Galesia 1:7 - Ka Lamana'a Monoꞌi Lu Mu Tifiꞌehina Ka Yabe

⁷ Ka lamana'a ya'ma fato fato ka meni'inaya fa'mene bona'i luga'amagi Kilisitohi ka'a ya'ma li sibina hilupi lite fato mono ka lu lepite komopatini li sibi sibi hite yamofihi suhi hilata nehabe.

Galesia 1:7 ပူးပေါင်းရင်းမြစ်များ

Matiu 24:24

To faga faga Mesiagi to faga faga kaga lu yege hose bo babu lite nehetilete Hu'mau enele'mo eto hu'ehina bona'a enimi'i malalune lite babeyafana lumofihi lumofihi fato fato'i li huto hilana'mu yabe.

Aposolo 13:10

Kai Satahi pana'a. Bati'na asaga'i ni'inamagihi kai fateha'ani yabe. Asaga faga faga hiti bati mehina suhiti kailugu babu lito bai toto ni'ibe. Kai asaga yupahi Sipi Bomofihi ka mana'a faga fagagu li mololata nohane.

Aposolo 15:24

Bo luga'a lali folagahatiguti lenalitoga bite kaga fato fato'i lu lepigo lenali'i keta lepesi'ehina lali akeheli'ohune. To lali ya'ma kaga bite lu epilo luto enoho melifi'ohune.

Aposolo 20:30

To lenali mone'amagi lenofolagahatiniguti huto hite faga lite Hu'mamofihi kagamo lu sibina sabana hite pana'alobo enali le'malabe lite kagamo lu sibina hite lilabe.

2 Koliti 11:13

Bona'i ya hana'amagihi aposolo faga fagamofihi to mono ka foyamofihi faga faga'a lite minete, Kilisitohi aposolo'a lali'i babeyafa'a lolo hilata nehabe.

2 Koliti 2:17

Lali bona'i luga'amagi hite melete nehana'a nehana ya suhi lolo hulata menohune. Bona'i luga'a asagatoga Hu'mamofihi ka'amu kehelilago kefahi li huto hu epilina nasana lolo hulago foya'a li etelata nehanaya lali ya'ma komopati lamana hinogo minaluta Hu'mamofihi bulo buto Kilisitotoga i hepiloto mono ka'a lulata nohune.

2 Koliti 4:2

Ya nohutoti foipana amuya'a hiti huto hu lalibe luto suguna huto sibi hapa'a lilata nasana lemegesa hu emiloto mone fagamofihi gupisalo minoto Hu'mamofihi ka'a li sibina hulata ya'ma ya suhi menohune. Lali Hu'mamofihi bulo ai'a ka'a lu aku toto ma'naka luto lu huto huto lu noleputogo bona'i asaga'magi lali hapati keheligo fu luto ni'ibe.

Galesia 1:6

Lenali ya'ma Kilisitohi lehe'mose nasanagu molo emilabe luto elesa molo epi'ehina bomofitoga mino hepi bati hite meminese lenemegesa hi emilete fato monolugu ya'ma bite lenegekesa melete kehelilata nehabe. Nani ya'mu ya'ma nehana'amu topa hoto oho luto nolu lepolobe.

Galesia 2:4

Aku'i ema afetoga bona'i luga'a enali minete fagalo bo ya'ma ete folagahatigu suguna'i nehetite mine'ahanamagi enali ya suhi huto gufa'a laga hu etalune lite li'ahabe. Lali Kilisitotoga buto molo emiloto minoto li mele'ahana kamofihi nagalugu memino'ohutamo ni'ibe. Enali yamofihi hapa'a bu galune lite nelite keya ka lu laga huto lu'ehinamofihi kele kele'i panana'a ana suhi hite kagagu lele'mo malalune lite kofohi kapo o'ehina.

