Kolose 3:5 - Ka Lamana'a Monoꞌi Lu Mu Tifiꞌehina Ka Yabe

⁵ Lenali ma melugu bona'magihi hapa'ani li he'milo. Moko lise'na yagi, ana'i gumina folose'na yagi, kolotananamofihi hapa'a yagi, lenipagu keheli sibina huse'na yagi, to foipanamofihi hapa'a asaga'i komopatiniguti li he'milo. To ma me'mofihi nasana asaga'i laga lepesise'na yana'mu lu laga hite he'milo. Ya'ma melugu nasana laga lepesise'namoya lugefa suhi huto ni'ina melugu bona'magi Hu'mamofihi le'mo laba hilata nehana ana'ina melugu nasana'a liyafa hite kanihi filata nehana. Lenali ya'ma hapa'aya mege'i memalalo.

Kolose 3:5 ပူးပေါင်းရင်းမြစ်များ

Matiu 15:19

Ana'ina enipaguti tilata nohinana ma huto ni'ibe. Foipa enekesa yigise'na, bona'i enoho filise'na, bo alobo loko huse'na, moko lise'na, gumina huse'na, faga faga luse'na, to bona'i enipakafa hoto enemegeka luse'na yabe.

Romu 1:26

To ya nehana'mu Hu'mau ana bona'i bu enogoloto enalitogati he'mito megesa hu epi'ehina. Ya higo enali fato fato foipana'ani babu lite nelibe. Enali alobole nehana suhi he'mite fato suhi nehana. Ana'magi enali hapa'ani he'mite foipa hapa'amofihi mege'i melete ana'i fato fato'i moko liba liba hi'ahana. To bomagi ana hite ana'mo he'mite enipagu laga epesigo bonatoga bite moko nelibe. Ya hite, enugufa'ani le'mo sibina hi'ahago yana'mu enali foipana'animofihi nona'a lilabe.

Romu 1:29

Enali komopa'anigu li sibinana foipana fato fato'i babu lite bai tete minabe. Enali fe'noha'ani li moloba moloba nehite lalitisigo ni'inaga lite musufalo bomofihi meemise'na to kenasabo bise'na to bomofihi yogo fe'noha'a bu gelete lilube lise'na to enoho filise'na to luba hise'na to faga faga luse'na to enipakafa hoto enemegeka luse'na to bona'i mone kumu musi musi ka lilete faga luse'na nehana yabe.

Romu 6:13

To lenali lenugufatini mone kegi'a foipana lili'nalo memalalo. Ma'naka, lenali asaga komopatini hiti lenekesa yigise'na Hu'mamofitogago molo emilenogo foipanamofihi fili'ahanagati ho ti kosaba hite minalana suhi huto yabe. Asaga lenugufatini komopatini Hu'mamofitogago eminogo ai lili'na'a hetofanamofihi li huto hilibe.

Romu 6:6

Koyapa'i hapati Kilisito hiti malipu yafalo fili'ehina ya'ma lali akeheli'ohune. Hena'mugope foipanauba lugufagu foya nolinamofihi amuya'a su ho letalibe. Ya hulenogo lali foipanamofihi kele kele yagapana'a aku'i meminaluta'mu yabe.

Romu 7:23

To komopa'nigu ya nohugo nugufa'niuba fato hapa'a lolo huba huba nohibe. Ana hapa'auba hetofa negekesa'ni keheli'ohunamofihi luba nohibe. Keya kamu'i hetofana ni'ibe luto negekesa akeheli'ohuna yamofihi fato hapa'auba laba hu eto'ehina. Ya nohugo nugufa'nilo foipanauba le'mo sibina huto nugufa'nimofihi naga'i emilata nohibe.

Romu 7:5

To lali yata'a komopatimofihi hapa'a mege'i moloto mino'ohutaya keya kauba komopatigu foipa faipana li huto higo lugufatiuba ana suhi mege'i moloto filisemofihi nagalugu mino'ohuta yabe.

Romu 8:13

Lenali analoga komopatini mololenogo lenele'mo sibina hinogo fililana'mu yabe. To lenali Hu'mamofihi Sikalafu'uba lenele'mo amuya melenogo ana foipa hapatini keye linogo minoba minoba hilabe.

1 Koliti 5:1

Lenali kumu ma lite lama'naka lago nani keheluna: Lenalitoga moko lise'na fato'i Hu'mamofihi mekeheli'ahana bona'magitoga ya'ma sipi foipana huto mehuse'namofihi yana hiti huto huto ni'ibe. Lenalitoga bo moneuba afo'afihi liha'a ni'ibe nelago nokehelube. Yana'mu ya'ma nolube.

1 Koliti 6:11

To lenali luga'a koyapa'i ya suhi hite mine'ahanamo ninaya yatai foipanatini ahe'mi lepoloto Hu'mamofihi bona'i minalabe luto komopatini okala huto le'mo babahi higo nehabe. Sipi Boti Yesu Kilisitohi gi'alo yabe luto to Hu'mamofihi Sikalafu'amofihi gi'amu luto lenele'mo bati higo nehabe.

1 Koliti 6:13

Lenali ya'ma nose'na lipagu nasana ni'ibe to gupatigu ya'ma nose'na'mu ni'ibe lite lilata nehabe. Ma'naka nelanaya minoto Hu'mau ai ana hiti ana hiti he'minogo fa'menena lolo hilube'mu higo su halina'mu yabe. Lugufauba ya'ma moko'mu yabe luto meni'ibe. Sipi Bomofihi nasana ni'ibe. To Sipi Bouba ai'a lugufamofihi afo'afu nohibe. O'yo, lali aku alihi Hu'mamofihi bulo ho tito minonogo ai lugufa'mu ka foya li letalina'mu. To lali lugufatu Sipi Bomofihi gi'a li hofa talune.

