Romu 12:9 - Ka Lamana'a Monoꞌi Lu Mu Tifiꞌehina Ka Yabe

⁹ Lenali leniginaga fise'namu fato bona'mofihi leniginaga fi emite lusiga lite komopatini emilo. Foipa faipa huse'namofihi hapa'a lagati melebesibe lite lenemegesa hu emilo. Ya hite, asaga lamana huse'namofihi li pili kete mineme bite minalo.

Romu 12:9 ပူးပေါင်းရင်းမြစ်များ

Matiu 26:49

Yutasiu nehetiloto Yesu nohinalo fu luto buto ma luto lu'ehina: Tisao, folugu'i yabe, luto soso hu'ehina. Ya luto luloto Yutasiu Yesuhi nu ki'ehina.

Yoni 12:6

Yutasiu ya luto faga lu'ehina muhi menina bona'i kumu kaba mehu epolose ai gumina lilata bo nohibe. Ai'ago efaha gu'i lito kaba hulata aku ai hapa'a ana efaha gu'moguti gumina lilata hu'ehina.

Aposolo 11:23

Banabasiu ana hepato buto henetiloto Hu'mamofihi boana'a bati hite nehago bu enogoloto gelo sipi biloto bati hite nehanagi ana suhi lite fulunaguti koguna ite asaga komopatini Sipi Bomofitoga emite mino mana hilo luto enogo'na bi'ehina yabe.

2 Koliti 6:6

Ya huto nominotaya komopati besa lago nohuto kehelise'na minoto komopati fulu higo minoto lalalutigihi noenehe'motogo Sikalafu'i hiti minoto komopati bati huto epilata nohune.

2 Koliti 8:8

Nani lenogo'na bito melu'ohube. Mono ka nekehelina bona'magihi luga'aga ana foya'mu babahi hi'ahabe. Yamofihi lu lepinogo'ni lenali enehe'mose'na legege hite ya'ma huto ni'inamofihi hapa'a huto hilibe luto nolube.

1 Tesalonika 2:3

Lenegekesa lito lu lepilata nohuta yamofihi keheli sibi saba hite foipa foya'mu kehelito lu sibina sabana huto lenimi'i moloto lu melepi'ohune.

1 Tesalonika 5:15

To foipanamofihi nona'amu yabe lite ai henogo ai henogo li muyalo li malo mehilo. Ya hu lalune lite lenalitogati to bona'i asagatoga ana'ina li lamana hu epalalune lite amuya melete minalo.

1 Tesalonika 5:21

Ka'ya asaga'i ya'ma keheliya ite li kehelite lite minalo. Lama'na ka ni'ifi foipa ka ni'ifi lite ana kaga fi taga hite kehelitetini to lamana'a ni'inogo yamofihi li pili kete minalabe.

1 Timoti 1:5

To nani ya'ma henabe luto nolube? Enali kehelilete komopa'ani mone keheli sibina mehise komopa'ani fulu hinogo minete to Hu'mamofihi agoya hu emite minalabe. To ya hite minete, Hu'mamofitoga enemehi emilana'mu yabe luto nolube.

Hibulu 1:9

ai ya'ma lamana kamofihi kibita hulata nohibe. To ana'ina foipanamofi kumu fatehi lolo hu etolata nohane. Ya hu'ehina'mu Hu'mau, afokafu, kele'mo ho ti'ehinagi to gelo bise'namofihi kimi'ehinauba kalalukafihi enebe ligi'ehigo hofa tose'naka sipi huto hu'ehinagihe.

Hibulu 12:14

Lenali bona'i asaga'i enali hiti koguna ite minalune lite nelite to komopatini hepinogo mino eto hite minalune litemo amuya malalo. Komopa'ani kolo tago nehilana'amagi enali Sipi Bomofihi be megalana'mu yabe.

Yemesi 3:17

Kokulumaluguti keheliya ise'na limilina yauba hapi fito komopati gulu gulu linogo minoto agoya bonako minototi fulunamofihi hapa'a lilata nohune. To fato bona'i bu enogoloto ginaga fise'na epiloto enele'mo lamana huto yamofihi legeya'a babu luto li huto hu leto'ehina ya huloto ligitagahi huto kenetufati loe lae hinogo faga faga luto meliluta'mu yabe.

1 Pita 1:22

Lenali kaga lamanamofihi kehelilata hite mege'i malalana ni'igo lenalitoga hapa'a lana'mu luto lenalalutinigihi komopatinigu faga melise lenemehatini lusiga lite epilata nehabe. Ya'mu yabe lite komopatini ai eminogo ai eminogo mu tifite minalo.

1 Pita 4:8

Ya nehite lenemehi ai eminogo ai eminogo hite minalo. Ya'ma hilana'auba silaga'na be ligi'ehina nasana ni'ibe. Komopa'ani epilatana yanauba foipana li'ahana asaga'i enebe ligilata nohibe.