1 Timoti 4:3 - Ka Lamana'a Monoꞌi Lu Mu Tifiꞌehina Ka Yabe

³ Ana'i melise gofuta minalo lite lu epilata nehabe. To nose'na mone'a menese mo silo lite lu epilana'mu yabe. Ana faga faga nelana yabe. Hu'mamofi kumu kehelite amuya melete minalana bona'magi ai ka'a lamana'a keheliya ilana bona'magi enali nose'namofihi foke ka lite nalabe luto Hu'mau li huto hu'ehinamo ni'ibe.

1 Timoti 4:3 ပူးပေါင်းရင်းမြစ်များ

Matiu 14:19

To ana boana'i kifi'nalo melugu minalo luto lu epi'ehina. Ya luloto ai loegi loegi monegi beleti hiti to loe faya'i hiti liloto kokulumalugu bu golago tiloto nunumu huto fokehi li'ehina. To ai beleti li pata putu siloto koko pana'a epigo enali asaga boana'i lite bite epimofa'na hi'ahana yabe.

Matiu 15:11

To bomofihi komopa'agu tilata nohinanauba ana bo le'mo kolo tolata menohibe. To bomofihi ai komopa'aguti fegutoga heleko limilata nohinanauba bo le'mo kolo tolata nohibe.

Matiu 15:36

To ai sebeni'a beleti hiti to faya'i lagaso meso'a loesi hiti yanuga liloto Hu'mamofitoga nunumu huto fokehi holoto gofa gofa holoto koko pana'a epi'ehina. Ya higo koko pana'amagi enali leli'ali hite asaga boana'i epi'ahana yabe.

Luku 24:30

Alihi enali nose'na nalune'mu nehite Yesu etali hiti moneto mine'ahana. Ya huloto ai beleti nose'na liloto Hu'mamofitoga fokehi ho emiloto gofa hoto etimi'ehina yabe.

Yoni 6:23

To Yesu beleti nose'na hiti faya'i hiti lito fokehi holoto'a babu boana'i epigo ne'ahana hepa lebato Taibiliasi boti luga'a nebago bu ge'ahana.

Aposolo 27:35

Polu ya luto luloto beleti nose'na lito asaga enali enubulo Hu'mamofitoga fokehi ho emito nunumu huloto li pata sito nalube'mu hu'ehina.

Romu 14:17

Hu'mamofihi kapogu minaluta hapa'a ma ni'ifihe? Nose'na hiti nagami'i hiti nalutanamofihi nasanabe? O'e, ya huto meni'ibe. Hu'mamofihi Sikalafu'uba komopatigu lamana huse'na hiti to mino fulu huse'na hiti to legelo bise'na ya'ma lolo nohina ya'ma Hu'mamofihi kapo ni'ibe.

Romu 14:3

To lenali fato fato nose'namo nenanamagita ya'ma nose'na mone'a mo nosina bomofihi ka meemekilo. Ai'a ekesa keheli'ehinamofihi kaga loko mehilo. To ana huto lenali mone nose'na mo nesina guya'asigo nenanamagita ya'ma nose'na yege yege'i nonana bomofihi hapa'amu ka meemekilo. To hena'mube? Hu'mau ana bomofihi ale'mo'ehinagihe.

Romu 14:6

To mone yupahi napa ni'ibe lulata bouba Hu'mamofihi gi'a liyafa huse'namu'i ana yupapogu fuli minalibe. To asaga nose'na nalata bouba ana huto Hu'mamofihi gi'a liyafa huse'namu'i kaba huto nominabe. To ai ana nose'namo Hu'mamofitoga gepohi luto bati huto yabe luto lu emito nonabe. To bo moneuba fato nose'na mo sito guya'asigo nalina ai ana huto Hu'mamofihi gi'a liyafa huto bati huto yabe lu emito nonabe.

