Romu 14:10 - Ka Lamana'a Monoꞌi Lu Mu Tifiꞌehina Ka Yabe

¹⁰ Ya hina'mu lenali henabe lite bonatinimofihi ka emekite ka'a loko nehabe? To henabe lite le'mo laba nehabe? Hu'mau kefa hisalo minoto kaga loko huse yupahi lali asaga'i bu'alo ho tito minolenogo lali kumu ka foya liloto kaga loko hilina'mu yabe.

Romu 14:10 ပူးပေါင်းရင်းမြစ်များ

Matiu 7:1

Lenali bona'i enipakafa hete enele'mo yegelo memalalo. To Hu'mau alihi lenali'i lenele'mo yegelo ana huto memalalibe.

Luku 18:9

Bona'i luga'amagi lali bati bona'i nohune lite enali'ani enugufamofihi fokehi nehite to fato bona'momu'i enali bati mehana bona'i nehabe lite lilata nehana'mu Yesu ma bame ka lu'ehina:

Luku 23:11

To Helotiu gimi bo'a hiti Yesu kaga foipa foipa'a lu etelete kiya hu ete'ahabe. Ya nehite enali kata mone hetofa fayaha'auba lubo labo lu'ehina katatu'i hepi etelete he'mi etago Pailatiu nohinalo aku'i bu'ehina yabe.

Yoni 5:22

To afo'afu bona'i foipanalo ka foya melilina ai Pana'amofitoga ana lili'na molo'ehinago aisigo foipa bona'i ka foya li epalalina'mu yabe.

Aposolo 10:42

Filise bona'ifi to kosaba bona'ifi enali kaga'ani loko hu epalalina bo Hu'mau le'mo ho ti'ehina'mu luto loho lifigo lu yege nohone.

Aposolo 17:31

To ai asaga melugu bona'i ka foya liloto guna ilube luto limilina kana'a molo eto hu'ehibe. To ai ya'mana lili'na lilibe luto bo mone le'mo ho ti'ehinauba guna i epalalibe. Ai ana bo fili'ehinagati le'mo ho tilotomo ya'mana asaga bona'i enelepigo be gete keheli'ahabe.

Aposolo 4:11

Yesuhi ai kumu luto mono bukulugu ma luto ni'ina yabe: Efaha nohi gilata bomagita laga melepesina efahuba aliha'a sipi huto huto hetofa amuya efahi lolo hulata nohibe.

Romu 2:16

To mone sipi yupahi Hu'mau ka foya molobo luto Yesuhi lu emilina kanagu ai bona'magihi suguna ka lilatana to enegekesa kehelilatana komopa'anigu lolo hi'ahanamofihi lu hokolo hu epololoto kaga'ani loko hilibe. Yana'mu nani Yesuhi hetofa ka lamana'aluguti lu yege holata nohube.

1 Koliti 4:5

Ya hu'ehina'mu lenali bona'magihi hapa'ani'mu lilata nehana amuya memalalo. Sipi Bouba ai'a i behe huto oto suguna'i fenene huto ni'ina nasana yamofihi le'mo hutotoga malalube'mu hibe. To bona'magita legekesa kehelilata nohutaga hiti ya'ma li huto hu su halube'mu hibe. Ya huloto Hu'mau ai'a bona'magihi hapa'ani moneko moneko'isi bu galina guna moloto enele'mo hetofa hu epololota liyafa hilube'mu hibe.

2 Koliti 5:10

Yamofi kumu ya'ma luto ma keheli'ohune. Mega lugufa hiti nohuto ana'ina lito moloto hu'ohuta bati huto ni'ifi to sibina huto ni'ibe yamofihi mone kegi'a ai eto eto huto kaga loko huto pa sose'na limilibe luto minoto lali asagatoga Kilisitohi ka foya kefa hisalo ho tiloto kululu tito nehetilune.