Efeso 5:2 - Ka Lamana'a Monoꞌi Lu Mu Tifiꞌehina Ka Yabe

² Ya nehite asaga bona kumu leniginaga fite minalo. Kilisito ai ana huto lali kumu yabe luto ginaga fito gufa'a sibi he'mi'ehina yamofihi Hu'mamofihi kuguhi koyo eminogo Hu'mau tu'a keheligo bati hu'ehinagihe.

Efeso 5:2 ပူးပေါင်းရင်းမြစ်များ

Matiu 20:28

Ya'ma Kokulumaguti limi'ehina Bo ai ana suhi huto nohibe. Bona'magi aito lili'na he'mete li etalabe luto meo'ehina yabe. Ai boana'magitoga lili'na li epoloto enehe'malube luto o'ehina. To ai boana'magi kumu luto gufa'a he'miloto asaga boana'i foipana'ani pa so epalalube luto o'ehina yabe.

Yoni 13:34

To yuhufa kaga lu molo'ohuna ma lu nolepube. Lenali komopatini lenogotinifihi emilo. Nani komopa'ni lenalitoga lepi'ohunagi lenali ana hite ai komopa'a eminogo ai eminogo hite ya hilo.

Yoni 6:51

Mino kosaba huse beleti kokulumaluguti he'mito limi'ehinamoya nani'ni nohube. Ya'mana beleti nose'na mone bouba nalina ai minoba minoba hilina'mu yabe. Ana beleti nose'na nani emiluna nani'i nugufa'ni yago melugu asaga bona'i epi baga inogo enali ana hite minoba minoba hepa'i lilabe.

Romu 15:16

Nani Yesu Kilisitohi lili'nalo bo nohunagi nani fegutoga bona'i Hu'mamofihi baga'aguti lamana ka lito lu yege ho epologo keheli'ahanaya, enali mamufa molo emi'ehina suhi hite nehabe. To nani lusa gilata bo suhi huto nohube. To Sikalafu'uba enele'mo bati hinogo Hu'mau fokehi luto, enele'malube ligo ya'ma mono bona'i lolo huto lili'na nolube.

Romu 4:25

To Yesu lali foipanati li he'mi letalibe luto Hu'mau ho lifigo oto fili'ehina. Ya hulago aku'i Hu'mau fili'ehinagati le'mo kosaba holoto lali kumu bebe sana bona'i lele'mo lolo hu'ehina yabe.

Romu 8:3

Bona'magihi komopa'ani amuya memolo'ehinagi keya kauba lehe'mo'ehina bati mehu'ehibe. Hu'mau aigo lehe'mo'ehina. Yata'a ai bona'i foipa hapa'animu ka epekito enifisa i'ehina. Ya huto ai'a pana'a melugu ho lifigo bona'i enugufa amuya memolo'ehina suhi lolo huto minoto lali foipanatimofihi nona'a li pa salibe luto fili'ehina yabe.

Romu 8:37

Ya'ma huto hu letalana asaga'namofihi Yesu be ligi'ehigo bati huto minalune. Yesu ai sipi ginaga fi limito kaba hu letago aitoga ule'ale huto minolata nohune.

1 Koliti 16:14

To lili'na nasana silaga'i lilune'mu nehitemo komopatini ai emigo ai emigo hite lolo hilabe.

1 Koliti 5:7

Ya hu'ehina'mu yisiti'mu sa sa hite loko hite li he'mi su henogo nebinogo legeya'a laga'a hiti lolo hilo. Lenali ya hilete yisiti nasana meni'ina beleti, Pasa nose'na nalana yupapogu nonotanana hetofa suhi huto minalabe. To hena'mube? Lali lubuto bilatana sipisipi yaga Kilisitohi ya'ma lali foipana'mu yabe luto fili'ehinamo ni'ibe. To ya'mu aiya lali Pasa nose'na nalata yupapogu holata nohuta sipisipi yaga suhi huto nohibe.

2 Koliti 2:14

Akae. Hu'mamofihi legelo bi emilune. Hu'mau ai'a Kilisitotoga lele'mo hepilago ai foipana he'mi leto'ehina'mu fokehi hoto kanipo filata nohuto'a megesa'alo lele'mo leli'ali nohina yabe. Ya higo lali noto notoga buto ka'a lu noepinogo ana kagauba hetofa tu'a tili tele huto nobina suhi huto noto noto i futili huto nobibe. Ya'mu lali Hu'mamofihi keke'i lu etoto legelo bi emilune.

2 Koliti 2:15

Lali Kilisitohi tu'a lamana'a legi huto nohutita Hu'mamofihi kuguhi koyo emilago bona'i enubuto bito noenele'mana bona'i hiti to yabalugu limilata nehana bona'i hiti ya'ma tu'a enoholata nohibe.