Galesia 4:17

Ya'ma faga mono ka lu lepilata nehana bona'magi lenele'mo netibe. To ya'ma nehana lenele'mo bati hilabe menehabe. Le'mo kela ho tila hilenogo nani kumu sibina hi netete enali'ani enigi'ani le'mo saga hilune lite amuya melete nehabe.

Galesia 5:10

To lenali nanitoga bilabe luto kehelugo keta mehigo lu nolepube. Sipi Bomofitoga hepilata'mu yabe luto Hu'mamofihi fuluna'a lenugufaga ni'ilina'mu nani nokeheluna suhi huto lenali kehelilana yamofihi buto so kilune luto nokehelube. To lenele'mo sibi hulata nohina bo ai yisitiu nose'nagu minalina suhi huto ya'ma foipana'amofihi nona'a lilina'mu yabe.

Galesia 5:12

To lenele'mo sibina hilata nehana enali'ani enugufa'ani asaga'i hobe laga hibe hite minalana ni'inaya nani negelo bilube.

Galesia 6:17

Ma kaga lu nolepuna su halibe. Kalana'i mele netete nehago nufuhe'i nugufalo ma ni'igo yamofihi nani Yesuhi kele kele bo'a nohube. Yamofihi hapa'a huto hulata nohinamo ni'inagi kaga ya'ma lu nolepuna mamofihi le'mo gupilo bo moneuba keta foya aku'i menimilina'mu yabe.

2 Timoti 2:18

Etali ya'ma ka lamana'amofihi kapo'a he'milete'atiti ya'ma lite nela'ibe: Lugufati fili'ehinaguti aho ti'ehinamo ni'inaya alihi kosaba lugufa hiti lele'mo ho tilina'a meni'ibe. To ya lilete mono ka keheli'ahana bona'i luga'a komopa'ani enele'mo sibina neha'ibe.

1 Yoni 2:26

To lenimi'i melete komopatini le'mo sibina hilana bona'i enali ka'animu ma luto fayahi nokoyobe.

1 Yoni 4:1

Komopa'ni nolepuna bona'ise. Sikalafu'uba lele'mo babahi higo lulata nohune lite lilata nehana bona'i asaga'magitoga ka'a ya'ma sibigopa mekehelilo. Kaga'a mone ya'ma Hu'mamofitogati ni'ifi meni'ifi keheli fotogo hilune lite kaba hilo. Ka'a leli'ali bona'i fagamofihi silaga'i huto hilete babu li'ahana ni'ibe.

2 Yoni 1:10

Bo moneubafi bo moneuba ya'ma Kilisitou lu limi'ehina ka'a mekehelilinauba yamofihi kaitoga kaga lu lepilube luto nolinogomo kai be metigise nohuto to nohakanugu le'mo memolobo. To ana bomofihi soso mehu etobo. Henabe lutobe?

2 Yoni 1:7

Ka Keheli'ahane. Fato mono ka lilabe lite lenimi'i melelata bona'i babu lite huto hilete noto noto hepatoga i tili hite bi'ahabe. Enali Yesu Kilisito kumu ya'ma melugu lusi gufa hiti lito huto hu'ehinamo ni'ibe lite ka'a ya'ma ibe fitebe hilata nehabe. Bona'i ya hana'amagi ya'ma lenimi'i melelata bona'i Kilisitohi fatehe bona'a ya'ma nehabe luto lilune.

Yute 1:4

Hena'mube? Bona'i luga'a Hu'mamofihi keheli'ahana'a enali folagahatigu fenene hite ti'ahana. To enali moko foya lilata nehanalo Hu'mau ka melemekilina'mu yabe lite ai hetofa bo nohinagihe lite nelana enali ya lite Hu'mamofihi lehe'mose kaga'a li sibi hite to lali moneko kaba boti, Yesu Kilisitohi enemegesa hu emite ibe fitebe hi etelata nehabe. Enali ya'ma bite li he'mila ete li he'mila nehanamofihi hapa'anilo Hu'mau osahi epilina ka koyapa'i mono bukugu fayahi keye'ahanamo ni'ibe.

