Galesia 1:4 - Ka Lamana'a Monoꞌi Lu Mu Tifiꞌehina Ka Yabe

⁴ Yesu ai afotifu Hu'ma ai kaga'alo ya'ma ho tilina kana'alo foipanauba lele'mo sibina nohinogo gulu ho letalina'mu yabe luto lali foipanati'mu yabe luto ya'ma ai'a gufa'a h'emi'ehina yabe.

Galesia 1:4 ပူးပေါင်းရင်းမြစ်များ

Matiu 13:22

To nose'na legeya'a ufehe yamu'ubago hinagu limo ito notinamoya ma huto ni'ibe. Bo moneuba mono ka kehelilago ma melugu faga efaha fe'nohuba loe lae hu etoto keta besigo ai ana bomofinuguti ma'naka legeya'a huto hulata menohibe.

Matiu 20:28

Ya'ma Kokulumaguti limi'ehina Bo ai ana suhi huto nohibe. Bona'magi aito lili'na he'mete li etalabe luto meo'ehina yabe. Ai boana'magitoga lili'na li epoloto enehe'malube luto o'ehina. To ai boana'magi kumu luto gufa'a he'miloto asaga boana'i foipana'ani pa so epalalube luto o'ehina yabe.

Matiu 26:28

Ya'ma nani golaha'ni ni'ibe. Hu'mau lu mu tifise'na'a golaha'ni huto hu molo'ohube. Asaga boana'magihi foipana'ani li gololo tu epalalibe luto nani nohekube.

Matiu 26:42

Ya luloto Yesu i behe huto buto loe yupahi ma luto hu'ehina: Afo'niga. Ma kohi nanitogati i nebe silito mebinogomo nani nalube, ya hinogo'ni kaika kipagu ni'ilina suhi pa salibe.

Matiu 6:9

Lenali ma lite numuna hu emilo: Afotiga, kokulumalugu minane, kigika hetofa huto fato minalibe.

Maki 10:45

To Kokulumaguti limi'ehina Bo ai henabe luto melugu noabe? Ai asaga bona'magi kele kele'i hi eminogo kibina bo'ani minalube luto o'ehifiye? O'e. Ai kele kele'i hu epalalube luto to enehe'malube luto o'ehina yabe. To bona'magi ai'i he fililenogo gufa'aloti'i silaga bona'i foipanaguti mina fito pa so epalalube luto o'ehina yabe. Yesu ya luto lu epi'ehina yabe.

Luku 22:19

To ai beleti lito Hu'mamofihi fokehi ho emiloto li gofa holoto enali'i epiloto ma luto lu epi'ehina: Ya'mana nani nugufa'ni yabe. Lenali kumu nugufa'ni he'mito fililuna'mu yabe luto nolepube. Lenali ya'mana suhi hilete nelata nehite nani kumu'i lenekesu meheno.

Luku 22:42

Afo'niga kehelitomo ya'ma nagabu gise'na nanitoga ni'ina li he'mi netobo. Kaikamo kekesa kehelito bati huto yabe lutomo anana li he'mi netobo. To kai o'e litogomo nani ana nagabu gise foya li kofilube.

Yoni 10:11

Nani sipisipi yagamagita kaba bo'ani bati'a nohube. Nani ya'ma kaba bo'ani nohuto'ni sipisipi kumu fililube luto enubuto biluna ya'ma nani nohube.

Yoni 12:31

Yatai Hu'mau asaga melugu boana'magihi guna malalibe. Ya'ma me'i kaba bo, Satahi le'mo laba hinogo amuya'a limilina'mu yabe.

Yoni 5:30

Ana'ina mone nani'ni nekesaguti li huto mehiluna'mu yabe. Afo'nifu kaga lu nimi'ehina'a huto bona'i kaga'ani loko hiluna'mu yabe. Ka foya noli epolonauba bati hulata nohinaya hena'mugope nani'ni nemeha'nilo meluna ai noho lifigo limi'ohunamofihi mege'i moloto nolugo yabe.

Yoni 6:38

Nani noho lifi'ehinamofihi mege'i moloto lili'na lilube luto kokuluma he'mito limi'ohube. To nani'ni nemeha'nilo lili'na mone meliluna'mu yabe.

