Romu 12:3 - Ka Lamana'a Monoꞌi Lu Mu Tifiꞌehina Ka Yabe

³ To Hu'mau nele'mo hetofa hu'ehina bo noho lifi'ehigo nani ma kaga mone lu nolepube. Hu'mau keheli ule'ale huse'i fato fato'i guna ito lepi'ehina. Ya'mu lenali lenugufatini limo titi mehilo. Lenalitini be ligite kehelinogo mone'a hiti metilo. Hu'mau mono ka limi'ehinamofihi keheliya ite minete hapatini le'mo eto eto hite minalabe.

Romu 12:3 ပူးပေါင်းရင်းမြစ်များ

Luku 18:11

Ai Felosi bouba ho tiloto faha'alo buto ho tito nohuto ma luto nunumu komopa'agu hu'ehina: O Hu'mao, nani bona'i luga'amagi suhi huto menohube ya'mu nani kegepohi nolube. Bona'i gumina felete to bo alobo loko hila ya hila nehana bomagihi suhi huto naniya menohube. Ana huto ya'ma bo ai takisi lilata nohina bo legi huto menohube.

Yoni 3:34

Hu'mau ho lifigo o'ehina bouba Hu'mamofihi kaga'ago lu yege holata nohinaya hena'mugope Hu'mamofihi Sikalafu'auba aitoga bai to'ehigo yabe.

Romu 1:5

To Hu'mau Yesu kumu ai koko pana'ni nohane luto lu nimito nele'mo ho ti'ehina. Hena'mube? Nani asaga melugu bona'i kaga'a lu epinogomo ka kehelite komopa'ani Hu'mamofitoga mele emite minalabe luto ya'ma noho lifito ana lili'na sipi'a nimi'ehina.

Romu 11:20

O, lusiga nelabe. Ya'ma Yuta bona'i enali Hu'mamofitoga keheli ule'ale mehi'ahago Hu'mau laga hu he'mi'ehigo lenali aitoga komopatini emite keheli amuya malago ai li hepito molo lepolo'ehina. Ya hu lepolo'ehigo lenali yanana'mu lenugufa limo titi hu lalibe luto legeso hite lenelesatini nolinogo minalo.

Romu 11:25

Nalalu'nigitabe. Mone suguna ka lu lenelepilugi kehelilo. Lenali kehelite lali kehelise'nati sipi bati nohune lite lenugufa limo titi hu laligi ma kaga lu nolepube. Yuta bona'magi Hu'mamofihi enemegesa hi emiba emiba hite komopa'anigu ule'ale hise'namofihi kana'a mone su halina'mu yabe. Fegutoga bona'magi Hu'mamofitoga komopa'ani emilana bai tenogomo Hu'mau Yuta bona'magihi aku'i enele'malina'mu yabe.

Romu 12:16

To lenali moneko hepatoga neminana bona'magihi fulu hite minete komopatini moneko babeyafa hite minalo. Lenali bona'i enubulo hutu hata hilata to sipi bonako yaga foya bonako enele'mo fulu hilata mehilo. Lenali laba hite bona'magihi suhi hite neminanamofihi ya hite minalo. To lenali asaga'na keheli baga i'ohuta bona'i nohune lite ya lenekesa mekehelilo.

1 Koliti 15:10

Nani aposolo lolo huto nani hapa'ni fato fato huto ni'ina yamofihi Hu'ma komopa'a hokolo hina bouba lu netago lolo hu'ohube. To ai komopa'a bati hina bouba aposolo lili'nalo nele'mo malago fa'mene lolo mehube. Nani foya li'ohuna yamofihi aposolo luga'a enebe ligito li'ohuna yabe. To nani hena'niloti lutine? Hu'ma komopa'a bati hinauba nanitoga minago li'ohube.

1 Koliti 3:10

Hu'mau lili'na nimi'ehina'mu luto nani nohi gise'namofihi lamana'a ufe'ye yafa lukesa lito fi'ohuna. To anamofihi gupisalo bona'i luga'amagi molo emite nohi gilata nehabe. Lukesa fugo mino'ehina ya'ma Yesu Kilisito yabe. Ya'ma li sigito mone fato lukesa aku'i filana'a meni'ibe. Yana'mu nohi neginamagi keheli fe lite minete kaba hite gilabe.