Huto Hilina Ka 12:9

To hagulu osifa'i napa'auba ai koyapa'i ema afeha'aga mino'ehina bo mone gi'amofihi Sata to fato gi'a enifisa ito noto noto bona'i enimi'i moloto enogolaga bilata bo le'mo fitu fe he'migo melugu limi'ehina. Ai'a hiti to yagapana'a hiti kokulumaguti fitu fo he'milago limite melugu mine'ahana.

Huto Hilina Ka 13:14

Hu'mau lu laga mehu'ehigo topa hose nasana amuya ya suhi huto lolo hilibe luto keheli emigo kohe toto akafu yagakafa ti'ehina ai'a bulo ya'ma topa hose nasana lolo huto melugu bona'i komopa'ani fibe taga hube huto mino'ehina. Ya nohuto metoga bona'i lu epigo akafu yagakafamofihi afeha'aga ema emitatu laga hago fili'ehina ya suhi lolo huloto ho ti'ehinamofihi fayaha'a legita lolo hilo ligo ya lolo hite anatoga enalapusa fi emilabe.

Huto Hilina Ka 19:20

To akafu yagakafa ai hiti to faga faga mono ka loli'ali bo ai ya'ma akafu yagakafamofihi bulo topa hose nasana suhi huto li'ehina bo hiti naga'i etimi'ahana yabe. Ya'ma faga faga mono ka loli'ali bo ai koyapa'i akafu yagakafamofihi meha'a enalapusa fi emi'ahana bona'i to akafu yagakafamofihi omiha'a enogobisalo fayahi ge'ahanamagi hiti topa hose foya'atu enali'i komopa'ani le'mo sibi sibi hu'ehina. Yana bo hiti to akafu yagakafa hiti enele'moto logo'a hiti nagami hefunugu kala efahi logo loto nohinagu ya'ma he'mi etatogo mefilise hite limi'aha'ina.

Huto Hilina Ka 2:2

Nani lolo hite melete nehanamofihi hapa'a to foya'animofihi hapa'a kosele'i melenahago amuya melelata nehana yanamofihi hapa'a keheli'ohube. Lenali foipa bona'i laga mehana'a bu neenagagomu'i lenipa holata nohigo he'mi epele'ahana. To bona'i luga'a lenali hiti aposolo yabe lilete faga hiti lilago faga'animofihi hapa'a fi taga hi etete faga nelabe lite akeheli'ahabe.

Huto Hilina Ka 2:20

To nani lenali kumu kehelugo luga'a sibina hu'ehibe. Lenali ya'ma Isilaeli bomofihi gihiti a'i foipa'a Yesepelo tegi huto mino'ehina a'i bu go he'milata hi'ahana ai'i nani mono ka loli'ali a'i nohube luloto yagapana'ni kaga lu epi epi hite enimi'i melete enohoka hago moko foya lite lugefa nasanamofihi seba'a nelata nehabe.

Huto Hilina Ka 2:6

Luga'a ya'ma lenali kumu kehelugo bati hulata nohibe. Lenali Nikolasihi bona'a ya'ma lenali ana'ina lolo hite melete nehana ya'ma laga'ni menonebesibe luto lu'ohube. Yana'mu nani hiti lenali hiti moneko kumu menolebesibe.

Huto Hilina Ka 20:3

Agelouba ya hu etoto keli yatama ya'ma fitu fo he'migo limi'ehina. Limilago kafe ya'ma giloto keya'i moloto li hetofa hu'ehina. Noto noto bona'magihi komopa'ani aku'i le'mo sibina mehu epolose fa'mene mino lito buto nehitogo kufu moneko tauseni ya'ma su holenogo gulu he ketenogo ya'ma tito kana'a hupamone'isi minalane luto lu eto'ehina.