Romu 1:7

Ya'mu luto nani fayahi lenalitoga asaga Lomu bona'i Hu'mau komopa'a lepito to nani yagapana'i nehabe lu'ehinalo nogobe. Ai Hu'mau afotifu to Sipi Boti Yesu Kilisitohi fuluna'a hiti lenehe'mose'na'a hiti lenalitoga mineno.

Romu 12:2

To lenali asaga melugu bona'magihi hapa'ani mege'i memalalo. Hu'mau komopatini li gelehe hu lepololenogo lenegekesa kehelise yuhufana lolo hilina'mu yabe. Ya hulenogo Hu'mamofihi hetofa hapa'amu kehelite to ai bita nohina'mu to ekesa kehelina bati nohina'mu hiti asaga hetofanamofihi ai'a fokehi luse'na'amu lenali keheliya ilabe.

Romu 4:25

To Yesu lali foipanati li he'mi letalibe luto Hu'mau ho lifigo oto fili'ehina. Ya hulago aku'i Hu'mau fili'ehinagati le'mo kosaba holoto lali kumu bebe sana bona'i lele'mo lolo hu'ehina yabe.

Romu 8:27

Ya higo Hu'mau asaga bona'i komopa'anigu bu goto keheligo Sikalafu'uba enali kumu ekesa yigiba yigiba nohigo yanamofihi Hu'mau kehelilata nohibe.

Romu 8:3

Bona'magihi komopa'ani amuya memolo'ehinagi keya kauba lehe'mo'ehina bati mehu'ehibe. Hu'mau aigo lehe'mo'ehina. Yata'a ai bona'i foipa hapa'animu ka epekito enifisa i'ehina. Ya huto ai'a pana'a melugu ho lifigo bona'i enugufa amuya memolo'ehina suhi lolo huto minoto lali foipanatimofihi nona'a li pa salibe luto fili'ehina yabe.

Romu 8:32

Ai koyapa'i pana'a nu ki pili koto meminose lali kumu asaga'i ho lifito bona'magihi enayanugu epi'ehigo fili leto'ehina, ya'ma limi'ehina bo, Hu'mau, ai loe sana sana mina'a meni'inamofihi fa'mene limilina'mu yabe.

1 Koliti 15:3

Mono ka tito ni'ina ka'a lu nimi'ehina'asigo lenali'i lu lepito ma luto lu lepi'ohube: Kilisitou lali foipanati'mu fili'ehina ya'ma mono bukugu ai ana hilibe lite koyapa'i emasana keye'ahanamo ni'ibe.

2 Koliti 4:4

Enali ya'ma ana metogati gihiti bo moneuba gi'a Satau, ai komopa'ani fi hekini lago Kilisitotoga keheli meemise neminabe. To ai komopa'ani fi hekini lago enali ka lamana'amofihi fana meha'auba komopa'anigu limilenogo Kilisito Hu'mamofihi babeyafalo nominana bomofihi fana meha'a bu go fe lite bu menegabe.

Galesia 2:20

Ya hu'ohunaya yatai ya'ma minoto lito nohuna ya'ma nani'nigo minoto lito mehube. Kilisitou komopa'nigu minoto lito nohigo nugufaloti minoto lito nohuna. Ya'ma Hu'mamofihi pana'amu keheli ule'ale huto minolatana nohuto minoto lito nohube. Ai ya'ma komopa'a nanitoga mololoto minoto lito hina'a nani kumu yabe luto gufa'a he'miloto fili'ehinamo ni'ibe.

Galesia 6:14

Nani ya'ma ana'ina'nimufi yana'mu melube. Sipi Boti Yesu Kilisitohi malipu yafalo fili'ehinamofihi ya'ma ka'a moneko kumu liyafa huto lu emilata nohube. Yana'mu yabe luto melugu nasana fulupa ito kisililatana'mu kehelinogo metilibe. To ana huto melugu nasana'mu kehelito mege'i molo'ohunamofihi bu nogogo nele'mo kefefe mehilina'mu yabe.

Efeso 1:11

To silaga'i ya'ma Hu'mau komopa'atu keheliloto lu molo'ehinalo lilata nohibe. Ai'a koyapa kana'a ekesa kehelito lu molo'ehinalo Kilisito hiti moneko'na minalabe luto lele'mo'ehibe.

Efeso 2:2

Ya'ma kanagu'ya lenali melugu bona'magihi foipa kapogu foipanamofihi komopagu bila ela hite foipa kene'magihi kaba bo'ani Sataha amuyalo minete aitoga i ke'mete minelata hi'ahanamo ni'ibe.

