Romu 12:12 - Ka Lamana'a Monoꞌi Lu Mu Tifiꞌehina Ka Yabe

¹² Lenali Hu'mamofihi bu galana yupahi mineme bite geba hilananauba lenele'mo amuya melenogo lenofokehi lilo. To keta huse'nauba lenalitoga huto nohinogomo komopatinigu fulu huse'na'mu Hu'mau lenehe'malinamofihi geba hite minalo. To asaga yupahi kosele'i melenehenogo Hu'mamofihi loka hete nunumu hilo.

Romu 12:12 ပူးပေါင်းရင်းမြစ်များ

Matiu 5:12

Ya nehinogomo kugufaluga laga kebesinogo kegelo bibo. Sipi minaka kokuluma hepatoga Hu'mau kaba hu keto'ehina kimilina'mu yabe. Koyapa'i ana suhi hite lu yege hose bona'i kohe tete huto hanamagihi enegene mane ite enehe'ahana yabe, luto Yesu lu epi'ehina yabe.

Luku 10:20

Ya hu'ehina lenali lenegelo bite foipa felemagi kagati keheli limibe lila o'e luto'ni ya nasanamofi kumu lenegelo mebibo. Lenagitini Hu'mamofihi kokulumalugu fayahi ge'ahana yanana'mu lenegelo bilo, luto Yesu lu epi'ehina.

Luku 21:19

Lenali amuya melete kehelise ule'ale hite mino bati hite nehite aku'i lenali mino bati huse hepatini lilabe.

Luku 8:15

To nose'na biha'a me'i bati huto nogoya'a ninalo limo ito bati huto tinamofihi hapa'a ma huto ni'ibe, bona'i enali ka keheli ule'ale hite lilete amuya melete minago enaliluguti nose'na biha'a huto huba huba hulata nohibe, Yesu ya lu'ehina yabe.

Aposolo 1:14

Ya'ma bo asaga'i enali komopa'ani monetoga melete li nupa hite numuna hite minelata hi'ahana. To ana'i luga'a hiti to Maliau Yesuhi ito'afi hiti to gonamu tamu'a enali ana hite moneko ete li nupa hite nunumu hite mine'ahana yabe.

Aposolo 12:5

Ya higo Pitau nagalugu nohigo gimi bomagi kaba hi'ahana. Ya'mu lite enali Yesuhi komopa'ani emite minana bona'magi Hu'mau he'malibe lite amuya melete nunumu hi ete'ahana yabe.

Aposolo 2:42

Enali aposolo pana'magi kaga'ani mone'a hiti kehelilune lite amuya mele'ahana, to enigibo nagabo enehe'mola, nose'na monekolugu li nupa hite nela hite to nunumu monekolugu li nupa hilete hilata hi'ahana yabe.

Aposolo 6:4

Ya hinogo laliti nunumu huse'na hiti to boana'i kaga lu yege hose'namofihi lili'na'asigo li eto huto lito bilune.

Romu 15:13

Nani Hu'mamofihi loka noho lepolobe. Lenali Hu'mamofihi keheli ule'ale hite neminenogo ai'a gelo bise'na to fuluna'a hiti lenalitoga huto hinogo lenifita ilata nehana'a mone hiti le'mo hofa talina'mu yabe, nolube. To Sikalafu'uba lenele'mo amuya melenogo lenifita ilete kanihi sipi fino, luto nolube.

Romu 15:4

Ya'ma koyapa'i mono bukugu fayahi ge'ahanamofihi asaga kagauba Hu'mamofihi biluta kapo'mu lelepito bu megose'namofihi geba huto mino lito buto lele'mo amuya malalina'mu yabe.

Romu 2:7

To bona'i luga'amagi Hu'mamofitoga agoya hu emite hetofana hiba hiba nehana to fana tose hepato bilune'mu nehite Hu'mau lele'mo ho tilibe lite nelana mino kosaba huse'namofihi kapogu bilune'mu nehana enali'i Hu'mau enele'mo kosaba hilibe.

Romu 8:25

To lali mone bu megose'namofihi geba huto hugo Hu'mau limilina'mu yabe luto geba huto minomo buto kosele'i melohose huto minalune.

1 Koliti 13:13

To minoba minoba hilana nasana ya'ma yabe. Hu'mamofitoga keheli amuya nomolota to huto hilina'a sa sa huto geba nohuta to liginaga fise nohuta yamofihi nasana loebe monebe nehanaya liginaga fise nohuta yamofihi le'mo kohe to'ehibe.

2 Koliti 12:8

Ya hinogo he'mi neto lalibe luto Sipi Bomofitoga kana loebe monebe yupahi loka ho'ohunamo ni'ibe.

Filipai 3:1

Nalalu'nigita, ka mone ya huto lu su halube'mu nohube. Sipi Botiuba komopatinigu sabiyana lolo hu lepalalibe. Ana kaga ana suhi huto koyoto aku'i lu lepilube luto keheli'ohuna ya'ma kana keta mehu'ehina to lenalitoga ya'ma mino moloto nohuto lenele'mo hetofa hu lepalalibe.

