Efeso 3:10 - Ka Lamana'a Monoꞌi Lu Mu Tifiꞌehina Ka Yabe

¹⁰ Hena'mube? Yatai Hu'mamofihi yagapana'a lali moneko'na huto nominenogo ya'ma kokulumagu agelo enigihiti bo to amuya'ani hiti bo nehanamagi lali bu legelete Hu'mamofihi keheli bati huse'na fato fato'mofihi yatai keheli bati hilabe luto ni'ibe.

Efeso 3:10 ပူးပေါင်းရင်းမြစ်များ

Romu 11:33

Akae. Hu'mamofihi kehelise'na'a hetofa hatofa ni'inagihe. Ai asaga'namofihi keheliya ito bai to'ehina yabe. Keheli bati huse'na'a sipi ni'inagi ekesa yigise'na'a kiyi'afu kehelilibe? To hapa'amu hiya bouba anana kehelilibe?

Romu 8:38

Nani mana keheli ule'ale nohube. Mone filise'nafi to ma melugu minose'nafi, foipa agelomagifi to kokulumagu felemagifi anagu kaba huse kene'magifi to mone yatai ni'ina nasanauba huto huse'nafi to aliha'auba huto hilinafi, asaga'magi Yesutogati lele'mo loko mehilana'mu yabe.

1 Koliti 1:24

Ya nehanaya lali Hu'mau lele'mo'ehina bona'magita Yuta bona'i nohuta Giliki bona'i hiti nohuta laliya Kilisito kumu nokeheluta ya'ma Hu'mamofihi felisa to kehelise'na'a ni'ibe luto nokehelune.

1 Koliti 2:7

O'e, nani keheli bati huto lulata nohuna'a Hu'mau koyapa'i komopa'agu suguna huto keheli molo'ehina yamofihi lu huto hulata nohube. Keheli molo'ehina ka'a ya'ma bona'magita lali Hu'mamofihi fana meha'agu minalune luto koyapa'i ana'ina li huto mehina yupahi Hu'mau le'mo keta mehuse huto molo leto'ehina.

Efeso 1:21

Kilisitou Hu'mamofihi lamaga'aga nohuto enikibina bo'anifi gamani bofi kaba bofi to amuya bo'anifi enali asaga'i enebe ligito ai moneko'i sipi bo'ani nominabe. To ma melugu nehana enikibina bofi to alihi huto hilina enikibina bofi ai Kilisitou enebe ligito nohigo ai gi'a mino amuya moloto napa huto mino'ehinamo ni'ibe.

Efeso 1:23

To lali Hu'mamofihi bona'magita gumita'a lolo huto nohuto gufa'a lolo hu baga nouta yabe. Ya huto ni'inaya to ai'a silaga'na lolo baga ilata bo nohibe.

Efeso 1:3

Sipi Boti Yesu Kilisitohi afo'afu Hu'ma ai lele'mo fulu huto kokulumaguti mono lusa fato fato'mofihi Kilisitotoga buto mino hepina'mu yabe luto limi'ehina yabe. Limina'mu yabe luto fokehi lilune.

Efeso 6:12

Lenali ya'ma akeheli'ahabe. Lali fa'mene lugufa hiti bona'magita luba sabo menohune. Metepu kapo kaba nehana to Satahi kaba bo'a hiti enikibina bo sipi'a to sipi bo amuyana'a nehananamagi to foipa kene'i samahi tito kokuluma megesa'aga neminana enali luba li huto hu limilata nehabe.

Kolose 1:16

To Hu'mau le'mo ho ti'ehina bo, Yesu ai kokulumalugu nasana to melugu nasana asaga'na to ya'ma lali bu nogotana hiti bu megotana hiti yege yege'i lolo hu'ehina yabe. To ai agelo bo fato fato'i enele'mo huto huloto kapo'anigu enele'mo nomoloto to kibina bona'ani hiti sipi kaba bona'ani hiti to gamani bona'i hiti ya'ma lolo huto enele'mo ho ti'ehina. To ya'ma asaga melugu mine'ahananamo Yesu to Hu'mau hiti lili'na neli'igo asaga'na lolo hu'ehina yabe. To ya'mu asaga'na ai'na'a ni'ina'mu yabe.

Kolose 2:15

Ya nohuto Satahi ka lepekilina'a ka foyagu lenele'mo malalina'a laga hu'ehibe. Kilisitou malipu yafalo fililoto foipanatini li he'mi nolepoloto Sataha naga'i enele'mo laba hu'ehigo fateha'a fi lehe toto nebago yatai asaga bona'i Hu'mamofihi amuya bo nohibe lite kehelilabe luto enelepi'ehina.

1 Timoti 3:16

Lali mono'mofihi suguna ka fala kito mino'ehina yamofihi legeya'a Yesuhi hapa'amu lite lu huto hilata nehana yamofihi koli'a hiti nasana ni'ibe. Kilisito kumu ma luto nokehelune. Ai ya'ma lali lugufa lolo huto li huto hu'ehina. To Sikalafu'uba ai hapa'a li huto higo fu ligo mino'ehina keheli'ohune. To agelo bona'magi ai'i be ge'ahana. To noto noto bona'i folagaha'anigu ai'a ka'a lu yege hago enali keheli su he'ahanamo ni'ibe. Melugu bona'magi ai kumu kehelite amuya mele'ahana. To kokulumamofihi fana meha'alo Hu'mau le'moto ti'ehina yabe.

1 Pita 1:12

Ana ka lu huto huse bona'magi enali ma lite keheli'ahana. Ya'ma sa sa hite keheli'ahana kaga enali'ani kanagu huto hilina meni'igo lenali kanagu huto hilina ni'ibe luto Hu'mau lu hokolo hu epolo'ehina. To enali lu yege he'ahana kaga lenali yatai kanagu nekehelibe. Ya'ma Hu'mau ho lifi'ehina Sikalafu'uba kokulumaluguti limito enele'mo amuya mololago enali ka lamana'a lenalitoga lite bi'ahana bona'magi Kilisito kumu lu lepi'ahana ka ni'ibe. To ana kaga agelomagi ana hite kehelilune lite sa sa hilune'mu nehabe. Ana kaga lenalitoga huto hu'ehina ni'inagihe.

1 Pita 3:22

To ai kokulumalugu tito Hu'mamofihi yahi lamaga'aga mino moloto nohibe. Yaga nohigo agelomagi mine'ahana'a hiti to kokulumalugu enigihiti bo mine'ahanaya amuya'a hiti mine'ahanaya Yesu enebe ligito kaba hu epoloto nominabe.