Filipai 3:8 - Ka Lamana'a Monoꞌi Lu Mu Tifiꞌehina Ka Yabe

⁸ To ananasigo meni'ibe. Nani'ni Sipi Bo'ni Yesu Kilisitohi ai hapa hapa'a bu goto keheli'ohuna yamofihi mina'a tilago ana'ina luga'a silaga'i yamofihi lamana'a kehelugo fa'menena lolo hu'ehibe. Nani Kilisito hiti moneko'na hilu'ibe luto ai kumu yabe luto nigi'ni hiti to nipagu hu'ehinana hiti to nanitoga huto hu'ehinana asaga'i heletuya'a lolo higo he'mi'ohuna yabe.

Filipai 3:8 ပူးပေါင်းရင်းမြစ်များ

Luku 1:43

To nani hena hu'ohugo Sipi Bo'nimofihi ito'afu nanitoga noabe, luto Elisapetiu lu'ehina.

Luku 11:20

O'e, Hu'mamofihi ai amuya'aloti foipa fele li nohe'mube ya nohugo ana nohunanauba Hu'mamofihi kapo'a anasi lenalitoga a'o leba to'ehibe luto lenubulo huto huloto lenelepilata nohibe.

Yoni 14:20

Yana yupahi huto hulenogo lenali Afo'nifitoga i ke'maluna ya'ma kehelilabe. To lenali nanitoga i ke'malana to nani lenali hiti minaluna ya'ma kehelilabe.

Yoni 14:7

Lenali nanimomu'i kehelite Afo'nifi kumu kehelilune'mu habe. To ma kanagu lenali bite ai kumu nekehelite to bu negabe.

Yoni 16:3

Enali ya'ma Afo'nifi hiti nani hiti bu le'ego bati mehise ya suhi lolo hilana'mu yabe.

Yoni 17:3

Mino kosaba huse'namofihi hapa'a ma huto ni'ibe, Hu'mau lamana'a moneko'i kai hapaka to noho lifi'ahata panaka Yesu Kilisito nani hapa'ni keheli'ehinogo mino kosaba huse'naka yamofihi huto hu epilibe.

Yoni 17:8

To kaga lu moloto nimi'ahata ya'ma lu epugo yalo'i akeheli su he'ahabe. To kaika noho lifitogo kaitogati limi'ohuna'a ya'ma keheli ule'ale hi'ahabe.

Yoni 20:13

To etali Maliahi loka he'aha'ina: Ma a'ise, henabe luto yibi nohane? Ya nela'igo ai ka nona'alo lu etimi'ehina: Enali Sipi Bo'ni magati le'me he'mite kofite hepa'a mele'ahanalo mekeheli'ohunagihe.

Yoni 20:28

Ya ligo Tomasiu lu emi'ehina: Oho, Sipi Bo'ni yale. Kai Hu'ma'niga nohane, lu'ehina.

Aposolo 20:24

Ya luto nolimigo to nani minalufi fililufi luto ya'ma negekesa kehelito nemeha'ni su holenogo bati huto ni'inagi ya'ma Sipi Bo Yesuhi foya'a nimi'ehina Hu'ma lehe'mose'namofihi ka'a hiti ka lamana'a hiti lu yege hoto ya'ma lili'na'nimofihi su holenogo bati hilunagihe.

Romu 8:18

Nani mana keheli hokolo hu lepoloto Yesu kumu lagabu'i nogigo minaluta yamofihi alihi fana meha'a sipi'a moneuba lalitoga huto hilina be ligilina'mu ya'ma lilune luto lu nolepube.

Romu 8:39

To mone ifo muyalo ni'ina me'i afenuga ni'inafi moneuba Yesutogati lele'mo loko mehilina'mu yabe. Hu'mau lali kumu sipi ginaga fise'na'amofihi Sipi Boti Yesu Kilisito limi'ehinamofihi ya'ma melugu lolo huto minolatana asaga'namagi lele'mo loko mehilana'mu yabe.

1 Koliti 2:2

O'e. Nani ma luto keheli amuya mololoto bu'ohunamo ni'ibe. Nani lenalitoga buto nohuto'ni kaga luga'a melu'ohuna yagi Yesu Kilisito ai kumu hiti to malipu yafalo he'ahana yamofihi ka'asigo beto hu lepilube luto keheli'ohunamo ni'ibe.

1 Koliti 9:10

Bona'magita lalimo hiti lu'ehinamo ni'ibe. Foya lilata nehana enali legeya'a huto higo nalune lite keheli'ehite hekelelata nehana ya bati hulata nohibe.

2 Koliti 4:4

Enali ya'ma ana metogati gihiti bo moneuba gi'a Satau, ai komopa'ani fi hekini lago Kilisitotoga keheli meemise neminabe. To ai komopa'ani fi hekini lago enali ka lamana'amofihi fana meha'auba komopa'anigu limilenogo Kilisito Hu'mamofihi babeyafalo nominana bomofihi fana meha'a bu go fe lite bu menegabe.

2 Koliti 4:6

Hu'mau ai koyapa'i metepuhi ni'inagu fi besa lobo luto ligo go'i lu besa lo'ehina. To ai'asigo ya'ma lulago komopatigu ai'a kamofihi fana meha'auba mino kikipa hago Kilisitohi gobisalo Hu'mamofihi silikeha fayaha'a huto hu lamana nohigo bu golata nohune.

Galesia 1:16

Elesa molo nimi'ehina ya'ma keheligo tigo ka'a ya'ma fegutoga bona'i enalitoga ka lamana'a lu yege hoto ya'ma luto lu hofa talane luto pana'amofihi hapa'a lu huto huto nelepi'ehina. To ya hu'ehinaya ana kagamu'i ya'ma nani fato'i lu nimilo luto bona'magihi suhi lolo huto loka meho epolo'ohunamo ni'ibe.