1 Koliti 7:17

Lenali lenemeto lenemeto hite Sipi Bomofihi suhi lolo hite minete lite hilabe luto lu lepolo'ehina to Hu'mau elesa molo emina yupahi lolo huto moloto minolata nohina yanamofihi mono kagagu minalo. Nani noto noto Yesuhi naga'amagihi ya'ma kaga lu epito lu laga hulata nohube.

2 Koliti 10:13

To laliya Hu'mau melimi'ehina foya sokapo kumu lugufati li ho tiluta meni'ibe. Ai'a limi'ehina foya sokapo hiti lili'na hiti ya'ma'asigo liluta ni'ibe. To ana amuya'a hiti lili'na'a hiti limi'ehinana mone lenalitoga liluta luto lu limi'ehina yabe.

2 Koliti 12:13

To lenali henana'mufi sa sa hilete Hu'mamofihi naga'amagihi li gehesa luga'a lenali babeyafalo meni'ibe. Nani lenalitoga moneko nasana huto mehu'ohunana ni'ibe. Nose'natini to ana'inatini lenebesilito kalana'i memolo lepolo'ohunamo ni'ibe. Ya huloto lenele'mo sibina luse'na yamofihi lenali keheli sibina hite hi'ehilanamo yana'mu foipana'ni he'milo luto lenoloka halufihe, ya?

2 Koliti 12:7

Sipi Bomofitogati ana'ina kosaba'i bu goto moloto hu'ohunamofitoga komopa'ni ti lalibe luto nugufa meme'agu ema ufeha'a hiti nasana monetu fi'ehinamofihi Satahi kele kele pana'a moneuba ai komopa'nitu kehelinogo ti lalibe luto nayaha'ni nalapihe luto lu'ehinamo ni'ibe.

Galesia 6:3

To bo moneuba fa'mene lusi bo menohina'auba ai'a kumu nani sipi bo nohube luto hapa'a futu'a suhi huto ni'igo kehelilina'a ai keheli sibina huto negi nose suhi nohilina'mu yabe.

Efeso 3:2

Lenali nani kumu keheli'ahabe luto keheli'ohune. Hu'mau mehi nimito lenalitoga mono foya lilane luto lu neto'ehinamo keheli'ahana ni'ibe.

Efeso 3:4

Lenali ya'ma leka sete nekehelite nani Hu'mau suguna huto Kilisito kumu lu'ehina suguna ka'amofihi hapa'a ya'ma komopa'nitu keheli fotogo huto kehelilatana to bu go'ohuna'a lenali kehelilabe luto ana fayahi koyoto lepi'ohunamo ni'ibe.

Efeso 4:16

Lali ya huto aitoga hepito minenogo ai kaba hu noletabe. To lali gumita'a fato fato nekisa'a moneko moneko nominenogo, ai fato fato nagatu lele'mo hepilago moneko gufa'a lolo huto nominone. To lali ya huto nohutogo fato fato nekisa'a lili'na'a li bati bati hulata nohigo ai ginaga fi emigo ai ginaga fi emigo huto nohigo gufa'a asaga'i moneko huto amuya moloto hofa notabe.

Filipai 2:13

Hu'mau komopatini le'mo bati nohigo ai lili'na'a amuya melete ai amuya'alo neligo to legeya'a li huto hilata lenele'mo hetofa hulata nohibe.

Kolose 1:29

To nani ana lili'nalo amuya moloto liba liba nohube. Komopa'nigu Kilisitohi amuya'auba nehe'mago ana lili'na nolube.

Kolose 2:13

Lenali koyapa Moseu keya ka lu'ehina kamofihi mekehelise fegutoga bona'i minete foipa faipa hapatini hilata hi'ahanaya Hu'mamofitoga filise'nalo mine'ahana yabe. Yalo Hu'mau Kilisitohi le'mo ho ti'ehina suhi huto lenele'mo ye ko'ehina. Hu'mau foipanati asaga'i li he'mi leto'ehinagihe.

1 Timoti 1:14

Ya hu'ehigo Sipi Botiuba mehi nimito to nehe'mose'na'a babu luto nimito keheli nele'mo amuya moloto to Yesu Kilisitou buto i ke'moto yabe luto komopa'ni emi'ohuna yana'mu nele'mo ule'ale hu neto'ehibe.

1 Timoti 2:15

Ya hu'ehinamo ni'inaya ana'i ya'ma enali mono kamofihi keheli ule'ale hite Hu'mamofihi enemehi emite komopa'ani gulu gulu linogo minete ya suhi ma suhi hilanamofihi sibina hu lalune lite enugufa'ani kaba hite limi melete minalana yanauba yagapana'i ketalune'mu nehago Hu'mau enubuto bilina'mu yabe.