1 Koliti 6:18

Lenali moko takolo nasana mele'isi he'mite bilo. Bona'i moneuba fato foipa nasana lilina ya nasanauba ai'a gufa'alo le'mo sibina mehilibe. To moko tako lilina ya nasanauba ai'a gufa'a komopa'a le'mo sibina hilina'mu yabe.

2 Koliti 12:21

Lenalitogati luga'amagi ema afeha'aga komopatini kolo tago, moko lise'na to mokolo'namu enegekesa yigi yigi hi'ahana'a ya suhi ma suhi huto komopatini li gelehe mehise ya suhi hite nehinogo lenalitoga buto nehetiluna yamofihi lenogobisalo Hu'ma'niuba nele'mo laba hilenogo lenali foipanatini'mu nipa'nigu ekesa ho lalibe luto nokehelito keta nonebesigo ya hulata nohube.

Galesia 5:24

To Yesu Kilisitohi naga'i lali tafa komopatimofihi bita hulata nasana to foipana'mu enuluhaya ilatamofihi aho filigo fa'menena lolo hu'ehinamo ni'ibe.

Efeso 4:19

To komopa'ani fi hekini lo'ehigo ana'ina foipa faipanamofihi komopa'agu minete moko huse'na fato fato'mofi kumu enibita higo kosele'i meenehenogo enubuya mehinogo lolo hilata nehabe.

Kolose 2:11

To lenali Kilisitotoga elago ai lenugufatini laga mehuse komopatinigu foipa hapatini amuya'a laga hu he'mi lepolo'ehina. Ya nohuto enugufa laga nehana suhi huto komopatinigu hu lepolo'ehina.

1 Tesalonika 4:3

To mone ka hiti ni'ibe. Lenali kumu Hu'mau lu molo'ehina ka'a ma ni'ibe. Sigiminaya li he'mite komopatini lamana hinogo minalo.

1 Tesalonika 4:5

Moko lise lenegekesa kehelise bo alobo topa helatana yamofihi meni'ibe. Fegutoga bona'magi enali Hu'mamofihi hapa'a mekehelilata nehite ya'ma foipa suhi hilata nehago lenali ya suhi hi lalabe lutomo ni'ibe.

1 Timoti 6:10

Yogo fe'no kumu topa holata nohutamofihi komopa'aguti fato fatomofihi foipana'a huto hilibe. Bona'i luga'amagi yogo fe'no kumu lilune lite yata'a mono kapogu bilatana he'mite fato kapogu i pebisa hete tili tele hi'ahana. Ya nehago enalitoga eniginaga fise'na silaga'i huto hu'ehina yabe.

Hibulu 12:16

Ya nehite lenalitogati moneubafi moneuba Isau bu'ehina kapolo mone mebilibe. Mokolo bona'i enali mino eto hite meminalata to metoga bona'i mone'amagi mono kagaloga mege'i memalalata ya suhi huto meminalune lite kaba hu bati hilo. Ya'ma Isau ai moneko nose'namu yabe luto ema'aga yege'a nohinalo alihi huto hu emilina felisa fe'nohi yama he'mi'ehinamo ni'ibe.

Hibulu 13:4

Bo alobole nemina'ina asaga'i ya'ma legeya'amofihi nasana'mu keheli emilabe. Bo alobolemale'i lolo neha'ina suhi lite li sibi mehilo. Mokolo'na to ate ate lite humofa'na nehana bona'i enali'i Hu'mau foipana'animofihi nona'a molo epalalina'mu yabe.

Hibulu 13:5

Lenali komopatini yogo fe'notoga mebino. Ana'inatini li'ahana legegeto yana'mu babahi hite le'mo fulu hilenogo bati hite minalo. Hu'mau ai'a ma luto lu'ehina: Nani mone mehe'mi lepalaluna'mu yabe. To nani lenalitogati mone bufa mehiluna'mu yabe.

Yemesi 4:1

Lenali henabe lite kenasabo bite luba hilata nehabe? Komopatinigu foipana lenibita hina nasanauba lenugufagu huto lilago luba huto hulata nohibe.

1 Pita 2:11

Nigibo nalalu'nigita, nani lenegekesa lito lu lepilugi kehelilo. Lenali Hu'mau kokulumagu nohina bomofihi naga'i nehanagi ya'mu ma metoga bonoho bo suhi hite to ka'i logo lili bo suhi hite minetetini lenugufatini laga lepesilatana nohina yauba komopatini luba li emilata nasanaya he'milo.

Huto Hilina Ka 21:8

To luga'amagi ufeha'a hiti nasana'mu enelesa lilina bona'i to mono ka keheli he'milata bona'i to kolo tanana lilata nehana bona'i to enoho fililata nehana bona'i to mokolo bona'i to nalisalo bona'i to faga lugefa enalapusa fi emilata nehana bona'i to faga fagalo bona'i ya'ma ya'iya nasana lite minelata hi'ahana asaga'i yege yegetoga enali nohi hepa'ani logo'a hiti nagami hefunugu kala efahi logo loto ni'inagu ya'ma minalabe luto lu'ehinamo ni'ibe. Ya nasanauba ya'ma filise'namofihi napa 2 lolo nohibe.

Huto Hilina Ka 22:15

Nohi hepa'i nosipetoga ema minalana'a enali kolo tanana li'ahana'a to nalisalo bona'i to mokolo bona'i to enoho fililata bona'i to lugefa nasanalo enalapusa fi emi'ahana bona'i to fagalo bona'i hiti enali foyati bati huto ni'ibe lite faga lilete komopa'anigu li sibina nehana'a ya'ma enali asaga'i fegutoga minalana'mu yabe. Enali hepalugu metilana'mu yabe.