2 Pita 3:10 - Ka Lamana'a Monoꞌi Lu Mu Tifiꞌehina Ka Yabe

¹⁰ To Sipi Bomofihi kana'a ya huto hilina luba kala bona'magi kofohi nemalago otopa nehana ya suhi huto ana kana'uba henetilina'mu yabe. Ai huto nohinogo kokuluma'uba ko kililika sipi luto buto hokolo hilina'mu yabe. To kokulumagu ana'ina sonofi'i silaga'i ni'igo bu golata nohuta nasana'ya asaga'i logouba lo su henogo fa'menena lolo hilina'mu yabe. Ya hilenogo melugu to me'mofihi gupisa'alo ana'ina silaga'i logouba ana huto lo su hoto fenene hilina'mu yabe.

2 Pita 3:10 ပူးပေါင်းရင်းမြစ်များ

Matiu 24:35

Kokuluma'i hiti me'i hiti su halinaya nani ka'ni fenene mehilina'mu minomo buto minalina'mu yabe.

Maki 13:31

Kokuluma hiti me'i hiti alihi fenene huto su halina'mu yabe. To nani ka'ni lusiga yagi mefilise huto hilina'mu yabe. Yesu ya luto lu epi'ehibe.

Luku 12:39

To ka mone hiti lipoti nolepugo ya'ma kehelilo. To nohi afo'afu guminalo bouba oto noha'aguti gumina lilina kana'a keheli'ohutomo ai he'mi'ehigo noha'aguti tito gumina lilata menohibe. To hena'mugope ai kaba gimi gito minolata nohigo yabe.

Romu 8:20

To Hu'mau melugu lolo hu'ehinana asaga'namofihi komopa'a pata silibe luto Hu'mau ka epekito lu molo'ehina. Ya'ma ana'ina'a asaga'i ai'a sibina huto hilibe melu'ehina. Hu'mau ai pata silibe luto kaga molo'ehina. To mone'i lali bu megose'namofihi geba hilutamo ma ni'ibe.

1 Koliti 1:8

Ai ya'ma Sipi Boti Yesu Kilisito henetilina kanalo foipanatini meminenogo to lufusatini amuya malago minalabe luto kaba hu lepoloba lepoloba nohinogo kanatini su halibe.

1 Koliti 5:5

ana mokolo bomofi folagahatiniguti he'mi etelete Satahi yanugu malalabe luto nolu lepolobe. Hena'mube? Ya'ma gufa'auba foipa nohina hapa'a Satau le'mo sibi hulenogo to komopa'a li gelehe higo Hu'mau ana bo buto bulenogomo Sipi Bo Yesu Kilisito nehetilina kanagu meha'a minalibe luto yabe.

1 Tesalonika 5:2

Lenalitini ya'ma Sipi Boti alina kana'amu ma lite kehelilata nehabe. Ya'ma guminalo bona'i folugu'i suguna huto alina suhi huto mele'isi nehetilina keheli'ahabe.

1 Tesalonika 5:4

Lalalutigita, lenali Kilisitohi naga'a nehanagi ya'ma metepunagu menehabe. Ya higo ya'mu Sipi Bomofihi kana'a mele'isi guminalo bona'magi nehe netilana suhi huto lenalitoga nehetinogo henabe lite katiya'i hite lenelesa lilibe?

2 Pita 3:11

Ana'ina asaga'na ana suhi huto lo su halinamo ni'igo ya'mu lenali eto hite minete Hu'mamofihi kaga'mu amuya melete minete kehelite lamana'alo mege'i melete minalo.

2 Pita 3:12

Ya nehite Hu'mamofihi kana'a alina'mu fifa ite geba hilete lenogobi foya lite minalabe. Ya hite nehinogo kana'a tupa mone nohigo kokuluma'iya logouba loto fa'menena lolo hilina'mu yabe. To kokulumato ana'ina bu goto nohutana'ya asaga'i logo guluya meha'agu nohinogo logo loto sonofi'i su halina'mu yabe.

2 Pita 3:7

To ai yatai ana huto Hu'mamofihi kaga'auba kokuluma hiti me'i hiti kaba nohuto'a to alihi ai molo'ehina kanagu logo lo su halibe luto kaba nohibe. Bo foipana'ani'mu kaga guna molo epalalina kana'a huto nohinogo enali nona'a guna melete ya hilana'mu me'i hiti kokuluma hiti geba hite neha'inabe.

Yute 1:6

To agelo mone'amagi enali kaba foya'ani he'mite nohi hepa'aniloti he'mite hi'ahana'a enali'i Hu'mau ule'ale seni nagatu li sipi tuto sa gi epoloto afeha'alo ema metepunagu enele'mo he'mi'ehigo enali kana sipilo ka foya lilina kanamofihi geba hite neminana'a yamofihi beto hite kehelilo.

Huto Hilina Ka 16:15

Kehelilo. Nani gumina baukalo bona'magi suhi huto topa nehenogo henetiluna'mu yabe. Ya nehinogo luga'amagi enali enugufa yapako minalanamagi ya'ma enubuya hu laligi komopa'ani kosaba hinogo minete gukete ikolo bi etete kaba hite minalana enali enegelo bilune'mu habe.

Huto Hilina Ka 20:11

To nani sekele mamu'a hiti kefa hisa sipilo koholi nasana mone bu go'ohube. Gupisa'alo mino'ehina ai gobisa bu go'ohuna ya'ma kokuluma hiti me'i hiti gobisaloti koli hilete aku'i huto mehite'atiti minigi'aha'ina.

Huto Hilina Ka 21:1

To nani nubu egolago kokuluma yuhufa to me'i yuhufa hiti bu go'ohuna. Kokuluma tafa'a to me'i tafa'a etali bite su hete'atiti to hege nagami'i ana huto buto su nohago silaga'i fenene hi'ahana bu go'ohube.

Huto Hilina Ka 3:3

Lenali ana'ina li nupa hite fi lehe toto lu lepito lenegekesa li'ehinamo le'mo kosaba hite li pili kete lite nehite foipanatini he'mite komopatini li gelehe hilo. Li gelehe hite kaba hite meminalana ya'ma luba li lepilube'mu hube. Kana'a nomolona ya'ma lenali mekeheli'ehinogo gumina baukalo bona mone'mofihi suhi huto mele'isi oto henetilube'mu hube.

Huto Hilina Ka 6:14

To kokuluma ai ya'ma fuka bito pepagu kelebe noguta ya suhi huto kelebe gito buto fa'menena lolo hu'ehina. To kosa to hege nagamilugu me'i ti'ehinana enali asaga'i mopo mopo hago hepa'anigati he'milete bi'ahana.