1 Timoti 2:9

To ana'i enalitoga nolube. Enali kakili'ani li lamana hite bilete libe fitobe hite humofa'na hilenogo yanauba bati hilube'mu hibe. To bomagihi enumu fililibe lite kehelite mine'ahana yauba oka'ani sekele mamu'ani enugufalo pesesu'ani goli efahi hiti, to gu kata'ani ya'ma mina'a sipi'a i hepilune'mu nehana, o'e luto lu laga nohube.

Taitasi 2:12

Ya higo ai lehe'molata nohinauba lemehati haya kolo'ehina lele'mo bebe solago ya'ma melugu fegutoga nasanalo libita hu'ehinana ya'ma he'mito ma melugu komopati lugufa kaba hu bati huto mino fotogo huto minoto mono bona'i lolo huto minalune'mu hune.

Taitasi 2:2

Ya huto lu epiletogo bona'i olopa napa'amagi eto hite legeso fulu hite komopa'anitu keheliya ite minete komopa'ani enugufa kaba hite nehinogo mono ka keheli ule'ale nehana'a to enemehi epilana'a to baga'a hiti'namofihi komopa'agu minalana'amofihi koli'a finogo bati hite minalune'mu habe.

Taitasi 2:6

Ana suhi huto neheya kola bona'magihi enegekesa lito lu epitogo enali komopa'ani enugufa kaba hite mino eto hite minalabe.

Yemesi 4:6

Ya hu'ehinaya libita hulata nohinana laga mehinana'mu keheli meemilabe luto lele'mo hetofa hulata nohibe. Mono bukugu kaga ma luto lu'ehinamo ni'ibe: Hu'mau ai'a enugufa limo titi bona'magihi enele'mo fitu fo he'milata nohinagi agoya hu neemina'amagihi enele'mo hetofa huto enehe'molata nohibe, luto lu'ehina.

1 Pita 1:13

Ya'mu komopatini li hokolo hite lenegekesa kehelilo. Kaba hu bati hite minete Yesu Kilisitou alihi huto hinogo ya'ma lusa gi lepalalina'a yalo'i geba hilete asaga'i keheli ule'ale hite fifa ilete minalo.

1 Pita 4:11

Luga'a enali mono ka lu huto hilanamagi Hu'mamofihi keheli lamana hilete lu epilabe. To luga'a enali bona'i enele'mo bati hilanamagihi ya'ma Hu'mau amuya epilenogo yanatu'i lolo hi epalalabe. Lenali ya suhi ma suhi lolo nehinogo Hu'mamofihi fayahuba bati huto minalibe lite kehelite ya hilabe. Yesu Kilisito ai kumu yabe luto fayaha'auba hu lamana hilibe. Yamofihi sekele mamu'a hiti fana mehena amuya'a hiti aitoga minalina'mu ya'ma minomo tito buto mino bai toto minalibe. Ma'naka.

1 Pita 4:7

Ana'ina silaga'na su halina kana'a anasi tupa nohibe. Ya'mu lenali komopatini to lenugufa kaba hite keheli bati hite Hu'mamofitoga kaga luto loka halune lite babahi hite minalo.

1 Pita 5:5

To neheya kola bo lenali ana hite olopa bomagihi agoya hu epite limite minalabe luto lu nolepube. Ya nehite lenali asaga'i lili'namofihi kibi bite ai agoya hu eminogo ai agoya hu eminogo hite minalana nasana lite kele kele pana'a suhi hite minalabe. Yamofihi mono bukugu kaga mone fayahi keye'ahanamo ma huto ni'ibe: Hu'mamofihi ai enugufa'ani lelite tilata nehana bona'i enali lukesa'ani sigilata nohibe. To bona'i limite minana'amagihi ya'ma enele'mo hetofa huto enehe'molata nohibe.

1 Pita 5:8

Lenali lenegekesa keheliya ite kaba hi etete minalo. Fatehatini ya'ma Satau, ai lopi kala ya suhi huto mino'ehina kala bo mone heni etalufi ai heni etalufi luto sa sa huto bula ola huto mone le'mo sibina hilina'mu yabe

3 Yoni 1:9

Nani Kilisitohi yagapana'magihi ya'ma fayahi hupamone'isi mone koyo'ohunaya, Tiotelefeu ai bo enogo'anifita minalube luto lulata nohilina kaga'ni ya'ma keheli he'milata nohibe.