Luku 16:15 - Ka Lamana'a Monoꞌi Lu Mu Tifiꞌehina Ka Yabe

¹⁵ Yesu ma luto ana Felosi bona'i lu epi'ehina: Asaga bomagihi enubulo lenali bati hu'ohuta bo nohune lite lilata nehanaya Hu'mau komopatinigu bu go fulu tuto abu go'ehibe. Bona'magi enali hetofa fe'nohati yabe lite li pili kete minelata nehananaya Hu'mamofihi bulo kisilito tuguma bito bati mehinana ni'ibe.

Luku 16:15 ပူးပေါင်းရင်းမြစ်များ

Matiu 23:5

Asaga'na li huto hilata nehanaya enali bona'magi bu galabe lite li huto hilata nehabe. Enali mono ka fayahi ge'ahanana enogo gobisalo li hekelela to numuna fayahi ge'ahanana enayanugu sahi bila to yatama gukete'aniga naga ilago limila hite li hekelelata nehabe.

Matiu 6:16

Lenali mono ka'mu lite nose'na mo site neminetemo fagalo bomagi hilata nehana suhi hite lenokaba li sibina mehilo. Enali enokaba li sibina hilata nehanaya asaga boana'magi bu enegelete nose'na mo si'ahabe lite lu epalalabe lite nehabe. Nani ma'naka luto lu nolepube. Enali ya hilata nehana bona'magi mina'ani ali'ahabe.

Matiu 6:2

To fe'noha'a meni'ise bomofihi ana'ina he'moto emilube'mu nohutomo, kai fagalo bona'magi mono nonugu hila to kapo napagu hila nehana'a huto bona enubugu fi yotili katili ito bula ola mehubo. Ya hilata nehana bona'iya enali boana'magi bu lagalabe lite hilata nehabe. Nani lusiga luto lu nolepube. Enali alihi melilana mina'ani yatai alite neminabe.

Matiu 6:5

Kai nunumu hilube'mu nohutomo fagalo bomagi hilata nehana suhi kai mehubo. Enali mono nonugu ho tite nehite nunumu lilata nehabe, to hepalugu sipi kapo i loe lae hu'ehinalo bite bona enubugu nehite nunumu hilata nehabe. Nani lusiga luto lu nolepube. Enali mina'ani ali'ahabe.

Luku 10:29

Ya noligo ana keya kaga kehelise bouba ai'a gi'a le'mo bati hilube'mu Yesuhi ma luto loka ho'ehina: Kiyi'afu nani nalalu'nifu nohibe? luto Yesuhi loka ho'ehina yabe.

Luku 11:39

Felosi bouba ya huto ekesa yigi babu noligo Yesu ma luto lu emi'ehina: Lenali Felosi bona'i, lenali asaga yupahi kohatinimofihi fegu'aga le'mo gulu gulu lila to lapetinimofihi fegu gupisa'aga li gulu gulu lilata nehabe. Ya nehana lenali komopatinigu luba huse'na to foipa faipana babu luto bai toto ni'ibe, luto Yesu lu'ehina.

Luku 18:11

Ai Felosi bouba ho tiloto faha'alo buto ho tito nohuto ma luto nunumu komopa'agu hu'ehina: O Hu'mao, nani bona'i luga'amagi suhi huto menohube ya'mu nani kegepohi nolube. Bona'i gumina felete to bo alobo loko hila ya hila nehana bomagihi suhi huto naniya menohube. Ana huto ya'ma bo ai takisi lilata nohina bo legi huto menohube.

Luku 18:14

Yesu lu'ehina: Nani lu nolepube, takisi lilata bo ai Hu'mamofihi ipa'a emi'ehinamofihi ai ya'ma lamana bo yabe luto ligo noha'aga nobibe. Ya hu'ehina to ya'ma fato bo ai bati mehu'ehibe. To bo moneuba gi'a li saga hilube'mu lilina Hu'mau le'mo melugu nomoloto ni'ibe. To bo moneuba agoya huse to gi'a laba hilina Hu'mau fokehi hoto gi'a li saga hilina'mu yabe, luto Yesu lu'ehina yabe.

Luku 18:21

Ana bouba Yesuhi ma luto lu emi'ehina: Nani lagaso'asi nohuto'ni ana keya ka mege'i molomo molomo noona yatai hiti ana huto mege'i mololata nohube.

Luku 18:9

Bona'i luga'amagi lali bati bona'i nohune lite enali'ani enugufamofihi fokehi nehite to fato bona'momu'i enali bati mehana bona'i nehabe lite lilata nehana'mu Yesu ma bame ka lu'ehina:

Luku 20:20

Ya hago enali fato kanalo naga'i emilune lite mapahi fite bi'ahana. To Yesuhi mapahi fite minalabe lite bona'i luga enoho lifigo bi'ahana yabe. Enali ya'mana bona'i enali bati bona'i suhi hite Yesuhi lalu'agita nohune lite bi'ahana yabe. Enali ya hite bite nehite loka babu lite heba heba hite fi taga hi etelenogo ai Yesu kaga bati hinaga lilifi to bati mehinaga nolinogomo naga ito le'mete sipi gamani bo nohinalo bilune lite mine'ahana yabe.

