Efeso 4:16 - Ka Lamana'a Monoꞌi Lu Mu Tifiꞌehina Ka Yabe

¹⁶ Lali ya huto aitoga hepito minenogo ai kaba hu noletabe. To lali gumita'a fato fato nekisa'a moneko moneko nominenogo, ai fato fato nagatu lele'mo hepilago moneko gufa'a lolo huto nominone. To lali ya huto nohutogo fato fato nekisa'a lili'na'a li bati bati hulata nohigo ai ginaga fi emigo ai ginaga fi emigo huto nohigo gufa'a asaga'i moneko huto amuya moloto hofa notabe.

Efeso 4:16 ပူးပေါင်းရင်းမြစ်များ

Yoni 15:5

Bai naga'mofihi hapa'a nani ya'ma nohube. Lenali ya'ma letoha'a nehabe. Mone'a enali nanitoga ete hepite minalana ya'ma nani ana suhi huto enalitoga buto i hepilenogo enalitoga legeya'a babu luto halina'mu yabe. Lenali ya'ma nani hiti i mehepise ana'ina legeya'a lilana'a mone meni'ibe.

Romu 12:4

Lali moneko bomofihi gufa'a suhi luto nominone. Gufa'a moneko'na ni'inaya aku fato fato kegi'a to fato fato foya nelibe.

1 Koliti 10:17

Yupala nose'na ya'ma moneko'i nose'na lali asaga'i nolata nohune. Ana suhi luto lali asaga bona'i i hepito moneko'i lolo hulata nohune.

1 Koliti 13:13

To minoba minoba hilana nasana ya'ma yabe. Hu'mamofitoga keheli amuya nomolota to huto hilina'a sa sa huto geba nohuta to liginaga fise nohuta yamofihi nasana loebe monebe nehanaya liginaga fise nohuta yamofihi le'mo kohe to'ehibe.

1 Koliti 8:1

To faga lugefa nasanamofihi seba'a nelata hi'ahana yamofihi keheluto lu lepilube'mu nohube. Lali asaga bona'magita ana'ina hapa hapa'a akehelilata nohune lite nelafihe? Yamofihi keheli'ahanaya hapa'a kehelise ago keheliletetini lenugufa le'momo titi nehabe. To komopatini ai eminogo ai eminogo hite to ai he'menogo ai he'menogo hite minalana ya nasanauba lufusatini lolo hu'ehinogo bati hite minalana yabe.

Galesia 5:22

To Sikalafu'mofihi legeya'a ma suhi huto hulata nohibe. Mehi lepito komopatini lepilata nohina, lenegelo bise'na hulata nehana, mino fulu huse'na, kosele'i melenohose bati huto minose'na, lenele'mo bati hulatana, komopatini lamana hite minolata, foyagu agoya emilata nohuto Hu'mamofihi kaga'a mone kegi'a mehe'milata,

Galesia 5:6

Yesu Kilisitotoga buto i hepito minaluta ya'ma lugufa laga huse'na to lugufa laga mehuse'na li nupa napa huto mone'na legeya'a meni'ina futu'a yabe luto lilune. Keheli ule'ale hulatanamofihi fayaha'a komopatigu minelenogo komopati bona'i asagatoga malaluta'muko legeya'a yabe lilune'mu hune.

Efeso 1:4

Ai ya'ma koyapa kana me'mofihi ana'ina huto mehu'ehigo nani naga'i lolo hilabe luto lele'mo'ehibe. To lali kumu yabe luto Kilisitou ho lifinogo lele'mo eto hinogo foipanati meminenogo to sibina mone laliti meni'igo gobisalo minalabe luto lele'mo'ehina yabe.

Efeso 3:17

To Kilisito kumu keheli amuya melenogo ai'a komopatinigu minoto mino amuya malalibe luto loka nohobe. To Kilisitohi komopa'a lepilinanauba lufusatini limito lenele'mo amuya lolo hinogo,

Efeso 3:7

To Hu'mamofihi ka lamana'amofihi foya'a lito kele kele'i bo minalane luto lu nimi'ehina yabe. Ya hilane luto Hu'mamofihi hetofa mehi nimise'na'a to ai'a amuya'a hiti nanitoga li huto huto molo'ehinamo ni'ibe.

