Matiu 26:13 - Ka Lamana'a Monoꞌi Lu Mu Tifiꞌehina Ka Yabe

¹³ Nani ma'naka luto lu nolepube, asaga noto noto kapoga ma a'uba li huto hinanamofihi hetofa kaga'a lu yege halabe, ya hilete enali enekesa yigi emite ai kumu'i enekesu mehalibe.

Matiu 26:13 ပူးပေါင်းရင်းမြစ်များ

Matiu 24:14

To Hu'mamofihi kapo'amu luto ka lamana'a ya'ma asaga noto noto kapoga lu yege henogo asaga boana'i kehelilete fato fato hepalugu bai toto ana kana'a su halina'mu yabe.

Matiu 28:19

Yamu'i lenali asaga melugu bonatoga bite nani naga'ni enele'mo lolo hilo. To ana bona'magihi afo'nifihi gi'alo hiti pana'amofihi gi'alo hiti to Sikalafu'mofihi enigilo li melete nagami'i folo epalalo.

Maki 13:10

Yata'a kohe toto lenali nani'ni hetofa ka lamana'ni asaga noto noto kapogu lu yege hete lu epinogo yalo alihi me'i asaga baga ito su halina kana huto hilibe.

Maki 14:9

To lusiga nolube. Alihi nani kumu ka lamana'a asaga melugu hepatoga bite kaga beto hite lu epilana nehite ya'ma a'uba hu neto'ehinamofihi ka'mu ana hite lu epilabe. Ai hu neto'ehinamofihi beto hite kaga lilabe.

Maki 16:15

To ai ma luto lu epi'ehina: Lenali asaga melugu hepatoga bite bona'magihi hetofa ka'ni ya'ma ka lamana'a lu epilo.

Luku 24:47

To ai gi'alo Yelusale hepatoti hapi filete kaga'a lite noto noto bona'i asaga kapoga lu yege henogo ai gi'alo komopa'ani i gelehe hilete foipana'ani'guti mino bati hinogo Hu'mau foipana'ani li he'mi epalalibe.

Aposolo 10:4

Ya ligo Koniliasiu bu goloto koli huto loka ho'ehina: Sipi Bo, hena hibe? Ya ligo agelouba Koniliasihi lu emi'ehina: Asaga hetofa foya suhi nohatana'mu luto Hu'ma ekesu mehago nunumuka keheligo bati hu'ehibe.

Romu 10:18

To nani mone koloka halube. Ya'ma Yuta bona'magi Hu'mamofihi ka'a keheli'ahana meni'ifihe? O'e, enali akeheli'ahana yabe. Mono bukugu ma fayahi ge'ahana: Lu yege hose bona'mofihi nogo'ani asaga melugu hepatoga bula ola higo, boana'magi keheli'ahana. To ya'ma mono kaga'ani biba biba nohigo, silaga kapoluga boana'magi keheli'ahana yabe.

Romu 15:19

To huse mehuse suhi huto ule'ale nasana lito oto mololoto nohuto Sikalafu'amofitogati amuya liloto topa hose'na'a hiti lilenogo kehelilabe. To nani Yelusale hepatogati hapi fito Kilisitohi ka lamana'a asaga'i lu huto holito buba buba huto ya'ma me'i le'mo bego bego huto Ililikamu metoga buto lu yege ho'ohuna.

2 Koliti 10:18

Moneuba ai'a gufa'a lelito tito nolinogomo ya'ma fa'menena lolo nohibe. Sipi Bouba ana bomofihi gi'a le'mo ho tigo lamana'a lolo hu'ehibe luto lilune.

Kolose 1:23

To lenali yatai amuya melete Yesutoga minete komopatini emite minete ka lamana'amofihi yata'a keheli ule'ale hi'ahana kamu'i li pili kete ya'ma legeya'a huto hilinamofihi geba hite kehelise'natini mopo mopo mehilata nohigo ya hite minalo. Ya'ma nani Poluita, ka lamana'a nasanamofihi kele kele bo nohuna, asaga bona'i melugu neminanamofihi ya'ma nani ka lu yege holata nohunamofihi, ya'ma kehelilo.

Kolose 1:6

Ana ka lamana'auba lenali keheli'ahana kagauba buto asaga melugu bonatoga nehetito i futili huto enele'mo bati nohina yabe. Ana kaga hapa'a ma ni'ina. Hu'mau foipa bona'magihi enele'mo bati hulata bo nohibe. Lenali yata'a kehelite komopatini i gelehe hi'ahana supo hite fato fato bona'magi yatai ana hite hetofa kaga'a kehelite neminago Hu'mau lusa gi epololata nohibe.

1 Timoti 2:6

Ai'a ya'ma lali bona'i asaga'i foipanati'mu pa salube luto filito gufa'aloti lalimo mina fito lele'mo'ehina yabe. Hu'mau molo'ehina kana huto higo ai ya huto fili'ehina yabe. To hena'mube? Hu'mau yege yege bona'i enubuto bilina ipagu nohina'a kehelilune luto yabe.

Hibulu 6:10

Hu'mau ai'a mone li sibina huto ya huto menohibe. Lenali ai kumu yabe lite foya'a lite komopatini minalanamofihi lamana'a yamofihi Kilisitohi yagapana'a enele'mo bati hite lenemehi emite enehe'malata nehanamo yamofihi ai'a yana'mu ekesu mehalina'mu yabe.

Huto Hilina Ka 14:6

Agelo mone ya'ma ifo muyaluga ilege hoto nobigo bu go'ohuna ya'ma noto noto bona'magi ka lamana'a amuya moloto minoba minoba nohina ka'a metoga bona'i fato fato'i, to enugufa fato fato'i, ka'ani fato fato'i to naga'i fato fato'i lu huto hu epitomofa'na hu'ehina.