Luku 20:47

Enali keto ana'magihi fe'noha'ani mone yupaha'a enimi'i melete gumina lilete to mone yupaha'a bona'magi enubulo lali bati bo nohune lite sipi nunumu yatamalo hilata nehabe. Hu'mau foipa bona'i enahalina yupahi ma bona'i lusina huto enoho fala kilina'mu yabe, luto Yesu koko panana'a lu epi'ehina yabe.

Yoni 2:25

Bona'magi kumu bo moneuba ya huse bo nohibe luto lu meemilina'mu. Hena'mugope ai asaga bona'i yege yege'i nehanamagi komopa'ani hiti hapa'ani hiti akeheli baga i'ehina yabe.

Yoni 21:17

To Yesu ge'noka mone hiti Pitahi ho'ehina: Simonio, Yonihi pana'a yale, nani kumu nokebesifihe? Ya luto loka hago Pitau kehelito Yesu loegi monegi loka ho'ehina kiginaga fi nonimitaya yana'mu ipa'agu gabu nogigo ka lu emi'ehina: Sipi Bo yale, kai yege yege'na keheli baga ito niginaga fi nokumunaya akeheli'ahane. Ya luto ligo Yesu lu emi'ehina: Kai sipisipi yaga'ni kaba hu epolobo.

Aposolo 1:18

Yutasiu Yesuhi fateha'amagi emina efatu'i me'i nesi'a mone mina fi'ehina yabe. Ai ana melugu buto ho kago ipa'a folaganuguti i hokolo gehesa higo asaga komopa'agu ninana fegutoga limi su hago fili'ehina yabe.

Aposolo 1:24

Ya hilete yalo enali nunumu ma lite hi'ahana: Sipi Bo, kai asaga bomagihi komopa'anigu bu go fulu tise bo nohane. To yamu'i, Sipi Botimaka, ma bo loeguti hiya bouba ya'mana hepa'i lito lili'na lilifi kai lelepibo. To Yutasiu kapo'aga bilube'mu nohuto aposolo lili'na he'mi'ehinana'a ana lili'na kosaba bo lilinamo ni'ibe.

Aposolo 15:8

Hu'mau asaga bona'magi komopa'ani bu go fulu tito bu nogana bouba ai komopa'ani bu gana bati hu'ehigo Sikalafu'i lali'i limi'ehina suhi luto enali'i epi'ehibe.

Romu 3:20

To bona'i moneuba keya kalo mege'i moloba moloba nohigo keya kauba ana bomo Hu'mamofihi bulo le'mo bati mehilina'mu yabe. Ya'ma keya kauba ana bomofihi foipana'a lepilube'mu nohigo kehelilibe.

Romu 8:27

Ya higo Hu'mau asaga bona'i komopa'anigu bu goto keheligo Sikalafu'uba enali kumu ekesa yigiba yigiba nohigo yanamofihi Hu'mau kehelilata nohibe.

1 Koliti 4:5

Ya hu'ehina'mu lenali bona'magihi hapa'ani'mu lilata nehana amuya memalalo. Sipi Bouba ai'a i behe huto oto suguna'i fenene huto ni'ina nasana yamofihi le'mo hutotoga malalube'mu hibe. To bona'magita legekesa kehelilata nohutaga hiti ya'ma li huto hu su halube'mu hibe. Ya huloto Hu'mau ai'a bona'magihi hapa'ani moneko moneko'isi bu galina guna moloto enele'mo hetofa hu epololota liyafa hilube'mu hibe.

1 Pita 3:4

Ya nehinogo ketipa ito fuluna'amofihi sekele mamu'a yauba amuya moloto minolatanamofihi yanauba komopatinigu kikipa hoto minolatana ni'ibe. To tafana meli'ohuta yauba ya'ma Hu'mau hapatini kehelito gelo binogo ya'ma mina'a tito minalibe lite lilabe.

1 Pita 5:5

To neheya kola bo lenali ana hite olopa bomagihi agoya hu epite limite minalabe luto lu nolepube. Ya nehite lenali asaga'i lili'namofihi kibi bite ai agoya hu eminogo ai agoya hu eminogo hite minalana nasana lite kele kele pana'a suhi hite minalabe. Yamofihi mono bukugu kaga mone fayahi keye'ahanamo ma huto ni'ibe: Hu'mamofihi ai enugufa'ani lelite tilata nehana bona'i enali lukesa'ani sigilata nohibe. To bona'i limite minana'amagihi ya'ma enele'mo hetofa huto enehe'molata nohibe.

Huto Hilina Ka 2:23

To ana a'mofihi yagapana'a enoho fili su halibe. Ya suhi hulenogo'ni noto noto bo mono ka keheli'ahanamagi nani bati'namofihi komopa'ani enegekesamofihi hapa'a bu go fe lu'ahata bo nohane lite keheliya ilabe. Nani bona'i asaga'i hite melete hilanamofihi afo'anifita pa soto nona'a eto eto huto epilube'mu nohube luto nolube.