Efeso 5:16

Yatai ya'ma kanagu foipa nasanamofihi li fulugu bi'ehinamo ni'inagihe. Ya'mu ana'ina lamana'a lilata kana'a huto hu lepilinamo ya'mu lenebe meligino. Kana'a fa'menena lolo hu lalibe luto yabe.

Efeso 5:2

Ya nehite asaga bona kumu leniginaga fite minalo. Kilisito ai ana huto lali kumu yabe luto ginaga fito gufa'a sibi he'mi'ehina yamofihi Hu'mamofihi kuguhi koyo eminogo Hu'mau tu'a keheligo bati hu'ehinagihe.

Efeso 6:12

Lenali ya'ma akeheli'ahabe. Lali fa'mene lugufa hiti bona'magita luba sabo menohune. Metepu kapo kaba nehana to Satahi kaba bo'a hiti enikibina bo sipi'a to sipi bo amuyana'a nehananamagi to foipa kene'i samahi tito kokuluma megesa'aga neminana enali luba li huto hu limilata nehabe.

Filipai 4:20

Hu'ma afotifihi aitoga ya'ma fokehi noluto yanauba mino lito tito fi besana lolo huto minalibe. Ma'naka.

1 Tesalonika 1:3

Lenali Hu'mamofitoga keheli amuya melete minelata nehana yamofihi lamana'a ya'ma li huto nehabe. To komopatini emilata nehite foya'a amuya melete minelata nehabe. To Sipi Bo Yesu Kilisito alina kumu yabe luto keheli ule'ale hite geba hite minelata nehabe. Ya'ma afotifu Hu'mamofihi ai gobisalo kehelito fokehi holata nohune.

1 Tesalonika 3:11

Afotifu, Hu'mau ai'a to Sipi Boti Yesu etali kapo hokolo hi letele'inogo lenalitoga foiya biluta ni'ibe.

1 Tesalonika 3:13

To Sipi Botiuba komopatini le'mo hetofa hulenogo Sipi Boti Yesu hiti to ai le'mo'ehina bona'a asaga'i hiti nehetilina yupahi lenali ya'ma Hu'ma afotifihi gobisalo minete komopatini bati hinogo hetofa lenemehi hiti minalabe.

2 Tesalonika 2:16

To Sipi Boti Yesu Kilisito ai, to afotifu Hu'mau, lenali komopatinigu lenele'mo bati bati hinogo kolina'a meminana bona'i lolo hilabe nolube. To ai lenele'mo amuya hinogo lenali hetofa suhi hulata hite to hetofa kaga lulata hite minalabe luto nolube. Ai Hu'mau mehi limi'ehina bouba, to fa'mene lehe'moto komopatigu ai'a koyapa koyapa koli mehuse minolatana molo leto'ehina bouba, to ai kumu hetofa kehelise'na limi'ehina bouba, Hu'mau ai ya'mamofihi hu lepalalibe luto nolube.

1 Timoti 2:6

Ai'a ya'ma lali bona'i asaga'i foipanati'mu pa salube luto filito gufa'aloti lalimo mina fito lele'mo'ehina yabe. Hu'mau molo'ehina kana huto higo ai ya huto fili'ehina yabe. To hena'mube? Hu'mau yege yege bona'i enubuto bilina ipagu nohina'a kehelilune luto yabe.

Taitasi 2:14

Ai ya'ma lali kumu yabe luto keke'i lu letoto foipana lito mino'ohuta yanaguti li he'mi letalibe luto minoto lito gulu gulu nehana bona'i lolo hilune luto ai'a yagapana'ago lele'mo eto hulenogo minoto hetofa hatofa nasanaloga mege'i amuya moloto minalune, luto keke'i lu letoto gufa'a he'mito fili'ehina yabe.

Hibulu 2:5

To me'i kosaba'na alihi huto hilina yanamofihi ka'a lali noluta ya'ma Hu'mau agelo enali kaba hilabe luto enele'mo ho tito melu epolo'ehina yabe.

Hibulu 6:5

To enali Hu'mamofihi ka'a hetofana ni'ibe li'ahana to alihi huto hilina kana'amofihi ule'ale huse'namofihi amuya'a laga'a akeheli'ahana.