2 Koliti 8:9

Lenali Sipi Boti Yesu Kilisitohi lehe'mose'namofihi akehelilata nehanamo ni'ibe. Ai sekele mamu'amofihi afo'afu lenali kumu yabe luto muhi meni'ina bo lolo hu'ehina yamofihi lenali anatu mono'mofihi yogo fe'noho suhi hilabe luto ya suhi hu'ehinagi nani ya'ma lu nolepugo lenali giyaka lite ana hite bilabe.

Galesia 1:4

Yesu ai afotifu Hu'ma ai kaga'alo ya'ma ho tilina kana'alo foipanauba lele'mo sibina nohinogo gulu ho letalina'mu yabe luto lali foipanati'mu yabe luto ya'ma ai'a gufa'a h'emi'ehina yabe.

Galesia 2:20

Ya hu'ohunaya yatai ya'ma minoto lito nohuna ya'ma nani'nigo minoto lito mehube. Kilisitou komopa'nigu minoto lito nohigo nugufaloti minoto lito nohuna. Ya'ma Hu'mamofihi pana'amu keheli ule'ale huto minolatana nohuto minoto lito nohube. Ai ya'ma komopa'a nanitoga mololoto minoto lito hina'a nani kumu yabe luto gufa'a he'miloto fili'ehinamo ni'ibe.

Efeso 1:4

Ai ya'ma koyapa kana me'mofihi ana'ina huto mehu'ehigo nani naga'i lolo hilabe luto lele'mo'ehibe. To lali kumu yabe luto Kilisitou ho lifinogo lele'mo eto hinogo foipanati meminenogo to sibina mone laliti meni'igo gobisalo minalabe luto lele'mo'ehina yabe.

Efeso 3:17

To Kilisito kumu keheli amuya melenogo ai'a komopatinigu minoto mino amuya malalibe luto loka nohobe. To Kilisitohi komopa'a lepilinanauba lufusatini limito lenele'mo amuya lolo hinogo,

Efeso 3:19

To Kilisito komopa'a limi'ehinamofihi hapa'auba yamofihi bona'magita keheli'ahana ya'ma be ligi fala'nala huto ni'ibe. Ya huto ni'inaya yamofihi sibigopa keheliya inogo Hu'mau asaga'nagu bai toto nominana bouba ana suhi huto lenali komopatinigu bai toto minalibe luto loka nohobe.

Efeso 4:15

Aku'i lali liginaga fi epito Hu'mamofihi kaga ma'naka luto ai lu eminogo ai lu eminogo hutoti ai latahati lolo huto nohina bo Kilisitotoga mino kikipa holototi fato fato suhi huto aitoga hofa talune.

Efeso 4:2

Ya nehite komopatini lelite limite fulunagu minete agoya hite minete mineme bite kosele'i melepehenogo komopatini epite ai he'mago ai he'mago hite minalo.

Efeso 5:15

Ya'mu lenali minete ho hite hilana ka ya'ma kaba lamana'a hite minalo. To negi nagi nete meminalo. Keheli fe hite yanagu minalo.

Efeso 5:25

Bona'i lenali lihatinimagihi komopatini epilo. Kilisitou ai lali ka'a nokeheluta bona'magita komopa'a lepito lali kumu luto gufa'a katiya'i huto fili'ehina suhi hite komopatini epilo.

Filipai 4:18

Yatai ya'ma ana'ina li huto hite mele nete su he'ahana bai toto ni'igo yamofi kumu kehelilabe luto lenofokehi luto fayahi ya'ma koyoto nolepube. Epapolotikou ai'ya lenalitogati ana'ina lito oto nimilago ya'ma fe'noha'ni hiti bo lolo nohube. Lenali ana'ina lolo hi nete'ahanamofihi kehelugo Hu'mamofihi kuguhi keye neemigo tu'a lamana'a nobigo kehelito yauba ai laga besina nasana lolo hibe.

Kolose 3:14

To amuya melete asaga bona kumu leniginaga filo. Ya hilete lenali asaga'i bati hite koguna ite moneko'na hite minalabe.

1 Tesalonika 4:9

To lenali Yesuhi bona'a luga'amagi komopatini epilabe luto hena'mu fayahana lepiba lepiba hilune? Hu'mau komopatinigu ai lenemehi eminogo ai lenemehi eminogo hite minalabe luto'a hapa'a lu epi'ehinamo ni'ibe.

1 Timoti 2:6

Ai'a ya'ma lali bona'i asaga'i foipanati'mu pa salube luto filito gufa'aloti lalimo mina fito lele'mo'ehina yabe. Hu'mau molo'ehina kana huto higo ai ya huto fili'ehina yabe. To hena'mube? Hu'mau yege yege bona'i enubuto bilina ipagu nohina'a kehelilune luto yabe.

