Efeso 1:1 - Ka Lamana'a Monoꞌi Lu Mu Tifiꞌehina Ka Yabe

¹ Oho, Efeso bona'ise. Lenali Hu'mamofihi naga'ise. Lenali Sipi Boti Yesu Kilisitotoga ule'ale hite neminana bona'ise. Nehafihe? Nani Poluita Hu'mamofihi kaga'a lu molo'ehina'mu ya'ma Yesu Kilisitohi aposolo bo lolo hu'ohunamofita fayahi ya'ma koyoto nolepube.

Efeso 1:1 ပူးပေါင်းရင်းမြစ်များ

Luku 16:10

To bo moneuba nesi'nasilo kaba huto hilinamofi to amuya moloto kaba hu bati hilina alihi sipina huto hilinalo ana huto kaba hu bati hilina'mu yabe. To bo moneuba nesi'nasilo kaba hu bati mehilina ana huto sipina huto hilinalo kaba hu bati mehilina'mu yabe.

Aposolo 16:15

Ai kaga keheliya ina'mu luto ai'a hiti lalameha'a hiti mono nagami'i fele'ahana yabe. Ai nagami'i afololoto ma luto kaga lu limi'ehina: Nani kumu Sipi Bomofitoga komopaka bati huto emi'ahane lite keheli'ehitemo nani noha'niluga ete minalo. Ya luto ana'uba koyo koyo bito kehe ina'mu luto noha'aluga buto mino'ohuta yabe.

Aposolo 18:19

Enali Efeso hepalugu henetilete Pilisilanogo Akuilanogo he'mi etoto'ehina. Ya huloto Yuta bona'magi li nupa lite mono kaga beto hilata nehana nonugu ai tiloto Yuta bona'i hiti kaga lu keheli fa keheli hi'ahana.

Aposolo 18:21

Ya luto ka'ani pelesa iloto ma luto lu epi'ehina: Ai Hu'ma linogomo nani aku'i lenalitoga oto bu lenagalube. Ya luloto botigu tiloto Efeso hepa'i he'mito bu'ehina.

Aposolo 9:13

Ya ligo Ananiasiu ka'alo nona'a lu emi'ehina: Sipi Bo, babu bona'magi ya'ma bomofihi kaga'a nelago nokeheluna bo nohibe. Kai boanaka Yelusale'i enegene mane ise bati mehina suhi babu luto ya'mana bouba li huto nohibe lago nokeheluna yabe.

Romu 1:1

Nani Poluita, Yesu Kilisitohi koko pana'a nohuto ma fayahi nogobe. Koyapa'i Hu'mau nani kumu kehe ito nele'mo ho tito ka lamana'a lu yege hobo luto lu nimi'ehina yabe.

Romu 1:7

Ya'mu luto nani fayahi lenalitoga asaga Lomu bona'i Hu'mau komopa'a lepito to nani yagapana'i nehabe lu'ehinalo nogobe. Ai Hu'mau afotifu to Sipi Boti Yesu Kilisitohi fuluna'a hiti lenehe'mose'na'a hiti lenalitoga mineno.

Romu 8:1

Yatai bona'magi Yesu Kilisitotoga hiti hepite minago moneko'na nehana yanamofihi Hu'mau enifisa meilina to osahi meepilibe.

1 Koliti 4:12

Lugufamofihi nasana huto hilibe luto laliti layahatitu amuya foya lito li huto hulata nohune. Lali kumu lele'mobe hokobe hi'ahana bebe sose ka lu epololata nohune. Kalana'i nemele letago lipakafa menohose fa'mene nominone.

1 Koliti 4:17

Nani ya hilabe luto Timotihi ho lufugo lenalitoga foiya nobibe. Ai'i komopa'ni emi'ohuna bo Sipi Bomofihi mono kagu pana'ni lolo huto minoto ana'ina le'mo fu luto lolo hulata nohina bo ai buto nani Yesu Kilisitohi mono ka'amofihi kapo'a Kilisitohi naga'a noto noto nehana enelepito minolata nohunamofihi buto aku'i lu lepinogo kehelilabe.

2 Koliti 1:1

Poluita nani Yesu Kilisitohi aposolo nele'mo ho ti'ehinamofita to bo mone lalalutifu hiti moneka nohutoti'a Koliti hepatoga Hu'mamofihi bona'a to Giliki melugu mine'ahana'a hiti asaga'i mineme bite ete hi'ahana lenali fayahi ya'ma koyo nolepito ma luto nolube.

Galesia 1:1

Poluita nani aposolo bo nohugo ya'ma bo moneuba noho melifi'ehina yabe. To bona'magi lili'naga meli nete'ahana yabe. Yesu Kilisito to aimo fili'ehinaguti le'mo ho ti'ehina bouba, afotifu Hu'ma ya'ma ai'a kaga'alo aposolo lolo hu'ohuna yabe.