Filipai 4:4

Lenali asaga yupahi Sipi Bomofitoga i ke'mete yanamofihi komopa'agu minete lenegelo bite minalo. Nani aku'i lenegekesa lito lilube. Komopatinigu haya inogo minalo.

Kolose 1:11

To Hu'mamofihi amuya'a lenalitoga huto hinogo yanauba amuya molo lepalalina to lenifi taga huse'na huto nohinogomo kosele'i mehese aitoga ule'ale hite minalabe luto luloto to Hu'mau komopatinigu sabiyana lolo hu lepalalibe luto loka noho'ibe.

Kolose 4:12

To lenali bonatini mone gi'a Epafalasi ai Yesu Kilisitohi lili'na bo'a lolo hu'ehina bouba ana huto lenali kumu nehafiye luto nolibe. Ai asaga kanagu lenali Hu'mamofitoga loe lae mehise ule'ale hite minete agoya hi emite minalabe luto nunumu huto amuya moloto Hu'mamofihi loka hoto nominabe.

Kolose 4:2

To kosele'i mehose amuya melete Hu'mamofitoga fokehi nelite nunumu hite Hu'mamofihi loka holata nehite minalo.

1 Tesalonika 1:3

Lenali Hu'mamofitoga keheli amuya melete minelata nehana yamofihi lamana'a ya'ma li huto nehabe. To komopatini emilata nehite foya'a amuya melete minelata nehabe. To Sipi Bo Yesu Kilisito alina kumu yabe luto keheli ule'ale hite geba hite minelata nehabe. Ya'ma afotifu Hu'mamofihi ai gobisalo kehelito fokehi holata nohune.

1 Tesalonika 5:8

To lali fana mehenamofihi naga'i lolo hu'ohuta ya'ma komopati kaba huto minalune. Ya nohuto Yesutoga keheli amuya malaluta to komopati asaga bonatoga epiluta yanauba heleguti lolo hilibe. To Hu'mau lubuto bilina keheli'ohutanauba lali latahati li sibina hu lalina kakiliti lolo hu letalibe.

2 Tesalonika 1:4

To bona'magi kalana'i mele lepelete kaso'a hiti'nagu he'mi lepelete te'ahago lenali lenaginaga fise'na lite mine'ahana Hu'mamofitoga keheli amuya melete ule'ale hite fa'mene nehabe. Yamofihi kehelilototi Hu'mamofihi yagapana'a mine lite bi'ahana enalitoga lenugufa lelito tilata nohune.

2 Tesalonika 3:5

Sipi Bouba komopatini le'mo babahi hinogo Hu'mamofitoga lenemehi emilata minalabe, luto nolune. To Kilisitou lenele'mo amuya hinogo kosele'i mehose ule'ale hite minalabe, luto lali nolune.

1 Timoti 6:11

Timotio, Hu'mamofihi foyalo pana'ase. Kai ana'ina laga mehina'a kemegesa hu emibo. Ya nohuto ya'ma mino lamana huto bati huto minoto lito huse'namofihi mono ka'a hiti minolatana, keheli ule'ale hulatana, komopaka epilata nasana, kalana'i mele ketalana nasana huto nohinogo amanapa huto minose'na enele'mo baba ise'na ya'ma molo emito minalube luto amuya malalatagihe.

2 Timoti 3:10

To kaiba, nani hapa'ni akeheli'ahane. Nani minoto hu'ohuna kai ya'ma minoto lolo huto moloto hu'ohuna to mono ka fi lehe toto moloto hu'ohuna, foya li'ohuna yamofihi hapa'a kelepi'ohuna, to keheli amuya moloto mino'ohunamofihi ana'ina asaga'i kosele'i menehago amuya moloto mino'ohuna kai keheliloto nemege'i molo'ahane. To nemehi epito mino'ohuna, to baga'a hiti yamofihi nugupisalo tilago amanapa huto ho tito mino'ohuna, to kalana'i mele netago komopa'nigu gabu gise'namofihi komopa'agu mino'ohuna akeheli'ahane.

Taitasi 2:13

Ya nohuto Sipi Boti, Hu'mau lubuto bilata bo, to Yesu Kilisitou fana meha'a hiti huto hilina kana'amu geba hulata nohuta, yamofihi sekele mamu'a hiti nasanamo ni'inaya yana'mu fifa ilata nohune.

Taitasi 3:7

Ya higo Yesuhi lehe'mose nasana'auba Hu'mamofihi bulo lele'mo bebe sose'namu to lali minoba minoba huse'namu fifa ilata nohutamofihi lilabe luto ya hu leto'ehinamo ni'ibe.

