2 Pita 3:16 - Ka Lamana'a Monoꞌi Lu Mu Tifiꞌehina Ka Yabe

¹⁶ Ai fayahi koyoto koyo'ehina kana'alo kana'alo ana huto ya'mu lu lepito mino'ehinamo ni'ibe. To ai fayahi koyo'ehina'agu kaga luga'a yamofihi hapa'agu keta'a hiti ni'ibe. Kaga yamofihi bona'i negi'amagi to mono kagu lapa mebi'ahanamagi legitaga ka nelana lu hokolo lepalalune lite faga lilata nehago ai fayahi koyo'ehina'asigo meminabe. Mono bukugu ka luga'a ana hite enali li sibi saba hite enali'ani haya kelelata hi'ahana kapogu nebite ya suhi hilata nehite fenene hilabe.

2 Pita 3:16 ပူးပေါင်းရင်းမြစ်များ

Matiu 15:3

Ya lago Yesu kaga'anilo lu epi'ehina: Lenali kagatinisigo mege'i nemelete hena hibe lite Hu'mamofihi keya kaga'a mege'i menemalabe?

Matiu 15:6

Ya luloto ai ito'afinogo afo'afinogo etele'mo bati mehulata nohibe. Lenali ya'mana suhi li huto nehitemo Hu'mamofihi keya ka'a li gofa nehete lenali hapatinimofinogo li saga hilata nehabe.

Matiu 22:29

Ya lago Yesu ka'anilo nona'a lu epi'ehina: Lenali mono ka hiti to Hu'mamofihi amuya'a hiti keheli bati mehi'ahabe. Lenali lenekesa yigise'natini asaga'i sibina hu'ehibe.

Filipai 3:19

Bona'i yanamagi enugufa'ani enibita hulata nohinamofihi hofa to'ehinana yanauba enogo'anifu lolo hulata nohibe. To fato fato'nauba enubuya hilina'mu golemehi kelata nehabe. To ma melugu nasana'muko keheli keheli hulata nehabe. Ya nehana'mu lite logo hepalugu bilune'mu nehabe.

Hibulu 5:11

Yamofihi ka'a babu luto ni'inaya lenali lenegekesa legeso hite kehelilatanamofihi tupa'asi nehinogo lu lepilube luto keheli'ohuna komopatini keta nohibe.

1 Pita 1:1

Nani Pitaita, Yesu Kilisitohi aposolo nohuna bo, Hu'mau nele'mo eto hu'ehina. To Hu'mau lenele'mo ho ti'ehina bona'magita, lenali guna molo'ehinalo Ponitasi metoga hiti Galesia metoga hiti Kapatosia metoga hiti Esia metoga hiti Bitinia metoga hiti tili tele hite mine'ahana lenali'i fayahi ya'ma koyoto nolepube.

1 Pita 2:8

To mono bukugu fayahi mone ma luto ni'ibe: Ana efatoti i kusulu bite limilana'mu yabe. To ana efapolo ho kete enahalina'mu yabe. Ana kaga keye'ahanamofihi hapa'a ya'ma ni'ibe. Bona'i enali Hu'mamofihi ka'a keheli he'milata nehana enali kusulu bite limilana'mu yabe luto lu'ehinamo ni'ibe. Ya hite bite, ya suhi hilata nehabe luto Hu'mau ya'ma lu molo'ehina yabe.

2 Pita 2:1

Koyapa'i Isilaeli bona'i enalitoga kaga leli'ali fagalo bona'i mono ka lu sibina huse bona'i kosaba'i babu lite huto hite mine'ahana. To ana huto lenalitoga Yesuhi kaga lu sibina hilana ya'ma leli'ali bo huto hilune'mu nehabe. Enali faga mono ka li huto hite minenogo lenalitoga loko huse nasana'a lenele'mo sibina huse nasana'ya huto hu lepilube'mu nohibe. To ya'asigo meni'ibe. Sipi Bouba foipana'ani he'mi epoloto enubuto bi'ehina bona'i enali Sipi Bomofihi enemegesa hi emilata hilana'a to Sipi Bomofihi gi'a li sibina hulata yamofihi lilabe. Enali'ani ya hite melete, hana'mu yabe luto foipanamofihi nona'a huto hulatanamofihi ya'ma mele'isi kali nali huto hu epiluna'mu yabe.

2 Pita 2:14

Enubutu gili gili hite moko lise a'mofihi bu gelata nehana foipana ni'ina'mu enipa nehite laga sipi kehelilata hi'ahana ni'ibe. Enali komopa'ani lapa mebi'ahana bona'i enimi'mi ka lite kelefugu halana suhi hite enele'mete bilabe. To enali yogo fe'nohi ya nasana'mu amuya melete lolo hite bite komopa'ani nasana lolo hu'ehina. Enali'ya logo hepalugu naga'i lolo hilana'mu yabe.

2 Pita 3:14

Komopa'ni lepi'ohuna bona'ise. Lenali ana'ina ya suhi hana'mu geba hite Hu'mamofihi bulo komopatini ketipa ito fi fana toto gulu gulu linogo foipanatini meminenogo minalune lite aitoga bati hite amuya malalo.

2 Pita 3:2

To lenali mono ka leli'ali bona'i Hu'mau enele'mo ho ti'ehinamagi koyapa'i fono ka fono ka li'ahana ka hiti to lenali'i aposolo bona'magi Sipi Boti lubuto bilata bouba lu'ehina kamo lu lepi'ahana ka ya keheli bati hite kehelite minalabe luto nolube.

Yute 1:4

Hena'mube? Bona'i luga'a Hu'mamofihi keheli'ahana'a enali folagahatigu fenene hite ti'ahana. To enali moko foya lilata nehanalo Hu'mau ka melemekilina'mu yabe lite ai hetofa bo nohinagihe lite nelana enali ya lite Hu'mamofihi lehe'mose kaga'a li sibi hite to lali moneko kaba boti, Yesu Kilisitohi enemegesa hu emite ibe fitebe hi etelata nehabe. Enali ya'ma bite li he'mila ete li he'mila nehanamofihi hapa'anilo Hu'mau osahi epilina ka koyapa'i mono bukugu fayahi keye'ahanamo ni'ibe.