Efeso 4:13

Ya humo humo hutoti mono ka mege'i malaluta'mu keheli moneko'i huto to Hu'mamofihi pana'amofihi hapa'a keheli bati huse'nati moneko'na lolo hinogo hulototi Kilisitohi bona'a hofa toto olopa hilutagihe.

Filipai 1:1

Nani Poluita to Timoti hiti moneka nohutoti'a Yesu Kilisitohi lili'na bona'a nohu'ibe. Lenali hepatoga bona'i Yesu Kilisitohi keheli emite mine'ahana bona'ise. Nehafihe? To Hu'mamofihi yagapana'i lolo hi'ahana bona'i to mono kaba bona'i to babafi bona'i lenalise. Nani fayahi ya'ma koyo nolepube.

Filipai 3:10

To nani yatai Kilisitohi hapa'a keheliya ilube luto to ai fili'ehinaguti ho tise'namofihi amuy'a nanitoga huto hilibe luto to ai keta hinana gupisalo mele ete'ahanamo molo emito kehelilube luto to ai'a fili'ehina hapa'a mege'i moloto fililube luto nipagu nohibe.

Filipai 3:12

Nani ya'mana Kilisitohi hapa'a ali su ho'ohube luto liluna'a mehube. To komopa'niuba ya'ma keta mehuse huto ni'ibe luto luse mehube. Fa'mene Yesu Kilisitou nele'mo'ehinamo'mu aitogati amuyana'a kosaba'i lilube luto amuya moloto nohube.

Filipai 3:7

To ya hu'ehinaya nani koyapa'i lili'na lito mino'ohuna yana'mu kehelugo lamana'a lolo huto ni'igo alihi ya'ma Kilisito kumu yabe luto anana'mu kehelugo fa'menena lolo hu'ehina yabe.

2 Timoti 4:6

Enali keye lite'ani suhi huto nani nugufaloti migufa'a nalune'mu habe. Nani ma meluguti he'miloto abiluna kana anasi tupa nohibe.

Hibulu 3:14

Lali asaga'i hapi fito keheliya ise'na ya'ma to fifa ilata nohuta li gehesalo nehetilutamofihi ya'ma Kilisitohi agoyana'a guna moloto li pili koto nominota bona'i lolo huto nohilune.

1 Pita 2:7

Ya ligo keye'ahana'mu ai kumu keheli amuya nemalana lenalitoga yamu'i ai ana'ina mina'a minomo tito nohibe. To ai kumu mekehelise mine'ahana'a enali kumu mone ya'ma luto lu'ehinamo ni'ibe: Nohi gilata bo enali efahi ya'mu bu gago he'mi'ahana ya'ma efapouba lapusa lolo hu'ehina ni'ibe.

2 Pita 1:2

Hu'mamofihi to Sipi Boti Yesuhi keheli emilenogo lenalitoga lenehe'mose'na yanauba to fuluna'auba molo emito huto holito buto mineno.

2 Pita 1:3

To lenali Yesuhi keheli bati hilenogo ai hetofa amuya'a guna molo lepoloto lenehe'menogo lamana hite mino lite bite minalabe. To ai'a fana mehena'a hiti bebe sose'na'a hiti lenalitoga guna moloto lepilube'mu elesa molo lepi'ehina yabe.

2 Pita 1:8

Yanauba asaga bonatoga minoto fi tili tele nohinogomo Sipi Boti Yesu Kilisitohi hapa'a kehelilata nohune keheliya ite foya'a linogo futu'a lolo mehinogo minete legeya'a heno.

2 Pita 3:18

Ya nehite Sipi Botiuba lubuto bilata nohina bo, Yesu Kilisitohi lenehe'mose'na to ai hapa hapa'a keheli hokolo hite kehelise'na hiti lenalitoga minenogo yamu'i hofa tete minalo. To ai fana meha'auba minoto minomo buto yatai ana suhi huto mino lito buto mino bai toto mineno. Ma'naka.

1 Yoni 1:3

Yamofihi ya'ma bu goto lito hu'ohutamo ana huto lenalitoga lu lepilata nohutamo ya'ma lu lepilenogo ai kumu komopati monekotoga bati huto hepito minalune luto hulata nohune. To ana huto lenali hiti lali hiti komopati hepi lamana higo nominoto afotifitoga to pana'a Yesu Kilisito aitoga hepito minalune luto yabe.

1 Yoni 2:19

Kilisitohi fatehe bona'a enali lalitogati he'mi letelete bi'ahanamagi, lali ligibo lagabo lamana'a bati huto minolata'na ya'ma lolo hite menehabe. Enali lalalutigi bati hite nehatita ya'ma mehe'mi letatita ni'ibe. To he'mi lete'ahana yamofihi hapa'a ya'ma huto huto hu'ehibe. Lali hiti nehana'a enali lalalutigi lolo hite memine'ahana, keheliya i'ohune.

1 Yoni 5:20

To ma luto mone'a hiti keheli'ohune. Hu'mamofihi pana'a ai'a melugu limito keheli fe lulata'na li huto hu limi'ehinamo ni'inaya, Hu'mamofihi lamana'amofihi hapa'a keheliya ito kehelilata nohune. To Hu'mamofihi ka lamana'alo i segito ya'ma pana'a Yesu Kilisitohi nosipenuga minoto lito nohune. Ai'a ya'ma Hu'mamofihi lamana'a to minoba minoba huse'namofihi afo'afu nohibe.