Hibulu 10:32

Lenali koyapa'i ana'ina lolo hite mine'ahanamofihi aku'i kehelilo. Kana'a ya'ma yupahi komopatinigu Hu'mamofihi fana meha'auba fi fana to lepelenogo keke'i luse'namofihi komopa'agu minete keta'a hiti foya lite amuya melete lite mine'ahana.

Hibulu 10:36

Yana'mu lenali keta'a hiti'namofihi komopa'agu mino fulu hite minelenogo Hu'mau lilina malalina ka'a kehelite nehinogo ana'ina le'mo babahi huse'namofihi legeya'a lilabe.

Hibulu 12:1

Keheli ule'ale huse'namofihi hapa'a li huto hi'ahana bona'i samahi tite sopopo suhi hite minete lele'mo bego bego hi'ahanamo ni'inagihe, yamofihi fifa ilata nehana bona'magi hololu lilata nehanamagihi hapa'ani'mu kehelito minoto keta'a hiti nasana ya'ma gololo tito li he'milune. To foipanamofihi hapa'auba lugufalo naga'i gi'ehina hiti li toba hoto li he'milune. Ya hulototi kapo lelepi'ehina analo kosele'i melehenogo hololu luto fotogo huto bilunagihe.

Hibulu 3:6

Ya huto mino'ehinaya Kilisitou ai ya'ma pana'auba Hu'mamofihi noha'alo lolo hi tegi hite mine'ahana bona'magihi kaba nohu epoloto Hu'mau lu'ehinalo foya amuya moloto lilata nohibe. Noha'aya lali ya'ma nohune. To yamofihi fa'mene'mu meni'ibe. Ana'ina le'mo babahi hu leto'ehina yana'mu luto ka'a li pili koto agoya hu emito minoto komopatigu bati nohinogo keheli emito mino lito nobinogo kanati su nehenogomo ya'ma Hu'mamofihi noha'a lolo huto nohune luto lilune.

Hibulu 5:7

Yesu ai metoga mino'ehina kana'alo Hu'mamofihi kehe sipi igo bu nogoya nolimigo sipi nogo moloto buka tito ya'ma fili'ehinaguti le'mo gelehe higo yamofihi buto bise bo, Hu'mamofihi amuya moloto loka ho'ehina yabe. Ya higo Hu'mamofihi maha'aluga limito mino'ehina'mu luto to agoya hu emise'namu Hu'mau keheli emi'ehina.

Hibulu 6:12

To lenali fa'mene fuli meminese bona'i luga'amagi keheli ule'ale hi'ehite to kosele'i melenehenogo geba hilete minete ana'ina'mu lu molo lepolo'ehina yamofihi lilata nehana bona'magi bilata nehana kapo analo enigigusa ite bilabe luto nolube.

Hibulu 6:15

To Abalahahi Hu'mau lu eto'ehina kaga'mu yabe luto kosele'i mehago geba huto mino lito buto legeya'a ligo ai'na lolo hu'ehina.

Yemesi 5:7

Nalalu'nigita, Sipi Bo i behe huto alina kana'amu kosele kasele'i melenehenogo ai kumu bati hite minalo. Lenali akeheli'ahabe. Biha'a ho kefe'ahana bomagi foya'ani he kelelete kohe toto noina ko'i hiti to alihi noina ko'i hiti ilago nose'na kana huto huloto nose'na legeya'a lamana'a nalune lite kosele'i mehese minelata nehabe.

1 Pita 4:13

Koyapa'i Kilisito sipi keke'i luse'namofihi gupisalo ti'ehina ya'ma lenali ana hite Kilisito kumu leniginaga fi'ehina yamofihi komopa'agu mine melete minete komopatini bati hinogo minalo. Ya hite nehinogo lenegelo bise'na'a hiti fana tose'na'a li huto hu lepinogo ana suhi huto komopatinigu ana'ina kosaba nohinogo lenegelo bite minalabe.

1 Pita 4:7

Ana'ina silaga'na su halina kana'a anasi tupa nohibe. Ya'mu lenali komopatini to lenugufa kaba hite keheli bati hite Hu'mamofitoga kaga luto loka halune lite babahi hite minalo.

2 Pita 1:6

Hu'mamofihi hapa'a kehelilatana komopatini mega lenugufa'a ni'ina kaba hulata nasana yalo'i molo emilabe. Yamofihi komopa'agu amuya melelenogo mine lite nebinogo ufeha'a hiti nasana huto fi siti bite minelatana yalo molo emilabe. Kehelite fi siti bise'na ya'ma Hu'mamofi kumu agoya hu emilatana nehana enali yalo molo emilabe.

Huto Hilina Ka 13:10

Luga'amagi enali naga nonugu minalabe luto lu'ehinamo ya'ma minalabe. Moneuba ai emita'i yatamatu bo mone ho fililenogomo ana hite yatama emitatu ana bo ho fililabe. Hu'mamofihi nona'a pa sose bona'magi ana yupahi ya'ma li hetofa hite keheli amuya meleteba minalafa.