Efeso 4:15

Aku'i lali liginaga fi epito Hu'mamofihi kaga ma'naka luto ai lu eminogo ai lu eminogo hutoti ai latahati lolo huto nohina bo Kilisitotoga mino kikipa holototi fato fato suhi huto aitoga hofa talune.

Filipai 1:9

To komopatini emilatana hofa toto to kehelise'natinimu to kehelise'nauba napa huto tilibe luto Hu'mamofitoga luto moloto nohube.

Kolose 2:19

Enali Kilisitotoga hepite meneminabe. Ai latahati nohinogo lali gumita'a nohuta hupa'atu to go'nuna'atu hiti li hepito ai hiti moneko'na nohuto Hu'mau lu molo'ehina suhi luto hofa notone. To enalimoya Kilisito latahatigati i pa sete he'mi'ahana bona'i nehabe.

Kolose 2:2

To ana lili'na henabe luto nolube? Enali ai he'menogo ai he'menogo hite koguna ite nehite ai ginaga fi eminogo ai ginaga fi eminogo minalabe luto foya nolube. Ana huto enali Hu'mamofihi komopa'a keheli fe lite loe lae mehise minalabe luto to Hu'mamofihi suguna ka l'emo huto hu'ehinana'a hapa'a kehelilabe luto foya nolube. To ana suguna ka hapa'a henana ni'ibe? Yesu Kilisito bo yabe.

1 Tesalonika 1:3

Lenali Hu'mamofitoga keheli amuya melete minelata nehana yamofihi lamana'a ya'ma li huto nehabe. To komopatini emilata nehite foya'a amuya melete minelata nehabe. To Sipi Bo Yesu Kilisito alina kumu yabe luto keheli ule'ale hite geba hite minelata nehabe. Ya'ma afotifu Hu'mamofihi ai gobisalo kehelito fokehi holata nohune.

1 Tesalonika 2:13

To lali Hu'mamofihi kaga lu lepi'ohutogo lenali ya'ma bona'magihi kaga ni'ibe lite melise ya'ma Hu'mamofihi ka lamana'a yabe lite kehelite li gu i'ahanamo ni'ibe. To lamana'a ya'ma huto ni'ibe. Hu'mau ya'ma aitoga keheli emilata bona folagaha'anigu minoto foya'a lilata nohibe. Ya'mu lenalitoga ya huto nominana'mu lali ya'ma Hu'mamofihi fokehi mone hiti holoto nominone.

1 Tesalonika 3:12

To Sipi Bouba lenele'mo higo ai komopa'a eminogo ai komopa'a eminogo hite mineno. To lali komopati lenalitoga molo'ohuta suhi hite komopatini silaga bonatoga malalana yauba napa huto hofa tenogo hite minalabe luto Hu'mamofihi loka nohone.

2 Tesalonika 1:3

Lalalutigita, lali asaga yupahi lenali kumu yabe luto Hu'mamofitoga fokehi lito minolata nohune. Lenali Hu'mamofitoga keheli amuya melelata nehanamofihi hofa tana'mu luto komopatini ai eminogo ai eminogo hilana hofa tana'mu luto bati huto fokehi nolune.

1 Timoti 1:5

To nani ya'ma henabe luto nolube? Enali kehelilete komopa'ani mone keheli sibina mehise komopa'ani fulu hinogo minete to Hu'mamofihi agoya hu emite minalabe. To ya hite minete, Hu'mamofitoga enemehi emilana'mu yabe luto nolube.

1 Pita 1:22

Lenali kaga lamanamofihi kehelilata hite mege'i malalana ni'igo lenalitoga hapa'a lana'mu luto lenalalutinigihi komopatinigu faga melise lenemehatini lusiga lite epilata nehabe. Ya'mu yabe lite komopatini ai eminogo ai eminogo mu tifite minalo.

1 Yoni 4:16

Hu'mau komopa'a limilata nohina'a ya'ma bu goto keheli'ohune. To keheliya ito keheli'ohune. Hu'mamofihi hapa'a ya'ma mehi limilata'namofihi nohinagihe. Enali komopa'ani emite bite minete lite hilana'a enali Hu'mamofihi komopa'agu minalune'mu nehabe. To Hu'mau ai komopa'anigu minoto lito hilina'mu yabe.