1 Timoti 4:12

Enali ya'ma pana'i kosaba bo nohane li lilagi. Yamofihi bona'magi enali ka'mu keheli sibina hi lalabe. Kai amuya moloto minetogo hapaka fu linogo Hu'mamofihi keheli ule'ale hilata to komopaka fana toto minenogo Kilisitohi kemehi emilata to mono ka lilatamofihi keheliya ilana bona'magi ya'ma kapogu bilune'mu hana enelepibo.

Taitasi 2:14

Ai ya'ma lali kumu yabe luto keke'i lu letoto foipana lito mino'ohuta yanaguti li he'mi letalibe luto minoto lito gulu gulu nehana bona'i lolo hilune luto ai'a yagapana'ago lele'mo eto hulenogo minoto hetofa hatofa nasanaloga mege'i amuya moloto minalune, luto keke'i lu letoto gufa'a he'mito fili'ehina yabe.

Hibulu 8:3

Le'mo mamufa gi emilata bo asaga'naloga enali gomolu nose'na to fato nose'na laita hilata nehabe lite keheli eto hi'ahana. Yana'mu lali mamufa gi emilata bo Yesu ai hiti Hu'mamofihi lokiya fi emi'ehinalo mino'ehina ya nohibe.

Hibulu 9:14

Ya hu'ehinaya Kilisitou ai ya'ma minoba minoba Meha'auba fi hele hu etago ai komopa'a hiti gufa'a hiti bati huto mino'ehina yamofihi Hu'mamofitoga hetofa mamufa gi emi'ehina. Ya hu'ehina'mu Kilisitohi golaha'auba komopatilo i kolo'ehinamofihi okala huto foipa foya he'mi letoto lele'mo bebe solenogo mino kosaba huse bo, Hu'ma aitoga agoya hu emito foya'a lilata nohune.

Hibulu 9:23

Ma metoga mono nasana silaga'namofihi hapa'a ya kokulumagu ni'inamofihi babeyafa'a fa'menena golaha'atu nagami ite nokala hite li gulu gulu lilabe luto keya ka ya lu'ehinamo ni'ibe. To kokulumagu nasana lamana'auba ai'a ya'ma lokiya fi emilata nasana eto huto mino'ehina yanauba nagami ito hapa'a hetofana lolo hilibe luto le'mo hokolo hilinamofihi kapo'a moneko'isi ni'ibe.

Hibulu 9:26

Yana'mu Kilisitou ai gufa'a komopa'a kana'amu kana'amu he'mi leto'ehina ni'itita ai me'mofihi lolo hu'ehina kana'a huto hu'ehinaloti ema'aga keke'i luse'i lito filito buba buba huto nesi'a meminotita'mu yabe. Ai'a ya'ma ya suhi hu emito Hu'mau molo'ehina kana'a su halube'mu nohinogo kana'a moneko'i ai'a gufa'a komopa'a nehe'mito foipanati su halibe luto huto hu'ehinamo ya'ma su ho lamana hibe.

1 Pita 4:8

Ya nehite lenemehi ai eminogo ai eminogo hite minalo. Ya'ma hilana'auba silaga'na be ligi'ehina nasana ni'ibe. Komopa'ani epilatana yanauba foipana li'ahana asaga'i enebe ligilata nohibe.

1 Yoni 3:16

Yesu Kilisitou ai lali kumu yabe luto minoto lito hulata'a he'miloto fili'ehibe. Ai ya higo komopati ai eminogo ai eminogo hiluta hapati li yege holago bu go'ohune. Yana'mu lali ana huto lalalutigihi enali kumu luto minoto lito hiluta'a ya'ma he'miluta babeyafalo enalitoga minalutamo ni'ibe.

1 Yoni 3:23

Ka'a lu molo'ehina ka ma luto ni'ibe. Pana'a Yesu Kilisitohi ai gi'alo kehelito mino ule'ale huloto ai lu leto'ehinamofihi suhi huto komopati ai eminogo ai eminogo huto minaluta ni'ibe.

Huto Hilina Ka 1:5

to Yesu Kilisito aitogati ya'ma lehe'mose'na to fuluna'a lenalitoga mino moloto minalibe. Yesu ai ya'ma Hu'mamofihi ka'a beto huto ligo ule'ale nohina bo to kohe toto pana'a filise'naguti ho tise'na yamofihi lamana baga'a to noto noto kaba bona'i Sipi Botini lenali bo lenogotinifu kaba huto nohibe. Ai komopa'a limito ai'a golaha'atu foipanatiguti li okala hu leto'ehinamo ni'ibe.

Huto Hilina Ka 5:9

Nama kosaba'i mone ma lite li'ahana: Kai bati bo nohatagi kelebe gi'ahana pepamo lito naga'i gulu foto li paka salata babeyafa huto nohane. Kai kahago filito kai golahakatu bona'i asagatoga fato fato bona'i to fato fato enonogo hiti to fato fato enugufa hiti to fato fato metoga bona'i mina fito enele'mo fato fato huto Hu'ma nohinaga enele'mo molo'ahatamo ni'ibe.