Galesia 3:26

To lenali ya'ma Yesu Kilisito kumu keheli ule'ale huto agoya hu emuta'mu yabe lite yata'isi asaga'i Hu'mamofihi yagapana'a lolo hite nehabe.

Galesia 3:28

To ya hu'ehina'mu Yuta bona'i nehana to fegutoga bona'i nehana, kele kele'i yagapana'i lolo hite tina'a limina'a hite mine'ahana, fa'menego minelata hi'ahana boana'i fato hite minelata hi'ahana. Yamofihi su ho'ehigo yatai lenali asaga'i Yesu Kilisitotoga bite hepite moneko koguna lolo hi'ahabe.

Galesia 3:9

Ya'ma Abalahau keheli ule'ale huto agoya hu emilata hu'ehina hetofa kapogu giyaka ito bu'ehina. To enali ana hite Hu'mamofitoga agoya hu emilata ana kapoloko ite bilana'a enali lusa'agu bi falalabe.

Efeso 1:15

To ya nohigo nani lenali Sipi Boti Yesu kumu keheli ule'ale hite agoya emilata nemina, to Hu'mamofihi bona'i asagatoga lenemehi epite minelata nehana ka keheliloto lenali kumu luto Hu'mamofitoga fokehi hoba hoba nohuna ya'ma menohe'mube. Lenali kumu yabe luto Hu'mamofitoga lulata nohuna ni'ibe.

Efeso 2:10

Lali Hu'mamofihi yahi fayaha'a nohutogo ai'a Yesu Kilisitotoga molo emutamofihi foya lilabe luto lele'mo huto hu'ehibe. To ana foyamo lite bona'magi enehe'mete minalabe luto koyapa'i lu kehelito molo leto'ehina yabe.

Efeso 2:13

Lenali ana kanagu foto'i mine'ahana bona'i yatai Yesu Kilisitotoga hepite minago Kilisitohi golaha'auba lenele'mo gegisa'agu lenele'mo malago Hu'mamofitoga nehetite nehabe.

Efeso 2:6

Ai Yesu Kilisito hiti moneka kokulumagu huto minoto asaga'na kaba huto minalune luto lele'mo ho tito aitoga lele'mo hepi'ehina yabe.

Efeso 6:21

Minoto lito nohuna yamofihi hapa'a to foya'a lilata nohuna yamofihi kehelilabe luto Tikiku ai'ya buto ka lu lepilube'mu nohibe. Ai lalalutifu lamana'a Sipi Bomofihi agoya pana'a foyagu amuya moloto mino'ehina bo yabe.

Huto Hilina Ka 17:14

Ya nehite Hu'mamofihi sipisipi nala'amofihi luba hi etete minalune'mu habe. Ya nehinogo sipisipi nala'auba to ai'a naga'a hiti enali ya'ma amuya molo lito buto enifitu falube'mu hibe. Ya nohinogo ai ya'ma enigihiti bomagihi enogo'anifu to kibina bomagihi enogo'anifu nohinagihe. Ai kehe i'ehina bo hiti to elesa molo epi'ehina bo hiti to aitoga i ke'mete mine'ahana bo hiti enali ya'ma akafu yagakafamofihi naga'amofihi hiti luba hi etete enebe ligilune'mu habe.

Huto Hilina Ka 2:10

Lenalitoga keta'a huse'na aku'i huto hu lepilube'mu higo lenelesa melino. Keheli'ahafiye? Satau ai enimi'i mololata nasana huto hu lepilibe luto lenalitogati luga'a ya'ma naga nonugu lenele'mo malalina'mu yabe. Ya hulenogo keke'i luse'na keta huse'namofihi kana'a 10 yupapogu huto hu epilina'mu yabe. Lenali ya'ma mono ka li pili kete lite fililafi fa'mene minalafi lite minete kehelilenogo sekele mamu'a hiti kakili tegi huto ule'ale huto minolata nohinamofihi lito bi lepalalube'mu hube.

Huto Hilina Ka 2:13

Lenali hepa'i neminanamofihi hapa'a keheli'ohube. Yalo'i Satau kaba hu epalalina hepato nehabe. Lenali kaga'ni to nigi'ni li pili kete lite neminabe. To kaga'ni fala mekite nehago lu aku toto lu lepilata hu'ehina bo Atipasiu ai hepatini ya'ma Satau minoto lito nohina yalo ya'ma fili hoto lenali kana ya yupahi nani kumu keheli ule'ale ya'ma kete bi'ahanamo ni'ibe.