Hibulu 9:14

Ya hu'ehinaya Kilisitou ai ya'ma minoba minoba Meha'auba fi hele hu etago ai komopa'a hiti gufa'a hiti bati huto mino'ehina yamofihi Hu'mamofitoga hetofa mamufa gi emi'ehina. Ya hu'ehina'mu Kilisitohi golaha'auba komopatilo i kolo'ehinamofihi okala huto foipa foya he'mi letoto lele'mo bebe solenogo mino kosaba huse bo, Hu'ma aitoga agoya hu emito foya'a lilata nohune.

Yemesi 4:4

Ka mekeheli'ahana bona'ise. Melugu bona'magi kumu kehelilata nehana ya suhi hite laga lepesilina nasana'mu kehelilana ya'ma Hu'mamofihi fateha'a lolo hilabe lite lenali menekehelifiye? Mono'ani meni'ina bona'magi kehelilata nehana nasana'muko lepesilina ya'ma Hu'mamofihi bona'a meminalana'mu yabe.

1 Pita 2:24

Lali foipanati yauba ai gupisalo tigo ai'a he'mu kito malipu yafalo fili'ehinamo ni'ibe. Lali foipana lilutana'mu filise bona'i suhi huto mopo mehuse'na minoto bati bati huto minolatanamofihi minete lite hilabe luto fili'ehinamo ni'ibe. To ai fuhe'a li'ehinaloti'i komopatini le'mo kosaba hu'ehinamo ni'ibe.

1 Pita 3:18

Kilisitou ai ana huto bo lamana'a mino'ehina bouba bo foipa'a lali kumu yabe luto fili'ehina. Ai Kilisitou asaga bona'magihi foipana'ani su halibe luto silaga bona'i foipana'ani'mu yabe luto kana'a moneko'i filigo su ho'ehina yabe. Yamofihi Hu'mamofitoga lenele'mo malalube luto lolo hu'ehina. Enali he'ahana'mu ai mega gufa'auba fili'ehinaya meha'a hetofa Sikalafu'uba le'mo mopo higo mino lito buto mino'ehina.

1 Yoni 2:2

Kilisitou ai'a ya'ma foipanati'mu Hu'mamofihi le'mo fulu hulata bo nohibe. To ya'ma lali foipanatigo ya hu letalata meni'ibe. Noto noto bona'i silaga kumu yabe luto foipana'ani li he'mi epololata bo nohibe.

1 Yoni 3:16

Yesu Kilisitou ai lali kumu yabe luto minoto lito hulata'a he'miloto fili'ehibe. Ai ya higo komopati ai eminogo ai eminogo hiluta hapati li yege holago bu go'ohune. Yana'mu lali ana huto lalalutigihi enali kumu luto minoto lito hiluta'a ya'ma he'miluta babeyafalo enalitoga minalutamo ni'ibe.

Huto Hilina Ka 1:5

to Yesu Kilisito aitogati ya'ma lehe'mose'na to fuluna'a lenalitoga mino moloto minalibe. Yesu ai ya'ma Hu'mamofihi ka'a beto huto ligo ule'ale nohina bo to kohe toto pana'a filise'naguti ho tise'na yamofihi lamana baga'a to noto noto kaba bona'i Sipi Botini lenali bo lenogotinifu kaba huto nohibe. Ai komopa'a limito ai'a golaha'atu foipanatiguti li okala hu leto'ehinamo ni'ibe.

Huto Hilina Ka 5:9

Nama kosaba'i mone ma lite li'ahana: Kai bati bo nohatagi kelebe gi'ahana pepamo lito naga'i gulu foto li paka salata babeyafa huto nohane. Kai kahago filito kai golahakatu bona'i asagatoga fato fato bona'i to fato fato enonogo hiti to fato fato enugufa hiti to fato fato metoga bona'i mina fito enele'mo fato fato huto Hu'ma nohinaga enele'mo molo'ahatamo ni'ibe.

Huto Hilina Ka 7:9

Ya hulago nubu egolago buto mana bu go'ohuna: Noto noto bona'i luga'amagihi babeyafa'a fato fato enugufa hiti to fato fato naga'i hiti to kaga'ani fato fato'i to naga'i babu lite ya'ma bo moneuba leka so su mehose suhi enali sekele mamu'a hiti kefa hisamofihi gobisalo to sipisipi nala'a ai maha'aga ho tite nehago bu enogo'ohuna. Enali ya'ma koholi kata li hekelete lose lose'na fekilite enayanugu ya'ma lose lose'na hekele ite lila lila hite mine'ahana.