2 Pita 2:10 - Ka Lamana'a Monoꞌi Lu Mu Tifiꞌehina Ka Yabe

¹⁰ Bona'i enali'ani komopa'aniguti moko foya sipi higo kolo tanana hite kaba bomofihi ka'a kehelite mege'i melelata nehana bona'i enali'i Hu'mau enele'mo motito amuya naga'i epilina'mu yabe. Ya'ma faga nelana babafi bona'i enaliya enelesa meligo amuya melete minete kokulumagu neminana kene'magi enali kumu koli mehise nehite enigi'ani le'mo sibina sabana hilata nehana yabe.

2 Pita 2:10 ပူးပေါင်းရင်းမြစ်များ

Luku 11:25

Ya luto ekesa yigilotomo ai i behe huto buto he'mito o'ehina noha'a le'mo bati hago gulu gulu luto ni'igo buto ana foipa feleuba bu golata nohibe.

Luku 19:14

Ya nohigo hepa'alo bona'magi enali ana bo sipi ipakafa he'ahana. Ya nehago ana bo abufa nohigo bona'i luga'a enoho lifigo kaga lite mege'i lifite bite enali ma lite li'ahana: Ya'ma bouba ai lali gihiti boti lolo mehilibe luto keheli'ohune li'ahana yabe.

Aposolo 23:5

Polu ka'anilo nona'a lu'ehina: Nalalu'nigita ai sipi mono bo nohibe luto nani mekeheli'ohube. Mono kauba ma luto lulata nohina: Kai bonakamagi kaba bo'animofihi kaga foipa'a melu etobo.

Romu 8:1

Yatai bona'magi Yesu Kilisitotoga hiti hepite minago moneko'na nehana yanamofihi Hu'mau enifisa meilina to osahi meepilibe.

1 Koliti 6:9

Ana'ina foipana lilata nehana bona'magi Hu'mamofihi ai kapo'agu henetilana'a meni'ibe. Yamofihi mone keheli'ahafihe? Lenali komopatinigu keheli sibina mehilo. Moko takolo bona'i to nalisa lugefa bona'i to ibe sili abe sili bo to bo luga'a bomagihi enugufa li sibina nehite ana'magi suhi hite minese bo

2 Koliti 10:3

Lali fa'mene bona'i ma metoga minoto humofa'na hu'ohutamo ni'inaya Hu'mamofihi kaga kumu yabe luto luba hulata nohuta yamofihi metoga bona'magihi tafa komopa'anitu kenasabo bilata nehana ya huto meni'ibe.

Efeso 4:19

To komopa'ani fi hekini lo'ehigo ana'ina foipa faipanamofihi komopa'agu minete moko huse'na fato fato'mofi kumu enibita higo kosele'i meenehenogo enubuya mehinogo lolo hilata nehabe.

Efeso 5:5

Lenali ya'ma ka kehelite minalo. Moko lilata bona'i to anananamo'mu enipagu hilina bona'i enali Kilisitohi to Hu'mamofihi kapolo minete lite metilana'mu yabe. To ana huto enali fato bomofihi nasana'a lilube luto enipagu hilina bona'i enali ana hite ana kapolo metilana'mu yabe. To hena'mube? Enali Hu'mamofitoga enemehi meemise ma melugu nasanatoga enemehi emilata lugefa nasana suhi huto mege'i melelata nehana bati mehibe.

Kolose 3:5

Lenali ma melugu bona'magihi hapa'ani li he'milo. Moko lise'na yagi, ana'i gumina folose'na yagi, kolotananamofihi hapa'a yagi, lenipagu keheli sibina huse'na yagi, to foipanamofihi hapa'a asaga'i komopatiniguti li he'milo. To ma me'mofihi nasana asaga'i laga lepesise'na yana'mu lu laga hite he'milo. Ya'ma melugu nasana laga lepesise'namoya lugefa suhi huto ni'ina melugu bona'magi Hu'mamofihi le'mo laba hilata nehana ana'ina melugu nasana'a liyafa hite kanihi filata nehana. Lenali ya'ma hapa'aya mege'i memalalo.

