1 Timoti 3:1 - Ka Lamana'a Monoꞌi Lu Mu Tifiꞌehina Ka Yabe

¹ Bo moneubafi moneuba babafi minalube luto lilina ai bati lili'na lilube'mu hibe. Yamofihi ka legeya'a lamana'a bati huto ni'ibe.

1 Timoti 3:1 ပူးပေါင်းရင်းမြစ်များ

Luku 15:10

To nani ana huto, ma luto lu nolepube. Foipa bouba sibi hapa'a he'mito to komopa'a i gelehe hinogomo, Hu'mamofihi agelomagi ya'ma bomofi kumu yege filana'mu yabe.

Aposolo 1:20

Yalo Pitau lu'ehina: Ya'ma fayahi namamo lise bukugu ni'ina, ai ma luto yabe. Ai noha'a yu'nohi mineno. Bona'i mone ana nonugu memineno. To mone hiti ma luto ni'ina yabe. Bo moneuba ai hepa'i lito nona'a lili'na alino.

Aposolo 20:28

To lenali Hetofa Sikalafu'uba kaba bona'i minalabe luto lenele'mo ho ti'ehina bona'i, lenali Hu'mamofihi naga'i kaba hi epalalo. Ai'a golaha'aloti mina fi'ehina bona'i to sipisipi kaba bo suhi huto kaba hi epalalo.

Romu 11:13

Yatai nani Hu'mamofihi kaga'a lito bulata bo nohuto'ni lenali fegutoga bona'i ka lu nolepube. Nani Hu'mau lili'na nimi'ehina'mu nofokehi nolube.

Filipai 1:1

Nani Poluita to Timoti hiti moneka nohutoti'a Yesu Kilisitohi lili'na bona'a nohu'ibe. Lenali hepatoga bona'i Yesu Kilisitohi keheli emite mine'ahana bona'ise. Nehafihe? To Hu'mamofihi yagapana'i lolo hi'ahana bona'i to mono kaba bona'i to babafi bona'i lenalise. Nani fayahi ya'ma koyo nolepube.

1 Tesalonika 5:14

Lalalutigita, lenegekesa li hokolo huto lenogo'na bito lu nolepune. Bona'i luga'amagi foya melise nehanogo enali enegekesa lilo. To luga'amagi enelesa nelinogo neminana enele'mo hetofa hilo. To luga'amagi keheli ule'ale mehise loe lae nehinogo enali enele'mo amuya hilo. Ya hite asaga bona'magitoga legeso hite minalo.

1 Timoti 1:15

Yesu Kilisito aiya bona'i foipana'aniloti enubuto bilube luto melugu limi'ehina yanamofihi legeya'a lamana'a ni'ibe. Asaga'i kehelilata nasana'a ni'ibe. Ana'ina foipa lilata nehana bona'magihi nani enebe ligi'ohuna bo nohube.

1 Timoti 4:9

Yamofihi kaga'a lusiga lutomo ni'ibe. To ana kagalo asaga bona'i keheli amuya melete bebe sete komopa'ani emite minalabe.

2 Timoti 2:11

Kaga mone'a ma luto ni'ina yamofihi lusiga nolibe. Ai fili'ehinalo molo emi'ohuta ni'inogomo ya'ma ai hiti moneka minoto lito minalune.

Taitasi 1:7

To Hu'mamofihi foya'alo kaba huto nominalina bo ai foipana'a meminenogo minalibe. Ya huloto minoto hipu hapu meilina to mele'isi enipakafa mehalina, to bai nagami'i babu luto menalina, luba mehilina, to yogo fe'no kumu ekesa yigi yigi huto muhi muhi bilina bo meminalibe.

Taitasi 3:8

Kaga ya'ma lamana'a lusiga luto ni'ibe. Ka'a ya'ma le'mo hofa toloto lu epilane luto nolube. Ya huletogo Hu'mamofi kumu keheli amuya nemalana bona'magi enali nasana lamana'a lilune lite nelinogo foya babu lite nelite lilabe. Nasana lamana'a ni'ibe lite ye hilenogo bona'i enele'mo bati hilinamo ni'ibe.

Hibulu 12:15

Lenalitogati bo mone Hu'mamofihi lehe'mose'na li he'mito i behe huto bu laligi kaba hite minalo. Ya nehite komopatinigu ekesa'namofihi foipana moneuba leneme'na leneme'na bito lulata nohina ya suhi huto komopatinimofihi ekesa'nauba sipi hulenogo bona'i yege yege'magihi komopa'ani haya kolo laligi kaba hi epelelete minalo.

1 Pita 2:25

Lenali sipisipi yaga suhi hite lopi fite mine'ahanamo yabe. Yatai ya'ma lenemehatinimofihi kaba bo'a ai lenele'mo behe higo aitoga huto hite neete mege'i nemalabe.

1 Pita 4:15

Lenalitogati bo moneubafi moneuba ho filise'nafi to gumina huse'nafi to kegeiyo huse'nafi to hipa hipa huse'nafi to bona'magihi nasana'mu lubu gilipe ape nohutana'mufi ka foya li epelenogo naga nonugu keke'i lu laligihe.

1 Pita 5:2

Hu'mamofihi naga'i enali sipisipi yagamagihi suhi hite nehanamagihi lenali kaba hi epalalabe luto lu lepi'ehinagi ana lili'nalo babahi hite minalo. Komopatinigu bati mehinogo kaba bati hite hi epalalana'a meni'ibe. Hu'mau lu moloto lepi'ehina suhi hite komopatinigu keta mehuse bati hinogo kaba hi epalalo. Ya nehinogo moni fe'nohi lilata nehana ya'mu gopa lili'na'a yamofihi lenuluhaya netinogo ete minete lite hilabe.