1 Koliti 6:13

Lenali ya'ma nose'na lipagu nasana ni'ibe to gupatigu ya'ma nose'na'mu ni'ibe lite lilata nehabe. Ma'naka nelanaya minoto Hu'mau ai ana hiti ana hiti he'minogo fa'menena lolo hilube'mu higo su halina'mu yabe. Lugufauba ya'ma moko'mu yabe luto meni'ibe. Sipi Bomofihi nasana ni'ibe. To Sipi Bouba ai'a lugufamofihi afo'afu nohibe. O'yo, lali aku alihi Hu'mamofihi bulo ho tito minonogo ai lugufa'mu ka foya li letalina'mu. To lali lugufatu Sipi Bomofihi gi'a li hofa talune.

1 Koliti 7:28

To a'i lilata yamofihi sibina mehilube'mu hibe. To fa'mene nohilina a'i moneuba baha'alo bilinamofihi sibina mehilina'mu yabe. Anabole neminanamagi nasana'muko keke'i lite minalana, ya suhi lenalitoga huto hu lalibe luto negekesa nokeheluto ya'ma nolube.

1 Koliti 8:8

Hu'mau ai nose'na nonotana to menonotana yamofihi kehelinogo sibina lolo mehilube'mu hibe. Seba'a nolata'na yamofihi kehelinogo sibina hilifihe? To menolata'na kehelinogo bati hilibe. Aitoga ya huto meni'ibe.

Kolose 2:16

To ya hu'ehigo lenali nose'na menose'na'mu to sipi yupahifi mono fuli yupapofi yana'mu to yuhufa ikapo o nebelenogo yana'mu hiti kaga melete ka lepekilana meni'ibe. Ya'mu mekehelilo. Ana fato bouba ya suhi huto hu lepolo'ehinagomo bati mehu'ehibe.

Kolose 3:17

To asaga'na hilana'a to kaga lilana'a Sipi Boti Yesuhi gi'a liyafa nehite minalo. To ai kumu Hu'mamofihi fokehi lilo.

1 Timoti 2:4

Ai ya'ma bona'i asagatoga enubuto bilube luto to ya'ma hetofa ka'a lilabe luto kehelilata nohibe.

1 Timoti 4:4

Hu'mamofitogati nasana silaga'na ahuto hu'ehina to lamana'ago huto hu'ehinamo ni'ibe. Ya hu'ehina'mu luto nose'nalo foke ka luto lusa gito nolata nohune yamofihi mo sise'na meni'ibe. To alobole i ke'mete minalana'a ana huto Hu'mamofitogati huto hu'ehina'mu luto nasanalo foke ka luto nohune yamofihi he'mise'na meni'ibe.

1 Timoti 5:14

Ya nehana'mu nani ma luto nolube. Keto ana'i kosaba'i enali baha'anilo bite minete yagapana'ani eneketete enali'ani noha'ani foya'ani bati hite kaba hite le'mo bati hite minalabe. Ya hite nehinogo lali fatehatimagi enabagalo ilenogo lali kumu ka sibina'a mone melilabe.

Hibulu 13:4

Bo alobole nemina'ina asaga'i ya'ma legeya'amofihi nasana'mu keheli emilabe. Bo alobolemale'i lolo neha'ina suhi lite li sibi mehilo. Mokolo'na to ate ate lite humofa'na nehana bona'i enali'i Hu'mau foipana'animofihi nona'a molo epalalina'mu yabe.

Hibulu 13:9

To fato fato'namofihi kosaba kaga nelite li lenelepinogomo kehelite kaba hu bati hilo. Ana kagauba lamana kapo i pebisa hete nebinogomo enemege'i memalalo. Hu'mau lenehe'mose'nauba komopatini le'mo hetofa hu lepelenogo ya'ma bebe salube'mu nohibe. Nose'na nolatanamofihi mo silatanamofihi lu laga hi'ahana ka yanauba mone lele'mo bati mehilina'mu yabe. Yamofihi kapo'alo bi'ahanamagihi legeya'a mone li huto mehi'ahanamo ni'ibe.