1 Tesalonika 4:7

Ya foipanaloti komopatini kolo tenogo minalabe luto meni'ibe. Komopatinigu babahi minalabe luto Hu'mau elesa molo epi'ehina.

2 Timoti 3:2

Ana kanagu bona'i ya'ma hite minalabe. Enali lisipa bite to enali'ani'mu kehelinogo tinogo yogo fe'no kumu enibita hinogo minalana enali'ani lolo hite melete hilana nasana'mu enibita'ani hinogo enegelo bilete hipu hapu hilatana, enali'ani enugufa'ani lelite tite minalana, enemegeka lilatana, ito'anigi afo'anigihi kaga'ani pelesa ite keheli he'milata, ana'ina asaga'i libe laga hube hilana. Ya nehite ana'ina lamana'a mone neepinogo enofokehi lite nalalu'nimakabe melise komopa'ani bati mehinogo minalana'mu yabe. To enali Hu'mamofihi gi'a liyafa mehise fa'mene minalabe.

Taitasi 1:7

To Hu'mamofihi foya'alo kaba huto nominalina bo ai foipana'a meminenogo minalibe. Ya huloto minoto hipu hapu meilina to mele'isi enipakafa mehalina, to bai nagami'i babu luto menalina, luba mehilina, to yogo fe'no kumu ekesa yigi yigi huto muhi muhi bilina bo meminalibe.

Hibulu 13:4

Bo alobole nemina'ina asaga'i ya'ma legeya'amofihi nasana'mu keheli emilabe. Bo alobolemale'i lolo neha'ina suhi lite li sibi mehilo. Mokolo'na to ate ate lite humofa'na nehana bona'i enali'i Hu'mau foipana'animofihi nona'a molo epalalina'mu yabe.

2 Pita 3:3

Ya nehite keheliya ite lenemehi emite kehelilo. Aliha kana'a tupa nohinogo bona'i sibina'a huto hilete foipanamofihi foya'aniguti lite minete nehite libe pigi bibe nehi lepelete ma lite lilana'mu yabe. Sipi Bo aku i behe huto alube luto lu'ehina yamofihi legeya'a hiya'a ni'ibe? Koyapa'i tatatigi keheli mebite minete fili'ahana yabe. Ya hulago ana'ina silaga'i melugu huto hu'ehina kanagu ema'aloti ana'ina'ya minomo buto tito mino'ehinamo ni'ibe. To ana supo huto mino'ehibe, lite lilanagihe.

Yute 1:10

Aku'i enali faga faga mono ka lilata bona'magi ya'ma mekeheli'ahana nasana'mu yamofihi ibe fitebe hite to megeka lite minelata nehabe. Yaga kala suhi hite enugufa'ani enumu nofilina nasana'mu fa'mene komopa'anitu kehelilete yalo ya'ma foipa hilete yanauba enele'mo sibi sibi hite ya hinogo enali fili su halabe.

Yute 1:16

Bona'i ya hana'a enali megeka lilata to fato bona'i enifisa ilata nehana to moko tako fato fato'mofihi lolo hite minete, enali'anigo li nupa napa hite neminana bona'i enali luga'a hiti ana kapolo enemege'i melete bilabe lite enofokehi lite fi taga hi epelete lite hilata nehabe.

Yute 1:18

Enali ma lite lu lepilata hi'ahanamo ni'ibe: Kana'a sipi tupa higo komopa'anigu foipanamofihi nasanalo ya'ma laga epesise'namo amuya melelata nehana bona'i huto hilete kalana'i mele lepelete mono katini lite mumusopa ilana'mu yabe.

Yute 1:4

Hena'mube? Bona'i luga'a Hu'mamofihi keheli'ahana'a enali folagahatigu fenene hite ti'ahana. To enali moko foya lilata nehanalo Hu'mau ka melemekilina'mu yabe lite ai hetofa bo nohinagihe lite nelana enali ya lite Hu'mamofihi lehe'mose kaga'a li sibi hite to lali moneko kaba boti, Yesu Kilisitohi enemegesa hu emite ibe fitebe hi etelata nehabe. Enali ya'ma bite li he'mila ete li he'mila nehanamofihi hapa'anilo Hu'mau osahi epilina ka koyapa'i mono bukugu fayahi keye'ahanamo ni'ibe.