele'mo bati huloto to nani enali kumu yabe luto gumi'i nohoto Kilisitotogati nele'mo loko hulenogo, bati huto yabe nolube. Hena'mugope? Hu'mau ya hu netolenogo Yuta bona'ni enubuto bilibe luto bati huto yabe nolube.

2 Koliti 5:21

Kilisito ai foipana'a meni'ina bo ya'ma Hu'mau lali kumu luto lali foipanati ai gupisa'alo molo eto'ehina. Hena'mube? Ya'ma lali Kilisito hiti i hepiloto Hu'mamofihi bulo fotogo huto minalune luto yamofihi lolo hu'ehina.

Galesia 3:13

Ya huto ni'inaya keya kamomu'i lalitoga gumi'i ho'ehina'a kilisitou ai gupisa'alo li'ehina yabe. Ya huto keya kamofihi gumi'mofihi nagaluguti gulu ho leto'ehina yabe. Ananamomu'i mono bukugu ma luto ni'ina: Yafalo halana bomofitoga gumi'i tilibe. To Kilisitou ai lali kumu luto malipu yafalo fililoto ya'ma gumi'iloti lubuto bi'ehinagihe.

Galesia 3:21

To Moseu keya ka lu'ehina kauba ya'ma Hu'mau lu limito molo'ehina ka'a be ligilifihe? Ya huto meni'ibe. Keya kauba lali le'mo amuya moloto minolata nohuta nasana ni'itita yamofihi lama'naka luto keya ka lu'ehina kauba foipanati li he'mi letenogo Hu'mamofihi bulo lamana bona'i nehabe luto ligo minaluta kapoti huto hitine.

Hibulu 10:12

Kilisitou ya'ma foipanati su halibe luto ai'a golaha'atu mamufa gigo asu ho'ehibe. Yanamofihi gupisalo aku'i mamufa megilina'mu yabe. To ya huloto Hu'mamofihi yahi lamaga'aga mino moloto mino'ehina.

Hibulu 10:14

Ya huto komopati li gulu gulu hinogo lele'mo eto hulata kapolo bulata nohutamofihi mamufa moneko'i giloto lele'mo fotogo hulata kapolo malago asu ho'ehinamo ni'ibe.

Hibulu 2:14

To Hu'mamofihi yagapana'a enali ya'ma enugufa'ani hiti golaha'ani hiti ya'asigo minago nehanaya Yesu ana suhi huto lali lugufa to hapati li lolo hu'ehina. To ai'a nofilito ya'ma bona'i fililatanamofihi afo'afu ya'ma kaba bo, Sataha amuya'a hiti bomofihi Yesu amuya'a ho he'mito le'mo sibina hu'ehina yabe.

Hibulu 2:17

Ya hu'ehina'mu Yesu ai lali'i mamufa gi letolata boti sipi bo komopa'a molo letoto to Hu'mamofihi gobisalo foya amuya moloto lilatanamofihi minalibe luto bona'i lali'i foipanati okala hu letalibe luto ya'ma ai henana hu'ehibe? Ai lali hiti gonamu tamu'a lolo huto'a fili'ehinamo ni'ibe.

Hibulu 4:15

To mamufa gilata bo sipi boti ai kumu keta lebesigo ya nohutogo komopati lapa bise'namofihi kehelito lali'i bu logoto menohe'mi letabe. Lalitoga limi'i lama'i moloto lito nohinamofihi huto hulata nohina ana suhi huto aitoga mi'i ma'i moloto lito fato fato'mofihi huto hu'ehinamo ni'inaya aitoga foipana mone'a meni'inamo ni'ibe. Yana'mu ai lali kumu ginaga filata nohibe.

1 Pita 2:24

Lali foipanati yauba ai gupisalo tigo ai'a he'mu kito malipu yafalo fili'ehinamo ni'ibe. Lali foipana lilutana'mu filise bona'i suhi huto mopo mehuse'na minoto bati bati huto minolatanamofihi minete lite hilabe luto fili'ehinamo ni'ibe. To ai fuhe'a li'ehinaloti'i komopatini le'mo kosaba hu'ehinamo ni'ibe.